હાર્દિક પંડ્યાની વાપસી: ઈજાથી આરામ બાદ સૈયદ મુશ્તાક અલી ટ્રોફીથી કરશે ધમાકેદાર કમબેક, ટીમ ઈન્ડિયામાં સ્થાન માટે ફરી તક મેળવશે

ટીમ ઇન્ડિયાનો સ્ટાર ઓલરાઉન્ડર હાર્દિક પંડ્યા ક્રિકેટના મેદાન પર વાપસી કરવા માટે તૈયાર છે. તે આ મહિનાના અંતમાં શરૂ થનારી સૈયદ મુશ્તાક અલી ટ્રોફીમાં બરોડા ટીમનું પ્રતિનિધિત્વ કરશે. હાલમાં હાર્દિક બેંગલુરુમાં BCCIના સેન્ટર ઑફ એક્સેલન્સ (NCA)માં ટ્રેનિંગ લઈ રહ્યો છે અને લગભગ સંપૂર્ણપણે ફિટ જણાઈ રહ્યો છે.

• 26 નવેમ્બર પહેલાં ફિટનેસ સર્ટિફિકેટ મળવાની અપેક્ષા

હાર્દિક પંડ્યાએ હજુ સુધી BCCI તરફથી ફિટનેસ સર્ટિફિકેટ મેળવ્યું નથી, પરંતુ એવી અપેક્ષા છે કે 26 નવેમ્બર, જે દિવસે T20 ટુર્નામેન્ટ શરૂ થઈ રહી છે. તે પહેલાં જ તેને રમવા માટેની મંજૂરી મળી જશે. ફિટનેસ ક્લિયરન્સ મળ્યા બાદ તે સીધો બરોડાની ટીમ સાથે જોડાવા હૈદરાબાદ જશે.

• બરોડાની પ્રથમ મેચ 28 નવેમ્બરે બંગાળ સામે

સૈયદ મુશ્તાક અલી ટ્રોફીમાં બરોડાની ટીમ ૨૮ નવેમ્બરના રોજ હૈદરાબાદમાં બંગાળ સામે પોતાની પહેલી મેચ રમશે. આ ટુર્નામેન્ટ હાર્દિક માટે એક ફિટનેસ ટેસ્ટ અને રિધમ મેળવવાનો મહત્ત્વનો મંચ પૂરવાર થશે. ક્રિકેટ ચાહકો તેની વાપસીની આતુરતાથી રાહ જોઈ રહ્યા છે.

• એશિયા કપ દરમિયાન હેમસ્ટ્રિંગની ઈજા થઈ હતી

હાર્દિક પંડ્યાને એશિયા કપમાં શ્રીલંકા સામેની સુપર-4 મેચ દરમિયાન ઇજા થઈ હતી. તેને ડાબા પગમાં હેમસ્ટ્રિંગની ઈજા થઈ હતી, જેના કારણે તે પાકિસ્તાન સામેની ફાઇનલ મેચ પણ રમી શક્યો નહોતો. તે મેચમાં તેણે માત્ર 3 બોલમાં 2 રન બનાવ્યા હતા અને 1 વિકેટ લીધા બાદ મેદાન છોડી દેવું પડ્યું હતું.

• ઓસ્ટ્રેલિયા સામેની સિરીઝ ચૂકી ગયો હતો

ઇજાના કારણે હાર્દિકે ત્યારબાદ ઓસ્ટ્રેલિયા સામે રમાયેલી ODI અને T20 સિરીઝ પણ ગુમાવવી પડી હતી. BCCIના એક અધિકારીના જણાવ્યા અનુસાર, હાર્દિક ઓક્ટોબરમાં સેન્ટર ઑફ એક્સેલન્સમાં જોડાયો હતો અને ત્યારથી તે નિયમિતપણે રિકવરી અને જીમ સેશનમાં હાજરી આપીને પોતાની ફિટનેસ પર કામ કરી રહ્યો છે.

• સાઉથ આફ્રિકા સિરીઝથી ટીમ ઈન્ડિયામાં વાપસી નિશ્ચિત

સૈયદ મુશ્તાક અલી ટ્રોફીમાં ફિટનેસ સાબિત કર્યા પછી હાર્દિક પંડ્યાની ભારતીય ટીમમાં વાપસી લગભગ નિશ્ચિત છે. સાઉથ આફ્રિકા સામે ભારતની ત્રણ મેચની ODI સિરીઝ 30 નવેમ્બરથી શરૂ થઈ રહી છે.

• પસંદગીકારો દ્વારા ટીમની જાહેરાત ટૂંક સમયમાં થશે

જોકે, પસંદગીકારોએ હજુ સુધી સાઉથ આફ્રિકા સિરીઝ માટે ટીમની સત્તાવાર જાહેરાત કરી નથી, પરંતુ એવું માનવામાં આવે છે કે હાર્દિક પંડ્યા આ સિરીઝમાં ટીમ ઇન્ડિયામાં પરત ફરશે. તેની વાપસીથી ટીમ ઇન્ડિયાને ફરીથી બેલેન્સ મળશે.