અમરેલીમાં ભયાનક માર્ગ અકસ્માત: બગસરા પાસે કાર અકસ્માતમાં 3ના મોત, એક ગંભીર

અમરેલી જિલ્લામાં બુધવાર, 17 ડિસેમ્બરના રોજ એક ગમખ્વાર માર્ગ અકસ્માતે સમગ્ર વિસ્તારમાં શોક ફેલાવી દીધો છે. બગસરા તાલુકાના હડાળા અને ડેરી પીપરીયા ગામ વચ્ચે વહેલી સવારે એક બેકાબૂ ફોર વ્હીલ કાર ભયાનક રીતે અકસ્માતગ્રસ્ત થઈ હતી. આ દુર્ઘટનામાં ત્રણ વ્યક્તિઓના ઘટનાસ્થળે જ કરુણ મોત થયા છે, જ્યારે એક વ્યક્તિ ગંભીર રીતે ઘાયલ થઈ હોસ્પિટલમાં દાખલ છે.

પ્રાપ્ત માહિતી અનુસાર, ચાર વ્યક્તિઓ એક જ કારમાં મુસાફરી કરી રહ્યા હતા. વહેલી સવારે કાર અતિઝડપે ચાલી રહી હતી, ત્યારે અચાનક ડ્રાઈવરનું નિયંત્રણ ગુમાવતા કાર રોડની બાજુ ઉતરી ગઈ અને ઝાડ તથા અન્ય અવરોધો સાથે જોરદાર રીતે અથડાઈ. ટક્કર એટલી ભયાનક હતી કે કાર સંપૂર્ણ રીતે ચકનાચૂર થઈ ગઈ.

અકસ્માતની જાણ થતાં જ અમરેલી ફાયર વિભાગની ટીમ તાત્કાલિક ઘટનાસ્થળે પહોંચી હતી. કારમાં ફસાયેલા લોકોને બહાર કાઢવા માટે ભારે જહેમત બાદ રેસ્ક્યુ ઓપરેશન હાથ ધરવામાં આવ્યું. ત્રણ મૃતદેહોને બહાર કાઢવામાં આવ્યા જ્યારે ગંભીર રીતે ઇજાગ્રસ્ત વ્યક્તિને તાત્કાલિક હોસ્પિટલ ખસેડવામાં આવ્યો.

પોલીસ વિભાગ પણ ઘટના સ્થળે પહોંચી તપાસ શરૂ કરી છે. મૃતદેહોને પોસ્ટમોર્ટમ માટે મોકલવામાં આવ્યા છે. પ્રાથમિક તપાસમાં અકસ્માતનું કારણ વધુ ઝડપ અને ડ્રાઈવરનું વાહન પરનું નિયંત્રણ ગુમાવવું હોવાનું માનવામાં આવી રહ્યું છે.

એક સાથે ત્રણ લોકોના અચાનક મોતથી પરિવારોમાં શોકનો માહોલ છવાઈ ગયો છે. સ્થાનિક લોકો અને ગ્રામજનોએ પણ ઘટનાને લઈ દુઃખ વ્યક્ત કર્યું છે.