મધ્યપ્રદેશમાં ઈન્દોર–અમદાવાદ માર્ગ પર ગંભીર અકસ્માત, બસ પલટી જતા એક મુસાફરનું મોત

ઈન્દોર–અમદાવાદ હાઈવે પર વહેલી સવારના સમયે એક ભયાનક માર્ગ અકસ્માત સર્જાયો હતો. ઈન્દોરથી અમદાવાદ જઈ રહેલી મધ્યપ્રદેશ સ્ટેટ ટ્રાન્સપોર્ટની બસને પાછળથી આવી રહેલા એક ભારે ટ્રકે જોરદાર ટક્કર મારી હતી. ટક્કર બાદ બસનું સંતુલન બગડ્યું અને તે હાઈવે પર પલટી ખાઈ ગઈ.

અકસ્માતમાં એક મુસાફરનું ઘટનાસ્થળે જ મોત થયું હતું, જ્યારે આશરે 17 મુસાફરો ગંભીર રીતે ઈજાગ્રસ્ત થયા છે. બસમાં મહિલાઓ, બાળકો અને વૃદ્ધ મુસાફરો પણ સવાર હતા. બસ પલટી ખાતા જ ઘણા મુસાફરો સીટ પરથી ફંગોળાઈ ગયા હતા, જેના કારણે અંદર અફરાતફરી મચી ગઈ હતી.

આ અકસ્માત અવંતિકા હોટલ નજીકના વળાંક પર થયો હોવાનું જાણવા મળ્યું છે. અકસ્માતનો અવાજ સાંભળીને સ્થાનિક લોકો અને પસાર થતા વાહનચાલકો તાત્કાલિક મદદ માટે દોડી આવ્યા હતા. લોકોએ માનવતા દાખવીને બસમાં ફસાયેલા મુસાફરોને બહાર કાઢ્યા અને પ્રાથમિક સારવાર આપી હતી.

જાણ થતાં જ પોલીસ અને એમ્બ્યુલન્સ ટીમ ઘટના સ્થળે પહોંચી હતી. તમામ ઈજાગ્રસ્તોને નજીકની સરકારી તથા ખાનગી હોસ્પિટલોમાં ખસેડવામાં આવ્યા છે. પોલીસે ટ્રક ચાલક સામે કેસ નોંધ્યો છે અને અકસ્માતની વિગતવાર તપાસ શરૂ કરી છે.

પ્રાથમિક તપાસ મુજબ ટ્રકની ઝડપી અને બેદરકારીપૂર્વકની ડ્રાઈવિંગને અકસ્માતનું મુખ્ય કારણ માનવામાં આવી રહ્યું છે. અકસ્માત બાદ થોડા સમય માટે ઈન્દોર–અમદાવાદ હાઈવે પર વાહન વ્યવહાર ખોરવાયો હતો, જેને ક્રેનની મદદથી સામાન્ય બનાવવામાં આવ્યો.