31 ડિસેમ્બરે સ્વિગી, ઝોમેટો, ઝેપ્ટો-બ્લિંકિટની હડતાલ, શું સમગ્ર ભારતમાં ઓનલાઇન ઓર્ડરની ડિલિવરી નહીં થાય?

India Delivery Workers Strike: ક્રિસમસના દિવસે યોજાયેલી હડતાલ બાદ હવે ગિગ અને પ્લેટફોર્મ વર્કર્સે 31 ડિસેમ્બરે, એટલે કે નવા વર્ષની પૂર્વસંધ્યાએ, સમગ્ર દેશમાં હડતાલ કરવાની જાહેરાત કરી છે. પગાર, સુરક્ષા અને કામકાજની પરિસ્થિતિઓ સુધારવાની માંગ સાથે સ્વિગી, ઝોમેટો, એમેઝોન, ફ્લિપકાર્ટ સહિતના પ્લેટફોર્મ સાથે જોડાયેલા કર્મચારીઓ વિરોધ પ્રદર્શન કરશે.

મળતી માહિતી અનુસાર, આ હડતાલમાં ફૂડ ડિલિવરી બોય, કેબ ડ્રાઇવર અને હોમ સર્વિસ સાથે સંકળાયેલા કર્મચારીઓ ભાગ લેશે. જેના કારણે ઈ-કોમર્સ અને ફૂડ ડિલિવરી સેવાઓ પર અસર થવાની શક્યતા છે. આ હડતાલ ઇન્ડિયન ફેડરેશન ઓફ એપ-બેઝ્ડ ટ્રાન્સપોર્ટ વર્કર્સ અને તેલંગાણા ગિગ એન્ડ પ્લેટફોર્મ વર્કર્સ યુનિયન દ્વારા બોલાવવામાં આવી છે.

આ પહેલા 25 ડિસેમ્બરે પણ ગિગ વર્કર્સે હડતાલ કરી હતી, જેની સૌથી વધુ અસર ગુરુગ્રામમાં જોવા મળી હતી. અનેક વિસ્તારોમાં ફૂડ ડિલિવરીમાં ભારે વિલંબ થયો હતો, જોકે દિલ્હી અને નોઇડામાં તેની અસર તુલનાત્મક રીતે ઓછી રહી હતી.

ગિગ વર્કર્સની મુખ્ય માંગણીઓમાં ન્યૂનતમ વેતન જેટલી આવકની ગેરંટી, પારદર્શક પગાર વ્યવસ્થા, દિવસમાં આઠ કલાક કામ અને ઓવરટાઈમનું ચૂકવણી, અકસ્માત અને બીમારી માટે વીમા તથા સામાજિક સુરક્ષાનો સમાવેશ થાય છે. કર્મચારીઓએ ‘10 મિનિટ ડિલિવરી’ જેવા મોડલ બંધ કરવાની પણ માંગ કરી છે, કારણ કે તે અસુરક્ષિત ડ્રાઇવિંગને પ્રોત્સાહન આપે છે.

આ ઉપરાંત, શિયાળામાં ધુમ્મસને કારણે રાત્રે વાહન ચલાવવું જોખમી બનતું હોવાથી, ધુમ્મસના સમયમાં રાત્રે 11 વાગ્યા પછી ડિલિવરી બંધ કરવાની પણ માંગ ઉઠાવવામાં આવી છે. અગાઉની હડતાલ દરમિયાન ગુરુગ્રામના અનેક વિસ્તારોમાં ડિલિવરી કર્મચારીઓએ એકત્ર થઈ વિરોધ કર્યો હતો અને કેટલાક કર્મચારીઓએ પ્લેટફોર્મ કંપનીઓ પર વિરોધમાં ભાગ લેવા બદલ કાર્યવાહી કરવાનો આરોપ પણ લગાવ્યો હતો.