કેન્દ્ર કર્મચારીઓ માટે મોટી ખુશખબર! 8મા પગાર આયોગથી 20%થી 35% સુધી સેલરી વધવાની શક્યતા

8th Pay Commission Salary Hikeને લઈને કેન્દ્ર સરકારના કર્મચારીઓ અને પેન્શનધારકોમાં ઉત્સુકતા વધી ગઈ છે. હાલ લાગુ 7મો પગાર આયોગ 31 ડિસેમ્બર 2025ના રોજ પૂર્ણ થઈ રહ્યો છે અને તેના બાદ 1 જાન્યુઆરી 2026થી 8મો પગાર આયોગ લાગુ થવાની શક્યતા વ્યક્ત કરવામાં આવી રહી છે.

નવા વર્ષ 2026ની શરૂઆત સાથે અનેક નિયમોમાં ફેરફાર થવાની ચર્ચા છે. તેમાં સૌથી મહત્વપૂર્ણ મુદ્દો કેન્દ્ર કર્મચારીઓના પગાર અને મોંઘવારી ભથ્થાનો છે. જો કે હજી સુધી સરકાર તરફથી અધિકૃત ભલામણો જાહેર કરવામાં આવી નથી, પરંતુ નિષ્ણાતોના અંદાજ પ્રમાણે 8મો પગાર આયોગ ટૂંક સમયમાં અમલમાં આવી શકે છે.

• સેલરીમાં કેટલો વધારો શક્ય?

પાછલા વલણોને જોવામાં આવે તો

6મા પગાર આયોગમાં લગભગ 40% વધારો

7મા પગાર આયોગમાં 23–25% વધારો

જ્યારે 8મા પગાર આયોગમાં 20%થી 35% સુધી સેલરી વધવાની શક્યતા માનવામાં આવી રહી છે. આ વધારો મુખ્યત્વે ફિટમેન્ટ ફેક્ટર પર આધાર રાખશે, જે 2.4થી 3.0 વચ્ચે હોઈ શકે છે.

• DAમાં શું બદલાવ આવશે?

નવો પગાર આયોગ લાગુ થતાં સામાન્ય રીતે મોંઘવારી ભથ્થું (DA) મૂળ પગારમાં સમાવી લેવામાં આવે છે. ત્યારબાદ DAની ગણતરી નવી રીતે શરૂ થાય છે. નિષ્ણાતોનું માનવું છે કે 2026ની મોંઘવારી દરોને ધ્યાનમાં રાખીને DAની નવી રચના કરવામાં આવશે, જેના કારણે ટેક-હોમ સેલરીમાં સ્પષ્ટ અસર જોવા મળશે.

• એરિયર અંગે શું અપડેટ?

8મો પગાર આયોગ લાગુ થવાની તારીખથી કર્મચારીઓને બાકી રકમ (એરિયર) મળવાની પાત્રતા રહેશે. જો કે ચુકવણીમાં વિલંબ થાય, તો પણ એરિયર 1 જાન્યુઆરી 2026થી ગણાશે, જેમ અગાઉના પગાર આયોગોમાં થયું હતું.

• વધારાનો પગાર ક્યારે મળશે?

નિષ્ણાતો મુજબ, પગાર સુધારણા અને એરિયરની ચુકવણીમાં થોડો સમય લાગી શકે છે. 7મો પગાર આયોગ જાન્યુઆરી 2016થી લાગુ થયો હતો, પરંતુ તેની કેબિનેટ મંજૂરી જૂન 2016માં મળી હતી. તેવી જ રીતે, 8મા પગાર આયોગમાં પણ કર્મચારીઓને થોડું રાહ જોવું પડી શકે છે.