ભારત અને બાંગ્લાદેશ વચ્ચે 2 મેચની ટેસ્ટ સીરીઝ રમાઈ છે. ટીમ ઈન્ડિયાએ આ સિરીઝમાં શાનદાર જીત નોંધાવી હતી. ચેન્નાઈમાં રમાયેલી પ્રથમ ટેસ્ટ મેચમાં ટીમ ઈન્ડિયાએ બાંગ્લાદેશને 280 રનથી હરાવ્યું હતું અને ત્યારબાદ કાનપુરમાં રમાયેલી બીજી ટેસ્ટ મેચમાં 7 વિકેટે જીત મેળવી હતી અને બાંગ્લાદેશને સીરિઝમાં 2-0થી સ્વીપ કર્યું હતું.
આ ટેસ્ટ સિરીઝમાં આર અશ્વિન, જસપ્રિત બુમરાહ, આકાશ દીપ અને રવિન્દ્ર જાડેજાએ બોલ વડે કમાલ કરી હતી. આર અશ્વિન અને બુમરાહે 11-11 વિકેટ લીધી હતી. અશ્વિન અને બુમરાહ બંનેએ બાંગ્લાદેશ સામે સમાન વિકેટો લીધી હતી પરંતુ નવીનતમ ICC ટેસ્ટ રેન્કિંગમાં માત્ર જસપ્રિત બુમરાહને જ ફાયદો મળ્યો હતો.
અશ્વિન પાસેથી નંબર 1નો તાજ છીનવી લીધો
ICCએ તાજેતરની ટેસ્ટ રેન્કિંગ જાહેર કરી છે જેમાં જસપ્રીત બુમરાહે પ્રથમ સ્થાન મેળવ્યું છે. બુમરાહે પોતાના દેશબંધુ આર અશ્વિનને બીજા સ્થાને ધકેલીને ટોચનું સ્થાન હાંસલ કર્યું છે. કાનપુરમાં બાંગ્લાદેશ સામે ભારતની સાત વિકેટની જીત દરમિયાન મેચમાં 6 વિકેટ લીધા બાદ બુમરાહ માત્ર બીજી વખત ICC ટેસ્ટ રેન્કિંગમાં ટોચ પર છે. અશ્વિને બાંગ્લાદેશ સામેની બીજી ટેસ્ટમાં કુલ પાંચ વિકેટ લીધી હતી અને તે હવે બુમરાહના 870 રેટિંગ પોઈન્ટથી માત્ર એક પોઈન્ટ પાછળ છે.
આર અશ્વિન આ વર્ષે માર્ચમાં નંબર-1 ટેસ્ટ બોલર બન્યો હતો. ત્યારબાદ અશ્વિને બુમરાહ પાસેથી નંબર-1નું સ્થાન છીનવી લીધું હતું. હવે બુમરાહે અશ્વિન પાસેથી નંબર-1નો તાજ છીનવી લીધો છે. બુમરાહ બીજી વખત ટેસ્ટ બોલરોના ટોપ રેન્કિંગમાં પહોંચ્યો છે. શ્રીલંકાના પ્રભાત જયસૂર્યાને ટોપ-10 બોલરોની યાદીમાં એક સ્થાનનો ફાયદો થયો છે અને તે હવે 8મા સ્થાને પહોંચી ગયો છે.
ICC નવીનતમ ટેસ્ટ રેન્કિંગ (બોલર)
ટેસ્ટ બોલરોની તાજેતરની રેન્કિંગમાં ભારતના 2 બોલર, ઓસ્ટ્રેલિયાના 2 અને સાઉથ આફ્રિકાના એક બોલરનો સમાવેશ થાય છે. ત્રીજા સ્થાને ઓસ્ટ્રેલિયાના ઝડપી બોલર જોશ હેઝલવુડ અને ત્યારબાદ ઓસ્ટ્રેલિયાના ટેસ્ટ કેપ્ટન પેટ કમિન્સ છે. કાગીસો રબાડા 5માં સ્થાને છે.
- જસપ્રીત બુમરાહ- 870 રેટિંગ પોઈન્ટ
- આર અશ્વિન- 869 રેટિંગ પોઈન્ટ
- જોશ હેઝલવુડ- 847 રેટિંગ પોઈન્ટ
- પેટ કમિન્સ- 820 રેટિંગ પોઈન્ટ
- કાગીસો રબાડા- 820 રેટિંગ પોઈન્ટ
Source link
