લાઇવ શો દરમિયાન અભિનેત્રી મિમી ચક્રવર્તી સાથે અસભ્ય વર્તન, મામલો પોલીસ FIR સુધી પહોંચ્યો

પ્રસિદ્ધ બંગાળી અભિનેત્રી અને તૃણમૂલ કોંગ્રેસની પૂર્વ સાંસદ મિમી ચક્રવર્તી એક વિવાદમાં ફસાઈ ગઈ છે. ઉત્તર 24 પરગણા જિલ્લાના બોંગાંવ શહેરમાં આયોજિત એક સાંસ્કૃતિક કાર્યક્રમ દરમિયાન તેમની સાથે અસભ્ય વર્તન કરવામાં આવ્યું હોવાનો તેમણે આરોપ લગાવ્યો છે. આ મામલે અભિનેત્રીએ પોલીસમાં લેખિત ફરિયાદ નોંધાવી છે.

મિમી ચક્રવર્તીની ફરિયાદ અનુસાર, રવિવારે નયાગ્રામ વિસ્તારમાં યોજાયેલા સ્ટેજ કાર્યક્રમ દરમિયાન આયોજનકારોમાંથી એક વ્યક્તિ અચાનક સ્ટેજ પર ચઢી આવી અને કાર્યક્રમ જબરદસ્તી રોકી દીધો. મોડી રાત્રે તેમને સ્ટેજ પરથી નીચે ઉતરવા માટે કહેવામાં આવ્યું, જેને કારણે તેમને જાહેરમાં અપમાનિત થવાની લાગણી થઈ હતી. આ ઘટનાથી વ્યથિત થઈને મિમી ચક્રવર્તીએ ઇમેઇલ મારફતે બોંગાંવ પોલીસ સ્ટેશનમાં ફરિયાદ મોકલી હતી. સાથે જ તેમણે સોશિયલ મીડિયા પર પણ ઘટનાનો ઉલ્લેખ કર્યો, જેના કારણે મામલો ચર્ચામાં આવ્યો છે.

બીજી તરફ, કાર્યક્રમના આયોજનકાર યુવક સંઘ ક્લબ એ મિમી ચક્રવર્તીના તમામ આરોપોને નકારી કાઢ્યા છે. આયોજનકાર તન્મય શાસ્ત્રીના જણાવ્યા મુજબ, મિમી કાર્યક્રમમાં નક્કી કરેલા સમયથી લગભગ એક કલાક મોડે પહોંચી હતી. પોલીસ દ્વારા કાર્યક્રમ માટે માત્ર અડધી રાત સુધીની જ મંજૂરી આપવામાં આવી હતી અને વિસ્તારની બોર્ડ પરીક્ષાઓને ધ્યાનમાં રાખીને કાર્યક્રમ બંધ કરવો જરૂરી હતો.

આયોજનકારોએ એવો પણ આરોપ લગાવ્યો કે મિમીના બાઉન્સર્સે ક્લબની મહિલા સભ્યો સાથે અસભ્ય વર્તન કર્યું હતું. જોકે, તેમણે સ્પષ્ટ કર્યું કે મિમી સાથે કોઈપણ પ્રકારની હેરાનગતિ કરવામાં આવી નથી. તેમ છતાં, જો ગેરસમજના કારણે અભિનેત્રીને દુઃખ પહોંચ્યું હોય તો તેમણે જાહેરમાં માફી પણ માંગી છે.