Ahmedabad Murder: સિગારેટની માંગથી શરૂ થયેલો ઝઘડો 26 વર્ષના જાવેદની હત્યામાં ફેરવાયો

Ahmedabad Murder: અમદાવાદના સરખેજ વિસ્તારમાં રવિવાર રાત્રે સિગારેટ માગવાની નાની બાબતે થયેલી તકરાર જાનલેણ બની ગઈ. ફતેવાડી સ્થિત રોનક પાન પાર્લર નજીક 26 વર્ષના જાવેદ પર શાહરૂખ ઉર્ફે ‘લીકેજ’ નામના યુવાને ચપ્પાથી હુમલો કરી નાખ્યો. જાવેદને ગંભીર ઇજા થતા હોસ્પિટલ લઈ જવામાં આવ્યો હતો, પરંતુ વધુ લોહી વહેવાના કારણે તેને મૃત જાહેર કરવામાં આવ્યો.

પોલીસના જણાવ્યા મુજબ, આરોપી શાહરૂખનો ક્રિમિનલ રેકોર્ડ લાંબો છે. તે ડ્રગ્સ પેડલિંગ, પોલીસકર્મીઓ પર હુમલા, તેમજ એસિડ એટેકના પ્રયાસ જેવા અનેક ગંભીર કેસોમાં અગાઉથી જ સંડોવાયેલો છે. મૃતકના પરિવારજનોએ આક્ષેપ કર્યો કે આવા નશાખોર તત્વો વિસ્તારને સતત ત્રાસ પહોંચાડે છે, છતાં સામે કડક પગલાં લેવામાં આવતા નથી. પરિવારની માગ છે કે ડ્રગ્સ માફિયાને કાયદેસર રીતે કડક સજા આપી સમાજમાંથી દૂર રાખવામાં આવે.

હાલ સરખેજ પોલીસે શાહરૂખ ઉર્ફે ‘લીકેજ’ની ધરપકડ માટે વિશેષ ટીમ બનાવી છે અને વિસ્તારમાં નાકાબંધી વધારી છે. પોલીસ સૂત્રો જણાવે છે કે આરોપી ફરાર છે, પરંતુ તેના કોન્ટેક્ટ્સ અને લોકેશનના આધારે શોધખોળ તેજ કરી છે.

આ ઘટના શહેરમાં વધતા નશાખોર તત્વો અને તેમની હિંસક પ્રવૃત્તિઓ અંગે ગંભીર પ્રશ્નો ઉભા કરે છે. પોલીસે જણાવ્યું કે ડ્રગ્સ વપરાશ અને સપ્લાય વધવાથી નાના મુદ્દે પણ ગંભીર અપરાધો વધતા જાય છે, અને આવી ઘટનાઓ રોકવા માટે સખત કાનૂની કાર્યવાહી જરૂરી બની છે.