ચેમ્પિયન્સ ટ્રોફી 2025 પહેલા ઓસ્ટ્રેલિયન ટીમને મોટો ઝટકો લાગી શકે છે. પોતાની કેપ્ટનશીપમાં કાંગારૂ ટીમને વર્લ્ડ ચેમ્પિયન બનાવનાર કેપ્ટન પેટ કમિન્સ આ ટુર્નામેન્ટ ચૂકી શકે છે. પેટ કમિન્સના પગની ઘૂંટીમાં સોજો છે અને આ માટે તેમને સ્કેન કરાવવું પડશે.
સ્કેન બાદ ખબર પડશે કે કમિન્સની ઈજા કેટલી ગંભીર છે. પરંતુ રિપોર્ટ મુજબ પેટ કમિન્સ માટે ફેબ્રુઆરીમાં યોજાનારી મેગા ઈવેન્ટમાં રમવું મુશ્કેલ લાગે છે.
પેટ કમિન્સ થઈ શકે છે બહાર
ચેમ્પિયન્સ ટ્રોફીની તૈયારીઓમાં વ્યસ્ત ઓસ્ટ્રેલિયન ટીમ માટે ખરાબ સમાચાર આવ્યા છે. ટીમના કેપ્ટન પેટ કમિન્સ ઈજાના કારણે આ ટુર્નામેન્ટમાંથી બહાર થઈ શકે છે. કમિન્સને પગની ઘૂંટીમાં સોજો આવ્યો છે. કાંગારૂ કેપ્ટનના પગની ઘૂંટીનું ટૂંક સમયમાં સ્કેન કરવામાં આવશે. સ્કેન બાદ ખબર પડશે કે કમિન્સની ઈજા કેટલી ગંભીર છે. તાજેતરમાં, કમિન્સની કેપ્ટનશીપ હેઠળ, ઓસ્ટ્રેલિયન ટીમે શાનદાર પ્રદર્શન કર્યું અને 10 વર્ષ પછી બોર્ડર-ગાવસ્કર ટ્રોફી પર કબજો કર્યો. કાંગારૂ ટીમે પાંચ મેચની સિરીઝમાં ટીમ ઈન્ડિયાને 3-1થી હરાવ્યું હતું.
કમિન્સ શ્રીલંકા સિરીઝમાંથી બહાર
શ્રીલંકા સામેની બે મેચની ટેસ્ટ સિરીઝ માટે પેટ કમિન્સને પણ આરામ આપવામાં આવ્યો છે. પેટ કમિન્સની જગ્યાએ સ્ટીવ સ્મિથને કેપ્ટનશીપ સોંપવામાં આવી છે. પેટ કમિન્સ ઈજાથી પીડાઈ રહ્યો છે અને તેથી તેને ટીમમાં સામેલ કરવામાં આવ્યો નથી. તેમની કેપ્ટનશીપ હેઠળ, પેટ કમિન્સે 2023 માં રમાયેલા વનડે વર્લ્ડકપમાં ઓસ્ટ્રેલિયાને ચેમ્પિયન બનાવ્યું. ભારત સામેની ટેસ્ટ સિરીઝમાં વિજય સાથે, ઓસ્ટ્રેલિયાએ વર્લ્ડ ટેસ્ટ ચેમ્પિયનશિપના ફાઈનલમાં પણ પોતાનું સ્થાન નિશ્ચિત કરી લીધું છે.
ગ્રુપ બીમાં છે ઓસ્ટ્રેલિયા
ઓસ્ટ્રેલિયાને ચેમ્પિયન્સ ટ્રોફી 2025 માં ગ્રુપ B માં રાખવામાં આવ્યું છે. કાંગારૂ ટીમ 22 ફેબ્રુઆરીએ ઈંગ્લેન્ડ સામે પોતાના અભિયાનની શરૂઆત કરશે. આ પછી, ટીમનો આગામી મુકાબલો 25 ફેબ્રુઆરીએ દક્ષિણ આફ્રિકા સાથે થશે. ગ્રુપ સ્ટેજની છેલ્લી મેચમાં, ઓસ્ટ્રેલિયા 28 ફેબ્રુઆરીએ અફઘાનિસ્તાન સામે ટકરાશે.
