તિરુપતિ મંદિરના પ્રસાદમાં ફિશ ઓઈલ મળી આવ્યું હોવાની પુષ્ટિ થઈ છે. આંધ્રપ્રદેશના મુખ્યમંત્રી ચંદ્રબાબુ નાયડુએ તિરુપતિ મંદિર પર ઘીના બદલે પ્રાણીઓની ચરબી ભેળવવાનો આરોપ લગાવ્યો હતો. આ પછી સેમ્પલને પરીક્ષણ માટે મોકલવામાં આવ્યા હતા. હવે તપાસ બાદ રિપોર્ટ સામે આવ્યો છે જેમાં ફિશ ઓઈલ મળી આવ્યું હોવાનું કહેવાય છે. બુધવારે CMએ પૂર્વ મુખ્યમંત્રી જગન મોહન રેડ્ડી પર આરોપ લગાવ્યો હતો કે, જગન રાજ દરમિયાન તિરુપતિ મંદિરના પ્રસાદમાં ઘીની જગ્યાએ પ્રાણીઓની ચરબી ભેળવવામાં આવતી હતી.
CM ચંદ્રબાબુ નાયડુએ લગાવ્યો હતો આરોપ
એક કાર્યક્રમ દરમિયાન નાયડુએ કહ્યું હતું કે, પ્રસાદમાં ઘીની જગ્યાએ પ્રાણીઓની ચરબી અને નબળી ગુણવત્તાવાળી સામગ્રીનો ઉપયોગ કરવામાં આવ્યો હતો. તેમણે કહ્યું કે, અમે ખાતરી કરી છે કે પ્રસાદમાં અસલી ઘી, સ્વચ્છતા અને સારી ગુણવત્તાને ધ્યાનમાં રાખવામાં આવે.
જગન મોહન રેડ્ડીનો વળતો પ્રહાર
સીએમ નાયડુના આ નિવેદન પર જગન મોહન રેડ્ડીની પાર્ટી YSRCPએ પણ પ્રતિક્રિયા આપી છે. જેમાં કહેવામાં આવ્યું છે કે, ચંદ્રબાબુ નાયડુએ દિવ્ય મંદિર તિરુમાલાની પવિત્રતા અને કરોડો હિન્દુઓની આસ્થાને નુકસાન પહોંચાડીને મોટું પાપ કર્યું છે. ચંદ્રબાબુ નાયડુ દ્વારા તિરુમાલા પ્રસાદ પર કરવામાં આવેલી ટિપ્પણી નિંદાપાત્ર છે. મનુષ્ય તરીકે જન્મેલ કોઈ પણ વ્યક્તિ આવા શબ્દો બોલતો નથી કે આવા આક્ષેપો કરતો નથી. ફરી એકવાર સાબિત થઈ ગયું છે કે, ચંદ્રાબાબુ રાજનીતિ ખાતર કંઈ પણ ખોટું કરતાં ખચકાશે નહીં.
જગન મોહન રેડ્ડીએ કહ્યું કે, ભક્તોની શ્રદ્ધા મજબૂત કરવા હું અને મારો પરિવાર તિરુમાલા પ્રસાદના મામલામાં શપથ લેવા તૈયાર છીએ. શું ચંદ્રાબાબુ પણ પરિવાર સાથે શપથ લેવા તૈયાર છે?
નબળી ગુણવત્તાવાળી સામગ્રીથી લાડુ બનાવવાનો આરોપ
ઉલ્લેખનીય છે કે, તિરુપતિના શ્રી વેંકટેશ્વર મંદિરમાં તિરુપતિ લાડુ ચઢાવવામાં આવે છે, જેનું સંચાલન તિરુમાલા તિરુપતિ દેવસ્થાનમ (TTD) કરે છે. એનડીએ ધારાસભ્ય દળની બેઠકને સંબોધતા સીએમ નાયડુએ દાવો કર્યો હતો કે, તિરુમાલા લાડુ પણ નબળી ગુણવત્તાવાળી સામગ્રીમાંથી બનાવવામાં આવતો હતો. ઘીની જગ્યાએ પ્રાણીઓની ચરબીનો ઉપયોગ કરવામાં આવતો હતો. મુખ્યમંત્રીએ ભારપૂર્વક જણાવ્યું હતું કે, હવે શુદ્ધ ઘીનો ઉપયોગ કરવામાં આવી રહ્યો છે અને મંદિરની દરેક વસ્તુને સેનિટાઇઝ કરવામાં આવી છે, જેનાથી ગુણવત્તામાં સુધારો થયો છે.
