વાહનચાલકો સાવધાન! આંખો અંજાવી દેતી LED લાઇટ લગાવી હશે તો થશે જેલ-દંડ

ગુજરાતના માર્ગો પર રાત્રિના સમયે વધતા જીવલેણ અકસ્માતો પાછળનું મોટું કારણ બનેલી હાઈ-ઈન્ટેન્સિટી વ્હાઇટ LED હેડલાઈટ સામે રાજ્ય સરકારે અંતે કડક પગલું ભર્યું છે. અનઅધિકૃત રીતે લગાવેલી અત્યંત તેજ લાઈટોથી સામેથી આવતા વાહનચાલકોની આંખો અંજાઈ જતાં ગંભીર અકસ્માતો સર્જાઈ રહ્યા હતા. આ મુદ્દે લાંબા સમયથી થતી રજૂઆતો બાદ હવે વાહન વ્યવહાર વિભાગે દંડથી લઈને જેલ સુધીની કાર્યવાહી કરવાની સૂચના આપી છે.

🚨 હાઈ-બીમ LED બની રહી છે મોતનું કારણ

વાહન વ્યવહાર કમિશનરના જણાવ્યા મુજબ, બજારમાં મળતી ઘણી આફ્ટર-માર્કેટ LED લાઈટો નિર્ધારિત માપદંડોથી અનેક ગણું વધારે તેજ ધરાવે છે. રાત્રિના સમયે હાઈ-બીમ પર આ લાઈટ ચાલુ થતાં સામેના ડ્રાઈવરને ક્ષણિક અંધાપો આવે છે, જે હાઈવે અને શહેરના માર્ગો પર ઘાતક સાબિત થાય છે.

🛑 વાહન ડીલરો પર પણ કાર્યવાહી

સરકારે માત્ર વાહનચાલકો નહીં પરંતુ વાહન ડીલરોને પણ ચેતવણી આપી છે. તમામ ડીલરશીપને સ્પષ્ટ આદેશ અપાયો છે કે કંપની-ફિટેડ લાઈટ સિવાયની કોઈ પણ અનઅધિકૃત કે વધુ તીવ્ર LED લાઈટ વાહનમાં લગાવી આપવી નહીં. નિયમ ભંગ કરનાર ડીલરો સામે વહીવટી કાર્યવાહી અને એન્ફોર્સમેન્ટ તપાસ કરવામાં આવશે.

🚔 RTO અને ટ્રાફિક પોલીસની મેગા ડ્રાઈવ

આગામી દિવસોમાં રાજ્યના તમામ મુખ્ય શહેરો અને હાઈવે પર RTO તથા ટ્રાફિક પોલીસ દ્વારા વિશેષ ચેકિંગ ડ્રાઈવ શરૂ કરાશે. ચેકિંગ દરમિયાન ટુ-વ્હીલર કે ફોર-વ્હીલરમાં અનઅધિકૃત LED લાઈટ મળી આવશે તો સ્થળ પર જ દંડ, વાહન જપ્તી અને ગંભીર કેસમાં જેલ સુધીની કાર્યવાહી કરવામાં આવશે.

🛡️ નાગરિકોની સુરક્ષા સરકારની પ્રાથમિકતા

રોડ સેફ્ટી કમિટીના રિપોર્ટ મુજબ, રાત્રિના 30 ટકાથી વધુ અકસ્માતોમાં હાઈ-બીમ લાઈટ એક મુખ્ય કારણ છે. સરકારના આ નિર્ણયથી માર્ગ સુરક્ષામાં વધારો થશે અને નિર્દોષ લોકોના જીવ બચી શકશે. ‘સ્ટાઈલ’ના નામે અન્યના જીવ જોખમમાં મૂકનારા સામે હવે કોઈ ઢીલાશ નહીં રાખવામાં આવે તેવો સ્પષ્ટ સંદેશ તંત્રએ આપ્યો છે.