ઓસ્ટ્રેલિયામાં સુનીલ ગાવસ્કરનું થયું અપમાન, ભારતીય દિગ્ગજે વ્યક્ત કર્યું દુ:ખ

ભારત અને ઓસ્ટ્રેલિયા વચ્ચે રમાતી પ્રતિષ્ઠિત બોર્ડર-ગાવસ્કર ટ્રોફીની શરૂઆત વર્ષ 1996માં થઈ હતી. તે સમયે માત્ર ભારતના ગાવસ્કર અને ઓસ્ટ્રેલિયાના એલન બોર્ડરે માત્ર ટેસ્ટ ક્રિકેટમાં 10000થી વધુ રન બનાવ્યા હતા. આ કારણોસર, આ ટ્રોફીનું નામ આ બે મહાન વ્યક્તિઓના નામ પર રાખવામાં આવ્યું હતું.

હવે ઓસ્ટ્રેલિયન ટીમે વર્ષ 2024-25માં યોજાયેલી BGT 3-1થી જીતી લીધી છે અને ભારતીય ટીમને કારમી હારનો સામનો કરવો પડ્યો છે. પરંતુ હવે ગાવસ્કરે ઓસ્ટ્રેલિયન ટીમને ટ્રોફી આપવા માટે ન બોલાવવા પર નારાજગી વ્યક્ત કરી છે. જે સમયે એલન બોર્ડરે ઓસ્ટ્રેલિયન ટીમને ટ્રોફી આપી હતી. તે સમયે ગાવસ્કર ક્રિકેટ ગ્રાઉન્ડમાં હાજર હતા. પરંતુ તેની અવગણના કરવામાં આવી હતી.

સુનીલ ગાવસ્કરે કહી આ વાત

સુનીલ ગાવસ્કરે કહ્યું કે મને એવોર્ડ સમારોહમાં જઈને આનંદ થયો હોત. છેવટે, આ બોર્ડર-ગાવસ્કર ટ્રોફી છે અને તે ઓસ્ટ્રેલિયા અને ભારત સાથે સંબંધિત છે. હું પોતે મેદાનમાં હતો. મને કોઈ પરવા નથી કે ટ્રોફી ઓસ્ટ્રેલિયાને આપવામાં આવી રહી છે. તેઓ વધુ સારું ક્રિકેટ રમ્યા અને જીત્યા. ઓકે. માત્ર એટલા માટે કે હું ભારતીય છું. મારા સારા મિત્ર એલન બોર્ડરની સાથે મળીને ટ્રોફી રજૂ કરીને મને આનંદ થયો હોત.

ક્રિકેટ ઓસ્ટ્રેલિયાએ પાછળથી પુષ્ટિ કરી હતી કે સુનીલ ગાવસ્કરને જાણ હતી કે જો ભારતીય ટીમે સિડની ટેસ્ટ જીતીને ટ્રોફી જાળવી રાખી હોત તો તેને ભારતીય કેપ્ટન જસપ્રિત બુમરાહને ટ્રોફી આપવા માટે બોલાવવામાં આવ્યો હોત. ક્રિકેટ ઓસ્ટ્રેલિયાના પ્રવક્તાએ એક નિવેદનમાં કહ્યું કે અમારું માનવું છે કે જો એલન બોર્ડર અને સુનીલ ગાવસ્કરને સ્ટેજ પર આમંત્રિત કરવામાં આવ્યા હોત તો તે વધુ સારું હોત.

ઓસ્ટ્રેલિયાએ 10 વર્ષ બાદ જીતી BGT ટ્રોફી

પાંચ ટેસ્ટ મેચની સિરીઝની પહેલી ટેસ્ટ મેચમાં ભારતીય ટીમે 295 રનથી મેચ જીતી લીધી હતી. પરંતુ આ પછી ઓસ્ટ્રેલિયાની ટીમે જોરદાર વાપસી કરી અને બીજી મેચ 10 વિકેટે જીતી લીધી. ત્યારબાદ ત્રીજી ટેસ્ટ મેચ વરસાદને કારણે ધોવાઈ ગઈ હતી અને ડ્રોમાં સમાપ્ત થઈ હતી. આ પછી ઓસ્ટ્રેલિયાએ મેલબોર્ન અને સિડનીમાં ટેસ્ટ મેચ જીતી અને સિરીઝ 3-1થી જીતી લીધી. ઓસ્ટ્રેલિયાએ 10 વર્ષ બાદ બોર્ડર-ગાવસ્કર ટ્રોફી પર કબજો કર્યો છે.