Champions Trophy રમવા પાકિસ્તાન જશે ભારતીય ટીમ? BCCI સેક્રેટરીએ આપ્યો જવાબ

• ચેમ્પિયન્સ ટ્રોફી 2025નું આયોજન પાકિસ્તાનમાં થશે
  
• ભારતીય ક્રિકેટ ટીમના પાકિસ્તાન જવાને લઇ સસ્પેન્સ
  
• આ દરમિયાન BCCI સેક્રેટરીએ પ્રતિક્રિયા આપી છે
  

ICC ચેમ્પિયન્સ ટ્રોફી 2025નું આયોજન આવતા વર્ષે ફેબ્રુઆરી-માર્ચ મહિનામાં પાકિસ્તાનમાં થવાનું છે. ક્રિકેટ ચાહકોને એ જાણવામાં રસ છે કે ભારતીય ક્રિકેટ ટીમ આ ટુર્નામેન્ટમાં ભાગ લેવા પાકિસ્તાન જશે કે નહીં. આ મામલે હજુ સુધી કોઈ સત્તાવાર નિવેદન આવ્યું નથી, જેના કારણે ટીમ ઈન્ડિયાના પાકિસ્તાન જઈને આ ટૂર્નામેન્ટમાં રમવા પર શંકા છે. આ દરમિયાન BCCI સેક્રેટરીએ પ્રતિક્રિયા આપી છે.

BCCI સેક્રેટરીએ શું કહ્યું?

ભારતીય ક્રિકેટ કંટ્રોલ બોર્ડ (BCCI)ના સચિવે આ મામલે પોતાનું મૌન તોડ્યું છે. જ્યારે તેમને પૂછવામાં આવ્યું કે શું ટીમ ઈન્ડિયા ચેમ્પિયન્સ ટ્રોફીમાં ભાગ લેવા પાકિસ્તાન જશે કે નહીં. જવાબ આપતા તેમણે કહ્યું કે આ અંગે હજુ કોઈ નિર્ણય લેવાયો નથી. જ્યારે ટુર્નામેન્ટ નજીક આવશે ત્યારે આ અંગે નિર્ણય લેવામાં આવશે.

ચેમ્પિયન્સ ટ્રોફી ક્યારે શરૂ થશે?

પાકિસ્તાન દ્વારા ICCને સુપરત કરવામાં આવેલ ચેમ્પિયન્સ ટ્રોફી-2025ના શેડ્યૂલ અનુસાર, આ ટૂર્નામેન્ટ 19 ફેબ્રુઆરીથી 9 માર્ચ 2025 વચ્ચે યોજાવાની દરખાસ્ત છે. આ ટૂર્નામેન્ટમાં ભારત-પાકિસ્તાનની મેચ 1 માર્ચ, 2025ના રોજ યોજાઈ શકે છે. હજુ સુધી ICCએ પાકિસ્તાનના પ્રસ્તાવિત કાર્યક્રમને મંજૂરી આપી નથી.

કઈ ટીમો ભાગ લેશે?

ICC ચેમ્પિયન્સ ટ્રોફી 2025માં કુલ 8 ટીમો ભાગ લેશે. તેમાં ભારત, પાકિસ્તાન, ન્યુઝીલેન્ડ, બાંગ્લાદેશ, ઈંગ્લેન્ડ, દક્ષિણ આફ્રિકા, ઓસ્ટ્રેલિયા અને અફઘાનિસ્તાનની ટીમો સામેલ છે. આ ટીમોને 2 ગ્રુપમાં વહેંચવામાં આવી છે. પહેલા ગ્રુપમાં ભારત, પાકિસ્તાન, ન્યુઝીલેન્ડ અને બાંગ્લાદેશની ટીમ છે. જ્યારે બીજા ગ્રુપમાં અફઘાનિસ્તાન, દક્ષિણ આફ્રિકા, ઈંગ્લેન્ડ અને ઓસ્ટ્રેલિયાની ટીમો સામેલ છે.