Dharmendra Last Film Ikkiis: ધર્મેન્દ્રની અંતિમ ફિલ્મ ‘ઇક્કીસ’ માટે ભાવુક દેઓલ પરિવાર, સની-બોબી કરશે સ્પેશલ સ્ક્રીનિંગ

Dharmendra Last Film Ikkiis: શ્રીરામ રાઘવન દ્વારા નિર્દેશિત આવનારી ફિલ્મ ‘ઇક્કીસ’ ધર્મેન્દ્રના સિનેમેટિક કરિયરની સૌથી ભાવુક ફિલ્મ બની રહી છે. આ ફિલ્મને અભિનેતાની મોટા પડદા પરની છેલ્લી ફિલ્મ તરીકે જોવામાં આવી રહી છે, જેના કારણે દેઓલ પરિવાર માટે આ પ્રોજેક્ટ અત્યંત ખાસ છે.

ફિલ્મના આ ખાસ અવસરને યાદગાર બનાવવા માટે ધર્મેન્દ્રના પુત્રો સની દેઓલ અને બોબી દેઓલ મુંબઈમાં ‘ઇક્કીસ’નું એક ખાસ પ્રાઇવેટ સ્ક્રીનિંગ યોજવાની તૈયારીમાં છે. આ સ્ક્રીનિંગ આવતા અઠવાડિયે યોજાશે અને પરિવાર માટે અત્યંત ભાવુક ક્ષણ બની રહેશે.

ક્યારે રિલીઝ થશે ‘ઇક્કીસ’?

અગસ્ત્ય નંદા અને સિમર ભાટિયા અભિનીત ‘ઇક્કીસ’ એક વોર બાયોપિક છે, જે 1971ના ભારત-પાકિસ્તાન યુદ્ધમાં શહીદ થયેલા પરમવીર ચક્ર વિજેતા અરુણ ખેત્રપાલના જીવન પરથી પ્રેરિત છે. ફિલ્મ 1 જાન્યુઆરી, 2026ના રોજ સિનેમાઘરોમાં રિલીઝ થશે.

ફિલ્મમાં ધર્મેન્દ્ર અગસ્ત્ય નંદાના પિતાની ભૂમિકા ભજવે છે. દેઓલ પરિવાર ફિલ્મને સક્રિય રીતે સપોર્ટ કરી રહ્યો છે અને ચાહકોને થિયેટરમાં જઈને ફિલ્મ જોવા માટે અપીલ કરી રહ્યો છે.

ધર્મેન્દ્રે ફિલ્મનો પહેલો ભાગ જોયો હતો

ડાયરેક્ટર શ્રીરામ રાઘવને એક ઇન્ટરવ્યૂમાં જણાવ્યું હતું કે, ધર્મેન્દ્રએ પોતાની તબિયત ખરાબ હોવા છતાં ‘ઇક્કીસ’નો પહેલો અડધો ભાગ જોયો હતો અને ફિલ્મને લઈને ઉત્સુક હતા. દુર્ભાગ્યવશ તેઓ સંપૂર્ણ ફિલ્મ જોઈ શક્યા નહોતા, જે ટીમ માટે એક ભાવુક ક્ષણ રહી.

પ્રોડ્યૂસર દિનેશ વિજાનનું નિવેદન

પ્રોડ્યૂસર દિનેશ વિજાને કહ્યું કે, દેઓલ પરિવારના સભ્યોએ હજી સુધી ફિલ્મ જોઈ નથી. તેમના જણાવ્યા મુજબ, આ ફિલ્મ પરિવાર માટે લાગણીસભર અનુભૂતિ બનશે અને ધર્મેન્દ્ર પ્રત્યેનો તેમનો પ્રેમ સ્પષ્ટ રીતે દેખાશે.