Silver Price Today: એક જ દિવસે ₹2,974નો ઉછાળો, ચાંદી ₹1.95 લાખ પાર

Silver Price Jump News: 2025માં સોના અને ચાંદીના ભાવોમાં ભારે ઉતાર-ચઢાવ વચ્ચે સપ્તાહના પ્રથમ કારોબારી દિવસ સોમવારે કિંમતી ધાતુઓમાં ફરી તેજી જોવા મળી છે. મલ્ટી કોમોડિટી એક્સચેન્જ (MCX) પર ચાંદીના ભાવ ખુલતાની સાથે જ લગભગ ₹3,000 પ્રતિ કિલોગ્રામ વધ્યા હતા, જેના કારણે બજારમાં ઉત્સાહ છવાઈ ગયો છે.

શુક્રવારના બંધ ભાવની સરખામણીમાં સોમવારે ચાંદી ₹2,974 ઉછળીને ₹1,95,825 પ્રતિ કિલોગ્રામ સુધી પહોંચી હતી. જોકે, આ તેજી છતાં ચાંદી હજી પણ તેની સર્વકાલીન ઊંચી સપાટીથી લગભગ ₹5,790 સસ્તી છે. રોકાણકારોની વધતી રસ અને ઔદ્યોગિક માગને કારણે ચાંદીના ભાવમાં સતત વધારો જોવા મળી રહ્યો છે.

ચાંદી સાથે સોનાના ભાવમાં પણ મજબૂતી નોંધાઈ છે. વૈશ્વિક બજારોમાંથી મળેલા સકારાત્મક સંકેતો અને સ્થાનિક માગને કારણે સોનાં તેની લાઈફ ટાઈમ હાઈથી માત્ર ₹404 દૂર છે. બજાર નિષ્ણાતો માને છે કે આવનારા દિવસોમાં સોનાં નવી ઊંચાઈ સર કરી શકે છે.

ચાંદીના ભાવ વધવાના મુખ્ય કારણોમાં ઔદ્યોગિક ઉપયોગમાં વધારો, વૈશ્વિક સપ્લાય ચેઇન પર દબાણ અને અમેરિકાની વેપાર નીતિઓનો ભય સામેલ છે. ખાસ કરીને સંભવિત ટેરિફના ડરથી અમેરિકન કંપનીઓ ચાંદીનો મોટો જથ્થો સંગ્રહ કરી રહી છે, જેના કારણે વૈશ્વિક બજારમાં અછત સર્જાઈ છે.

નિષ્ણાતોનું માનવું છે કે આવનારા કેટલાક મહિનાઓ સુધી ચાંદીના ભાવમાં તેજી યથાવત રહી શકે છે અને કિંમતી ધાતુઓ રોકાણકારો માટે સુરક્ષિત વિકલ્પ બની રહેશે.