IC 814: ‘ધ કંધાર હાઈજેક’ સિરીઝમાં ફેરફાર કરવા માટે તૈયાર, જાણો મામલો

• ધ કંધાર હાઈજેકમાં સામેલ આતંકવાદીઓ પાકિસ્તાનના હતા
  
• આ સિરીઝ 29મી ઓગસ્ટે રિલીઝ થઈ ત્યારથી વિવાદ ચાલી રહ્યો છે
  
• વેબ સિરીઝ IC 814 ધ કંધાર હાઈજેકમાં ફેરફાર કરવામાં આવશે
  

વેબ સિરીઝ IC 814 ધ કંધાર હાઈજેક, જેમાં વિજય વર્મા, પત્રલેખા, પંકજ કપૂર અને નસીરુદ્દીન શાહ સ્ટારર છે, તેમાં ફેરફાર કરવામાં આવશે. આ સિરીઝ 29મી ઓગસ્ટે રિલીઝ થઈ ત્યારથી વિવાદ ચાલી રહ્યો છે. હવે નેટફ્લિક્સે કેન્દ્ર સરકાર સમક્ષ કહ્યું છે કે તે તેના વાંધાજનક ભાગોને હટાવવા માટે તૈયાર છે.

વેબ સિરીઝ ‘IC 814: ધ કંધાર હાઈજેક’ પર જોરદાર હોબાળો થયા બાદ, ઓટીટી પ્લેટફોર્મ નેટફ્લિક્સ શોની વાંધાજનક કન્ટેન્ટમાં ફેરફાર કરવા માટે સંમત થઈ ગયું છે. આ સિરીઝમાં આતંકવાદીઓ ભોલા અને શંકરના નામને લઈને વિવાદ ચાલી રહ્યો છે. સિરીઝનો જોરદાર વિરોધ થયા બાદ સોમવારે કેન્દ્રીય માહિતી અને પ્રસારણ મંત્રાલયે નેટફ્લિક્સ ઈન્ડિયાના કન્ટેન્ટ હેડને સમન્સ જાહેર કરીને હાજર થવા માટે કહ્યું હતું. આજે નેટફ્લિક્સના વડા મોનિકા શેરગિલ મંત્રાલયના અધિકારીઓ સમક્ષ હાજર થયા હતા.

મંત્રાલયના વરિષ્ઠ અધિકારીઓ અને નેટફ્લિક્સ ઈન્ડિયાના વડા મોનિકાની બેઠકમાં આ વિવાદ પર ચર્ચા થઈ હતી. આ સમય દરમિયાન, નેટફ્લિક્સ દ્વારા કેન્દ્ર સરકારને કહેવામાં આવ્યું હતું કે તેઓ વેબ સિરીઝ ‘IC 814: ધ કંધાર હાઈજેક’ના વાંધાજનક ભાગમાં ફેરફાર કરવા તૈયાર છે. એ પણ ખાતરી આપવામાં આવી હતી કે ભવિષ્યમાં નેટફ્લિક્સ પર જે પણ ફિલ્મો કે વેબ સિરીઝ રિલીઝ થશે, તે દેશના લોકોની ભાવનાઓને ધ્યાનમાં રાખીને તૈયાર કરવામાં આવશે.

કેન્દ્ર સરકારે શું કહ્યું?

આ મામલે કેન્દ્ર સરકારે કહ્યું છે કે ક્રિએટિવિટીના નામે ભાવનાઓને ઠેસ ન પહોંચાડી શકાય. સરકારનું કહેવું છે કે સપોર્ટ કરવાની સાથે અમે કન્ટેન્ટ અને કન્ટેન્ટ ક્રિએટરને પણ પ્રમોટ કરી રહ્યા છીએ. પરંતુ તથ્યો સાથે છેડછાડ ન કરવી જોઈએ. એવું કહેવામાં આવ્યું છે કે ફિલ્મ અથવા સીરિઝને રિલીઝ કરતા પહેલા, યોગ્ય રીસર્ચ કરવું જોઈએ અને હકીકતની તપાસ પણ કરવી જોઈએ.

શું છે વિવાદ?

ધ કંધાર હાઈજેકમાં સામેલ આતંકવાદીઓ પાકિસ્તાનના હતા. તેમના નામ ઈબ્રાહિમ અતહર, શાહિદ અખ્તર સૈયદ, સની અહેમદ કાઝી, મિસ્ત્રી ઝહૂર ઈબ્રાહિમ અને શાકિર હતા. નેટફ્લિક્સ સીરિઝમાં આ આતંકીઓના નામ ચીફ, ડોક્ટર, બર્ગર, ભોલા અને શંકર તરીકે દર્શાવવામાં આવ્યા છે. વેબ સિરીઝનો વિરોધ કરી રહેલા લોકોનું કહેવું છે કે પાકિસ્તાની આતંકવાદીઓને હિન્દુ નામ સાથે રાખવાથી ખોટો સંદેશ જાય છે અને લોકો વાસ્તવિકતા જાણી શકશે નહીં. તેમને લાગશે કે વિમાન ભારતીયોએ હાઇજેક કર્યું હતું.

શું છે હકીકત?

વેબ સિરીઝના કાસ્ટિંગ ડાયરેક્ટર મુકેશ છાબરાએ એક ઈન્ટરવ્યુમાં જણાવ્યું કે આ વેબ સિરીઝ સંપૂર્ણ રિસર્ચ કર્યા બાદ બનાવવામાં આવી છે. વિમાનમાં આતંકીઓ એકબીજાને આ નામથી બોલાવતા હતા. વેબ સિરીઝના અંતમાં આતંકવાદીઓના સાચા નામો પણ જાહેર કરવામાં આવ્યા છે. મીડિયા રિપોર્ટ મુજબ ભારત સરકારના વિદેશ મંત્રાલયે પણ પોતાના નિવેદનમાં આ વાતની પુષ્ટિ કરી હતી. વર્ષ 2000માં ભારત સરકારના નિવેદનમાં કહેવામાં આવ્યું હતું કે વિમાનમાં આતંકવાદીઓ એકબીજાને ચીફ, ડોક્ટર, બર્ગર, ભોલા અને શંકરના નામથી બોલાવતા હતા.