- પેરિસ ઓલિમ્પિકમાં વિનેશ ફોગાટને ગેરલાયક ઠેરવવામાં આવી
- વિનેશ ફોગાટે સિલ્વર મેડલ અંગે CASમાં અપીલ દાખલ કરી હતી
- CASએ અચાનક વિનેશ ફોગાટની અરજીને ફગાવી દીધી હતી
ભારતની સ્ટાર રેસલર વિનેશ ફોગાટે પેરિસ ઓલિમ્પિકની ફાઈનલ પહેલા પોતાની ગેરલાયકાતનો મામલો કોર્ટ ઓફ આર્બિટ્રેશન ફોર સ્પોર્ટ્સ (CAS)માં ઉઠાવ્યો હતો. તેણે સિલ્વર મેડલ આપવાની માંગ કરી હતી. CASએ બુધવારે વિનેશની અપીલને ફગાવીને કરોડો ભારતીયોની આશાઓને મોટો ઝટકો આપ્યો છે. પહેલા એવું કહેવામાં આવી રહ્યું હતું કે વિનેશના કેસ પર નિર્ણય 16 ઓગસ્ટે આવી શકે છે, પરંતુ CASએ અચાનક વિનેશની અરજીને ફગાવી દીધી હતી.
મળતી માહિતી મુજબ, CASમાં તેની અપીલ નકારી કાઢવામાં આવી હોવા છતાં વિનેશ પાસે હજુ પણ એક રસ્તો છે. વિનેશ હવે CASમાં જ આ નિર્ણય સામે અપીલ કરી શકે છે. જેના પર ફરીથી સુનાવણી થઈ શકે છે. આ મામલો ફરી એક અપીલ દ્વારા ઉઠાવવામાં આવી શકે છે.
દેશના ટોચના વકીલો કેસ લડી રહ્યા છે
વિનેશ ફોગાટ કેસનો CASમાં દેશના ટોચના વકીલ હરીશ સાલ્વે અને વિદુષ્પત સિંઘાનિયા દ્વારા બચાવ કરવામાં આવી રહ્યો છે. તાજેતરમાં જ તેણે કોર્ટમાં વિનેશ ફોગટનો પક્ષ પણ રજૂ કર્યો હતો. પહેલા આ મામલે નિર્ણય 11 ઓગસ્ટે આવવાનો હતો, પરંતુ બાદમાં તેને 13 ઓગસ્ટ અને પછી 16 ઓગસ્ટ સુધી મુલતવી રાખવામાં આવ્યો હતો. વિનેશે તેના કેસમાં યુનાઈટેડ વર્લ્ડ રેસલિંગ (UWW) અને ઈન્ટરનેશનલ ઓલિમ્પિક કમિટી (IOC)ના નિર્ણયો વિરુદ્ધ અપીલ કરી હતી.
આ કેસમાં ભારતીય ઓલિમ્પિક એસોસિએશન (IOA)નું પ્રતિનિધિત્વ વરિષ્ઠ વકીલ હરીશ સાલ્વે દ્વારા કરવામાં આવ્યું હતું. વકીલોએ કોર્ટમાં દલીલ કરી હતી કે ફાઈનલ પહેલા વિનેશનું વજન 50 કિલોથી ઓછું હતું, પરંતુ કુદરતી રિકવરી પ્રક્રિયાને કારણે તેમાં 100 ગ્રામનો વધારો થયો છે. વિનેશે રમતના નિયમો તોડ્યા નથી કે કોઈ છેતરપિંડી કરી નથી.
CAS એ આ ખેલાડીને મેડલ એનાયત કર્યો
તમને જણાવી દઈએ કે CASએ અગાઉ એક એથ્લેટને મેડલ આપીને વિનેશની આશા જીવંત રાખી હતી. CAS એ પોતાનો નિર્ણય રોમાનિયન એથ્લેટ એના બાર્બોસુની તરફેણમાં આપ્યો હતો. બાર્બોસુની અપીલ પર, તેને ફરીથી બ્રોન્ઝ મેડલ આપવામાં આવ્યો. જોકે, વિનેશ અને બાર્બોસુનો મામલો અલગ છે. વિનેશના કિસ્સામાં, કુસ્તીની સર્વોચ્ચ સંસ્થા UWWએ નિયમોનું પાલન કર્યું હતું. અગાઉ UWWએ વિનેશના કેસમાં કહ્યું હતું કે બધું નિયમો મુજબ થયું છે. આવી સ્થિતિમાં તેઓ આ મામલે કંઈ કરી શકતા નથી.
શું છે સમગ્ર મામલો?
વિનેશ ફોગાટને પેરિસ ઓલિમ્પિકમાં 50 કિગ્રા ફ્રી સ્ટાઈલ કુસ્તીની ફાઈનલ પહેલા 100 ગ્રામ વધારે વજનના કારણે ગેરલાયક ઠેરવવામાં આવી હતી. જેના કારણે તે ફાઈનલ રમી શકી નહોતી. જો વિનેશે ફાઈનલ રમી હોત તો તે ગોલ્ડ જીતી શકી હોત, નહીં તો તેને ઓછામાં ઓછો સિલ્વર મેડલ તો મળ્યો જ હોત, પરંતુ ડિસક્વોલિફાય થયા બાદ તેનું મેડલ જીતવાનું સપનું ચકનાચૂર થઈ ગયું હતું. આ કેસના એક દિવસ પછી વિનેશે નિવૃત્તિની જાહેરાત પણ કરી હતી. વિનેશના એલિમિનેશન બાદ ક્યુબાના કુસ્તીબાજ યુસ્નેલિસ ગુઝમેન લોપેઝને ફાઇનલમાં રમવાની તક મળી. જેમાં તેને હાર બાદ સિલ્વર મળ્યો હતો. વિનેશે લોપેઝ સાથે સંયુક્ત રીતે સિલ્વર મેડલની માંગ કરી હતી. કુસ્તીબાજ 17 ઓગસ્ટે દિલ્હી પરત ફરી રહી છે.
