અમદાવાદ એરપોર્ટને બોમ્બથી ઉડાવવાની ધમકી: ઈ-મેઈલ મળતાં જ સુરક્ષા એજન્સીઓ એલર્ટ મોડમાં, તપાસ શરૂ

અમદાવાદના સરદાર વલ્લભભાઈ પટેલ ઇન્ટરનેશનલ એરપોર્ટને બોમ્બથી ઉડાવી દેવાની ધમકી મળતાં સમગ્ર શહેરની સુરક્ષા વ્યવસ્થા તાત્કાલિક એલર્ટ મોડમાં આવી ગઈ હતી. 27 જાન્યુઆરી 2026ના રોજ એરપોર્ટના સત્તાવાર ઈ-મેઈલ પર આ ધમકી પ્રાપ્ત થતાં સુરક્ષા એજન્સીઓ, એરપોર્ટ પ્રશાસન અને પોલીસ વિભાગે તાત્કાલિક કાર્યવાહી શરૂ કરી હતી.

શું છે સમગ્ર મામલો?

મળતી વિગતો મુજબ, આ ધમકી એક અજાણ્યા ઈ-મેઈલ આઈડી aldurham420@gmail.com પરથી મોકલવામાં આવી હતી, જેમાં મોકલનારનું નામ ‘Amber Durham’ દર્શાવવામાં આવ્યું હતું. આ ઈ-મેઈલ 27 જાન્યુઆરીના રોજ સવારે લગભગ 11.05 વાગ્યે અમદાવાદ એરપોર્ટના સત્તાવાર ઈ-મેઈલ આઈડી dtm.amd@adani.com તેમજ અન્ય ફીડબેક આઈડી પર પ્રાપ્ત થયો હતો. મેઈલના વિષયમાં ‘BOMB Blast luggage Section’ જેવા ભયજનક શબ્દો લખવામાં આવ્યા હતા. ઈ-મેઈલના લખાણમાં ‘અમદાવાદ એરપોર્ટ ટાર્ગેટ પર છે’ તેવી સીધી ચેતવણી આપવામાં આવી હતી. સાથે સાથે ધાર્મિક અને રાજકીય સંદર્ભો ઉલ્લેખીને ગંભીર પરિણામો ભોગવવાની ધમકી પણ આપવામાં આવી હતી. આ ઈ-મેઈલમાં ખાલિસ્તાની વિચારધારાને લગતા ઉલ્લેખો હોવાથી મામલો વધુ સંવેદનશીલ બની ગયો હતો.

ઈમરજન્સી બેઠક બોલાવવામાં આવી

ધમકીભર્યો સંદેશ મળતાની સાથે જ એરપોર્ટના ચીફ સિક્યોરિટી ઓફિસર, અદાણી ગ્રુપના ઉચ્ચ અધિકારીઓ તેમજ સુરક્ષા એજન્સીઓ વચ્ચે તાત્કાલિક સંકલન કરવામાં આવ્યું હતું. સવારે લગભગ 11.20 વાગ્યે ‘બોમ્બ થ્રેટ એસેસમેન્ટ કમિટી’ ની ઈમરજન્સી બેઠક બોલાવવામાં આવી હતી. આશરે અડધો કલાક ચાલેલી આ બેઠક દરમિયાન એરપોર્ટની અંદર અને બહારની સ્થિતિ, મુસાફરોની સલામતી અને સંભવિત જોખમોની વિગતવાર સમીક્ષા કરવામાં આવી હતી.

જોખમ ટાળવા તમામ વિસ્તારોમાં વધારાની તપાસ શરૂ

ચકાસણી બાદ કમિટીએ આ ધમકીને ‘નોન-સ્પેસિફિક’ એટલે કે સ્પષ્ટ વિગતો વિહોણી હોવાનું જાહેર કર્યું હતું. તેમ છતાં, કોઈ પણ પ્રકારનું જોખમ ટાળવા માટે એરપોર્ટના તમામ વિસ્તારોમાં વધારાની તપાસ, બેગેજ ચેકિંગ અને સુરક્ષા દેખરેખ વધારવામાં આવી હતી. મુસાફરોને પણ સહકાર આપવા અપીલ કરવામાં આવી હતી.

અજાણ્યા શખ્સ સામે સત્તાવાર ફરિયાદ દાખલ

આ સમગ્ર મામલે અમદાવાદ એરપોર્ટના લેન્ડ સાઈડ સિક્યોરિટી ડ્યુટી મેનેજર રવિકાંત ભારદ્વાજે એરપોર્ટ પોલીસ સ્ટેશનમાં અજાણ્યા શખ્સ સામે સત્તાવાર ફરિયાદ નોંધાવી છે. પોલીસે આઈટી એક્ટ તેમજ ગુનાહિત ધમકી સંબંધિત કલમો હેઠળ કેસ નોંધીને તપાસ શરૂ કરી છે. ઈ-મેઈલ મોકલનારની ઓળખ અને લોકેશન જાણવા માટે સાયબર સેલની મદદ લેવામાં આવી રહી છે. તપાસ દરમિયાન પવનસિંહ ચૌહાણ અને અશોક રણવા જેવા અધિકારીઓની સાક્ષી તરીકે પૂછપરછ કરવામાં આવી રહી હોવાનું પણ જાણવા મળ્યું છે.