રમતગમત મંત્રીએ કરી મોટી જાહેરાત, પેરાલિમ્પિક મેડલ વિજેતાઓ પર કર્યો પૈસાનો વરસાદ

રમતગમત મંત્રી મનસુખ માંડવિયાએ મંગળવારે પેરિસમાં તાજેતરમાં પૂર્ણ થયેલી પેરાલિમ્પિક ગેમ્સમાં મેડલ જીતનાર ખેલાડીઓ માટે મોટી જાહેરાત કરી છે. તેમણે આ ગેમ્સના ગોલ્ડ મેડલ વિજેતા ખેલાડીઓ માટે રૂ. 75 લાખ, સિલ્વર મેડલ વિજેતા ખેલાડીઓને રૂ. 50 લાખ અને બ્રોન્ઝ મેડલ વિજેતા ખેલાડીઓને રૂ. 30 લાખના રોકડ પુરસ્કારોની જાહેરાત કરી હતી.

રમતગમત મંત્રીએ મેડલ વિજેતાઓને સન્માનિત કરવા માટે આયોજિત એક કાર્યક્રમ દરમિયાન આ જાહેરાત કરી હતી. માંડવિયાએ 2028 લોસ એન્જલસ પેરાલિમ્પિક્સમાં વધુ મેડલ જીતવાના લક્ષ્યાંક ધરાવતા પેરા-એથ્લેટ્સને સંપૂર્ણ સમર્થન અને સુવિધાઓ પ્રદાન કરવાનું વચન પણ આપ્યું હતું.

મનસુખ માંડવિયાએ કરી જાહેરાત

મનસુખ માંડવિયાએ કહ્યું, ‘દેશ પેરાલિમ્પિક્સ અને પેરા સ્પોર્ટ્સમાં આગળ વધી રહ્યો છે. 2016માં 4 મેડલ બાદ ટોક્યોમાં 19 મેડલ અને હવે પેરિસમાં 29 મેડલની સફર યાદગાર છે. અમે અમારા તમામ પેરા-એથ્લેટ્સને તમામ સુવિધાઓ પૂરી પાડીશું જેથી કરીને અમે 2028 લોસ એન્જલસ પેરાલિમ્પિક્સમાં હજુ વધુ ગોલ્ડ મેડલ જીતી શકીએ. ભારતે તેના ઐતિહાસિક પેરિસ પેરાલિમ્પિક અભિયાનનો અંત 29 મેડલ સાથે કર્યો, જેમાં 7 ગોલ્ડ, 9 સિલ્વર અને 13 બ્રોન્ઝ મેડલ સામેલ હતા.

ભારતનું અત્યાર સુધીનું સર્વશ્રેષ્ઠ પ્રદર્શન

પેરાલિમ્પિકમાં ભારતનું અત્યાર સુધીનું સર્વશ્રેષ્ઠ પ્રદર્શન છે. તેના શાનદાર પ્રદર્શનથી ભારતે પેરાલિમ્પિક ગેમ્સના ઈતિહાસમાં 50 મેડલનો આંકડો પણ પાર કર્યો. ફ્રાંસની રાજધાનીમાં અભૂતપૂર્વ સિદ્ધિ હાંસલ કર્યા બાદ મંગળવારે સેંકડો સમર્થકો દ્વારા પેરા એથ્લેટ્સનું ઉષ્માભર્યું સ્વાગત કરવામાં આવ્યું હતું.

ભારત માટે કયા ખેલાડીઓએ ગોલ્ડ જીત્યો?

પેરિસ પેરાલિમ્પિક ગેમ્સ ભારત માટે ઐતિહાસિક સાબિત થઈ, જ્યાં નવદીપ સિંહ, પ્રવીણ કુમાર, ધરમવીર, હરિન્દર સિંહ, સુમિત અંતિલ, નીતિશ કુમાર અને અવની લેખારાએ ભારત તરફથી ગોલ્ડ મેડલ જીત્યો. આ વખતે ભારતે 84 પેરા એથ્લેટ્સની તેની સૌથી મોટી ટુકડી મોકલી હતી અને ખેલાડીઓએ શ્રેષ્ઠ પ્રદર્શન કર્યું અને એક સિઝનમાં સૌથી વધુ મેડલ જીતવાનો રેકોર્ડ બનાવ્યો હતો.