દેશમાં છેલ્લા ઘણા સમયથી ટ્રેનને ઉથલાવાના પ્રયાસ થઇ રહ્યા છે. ક્યારેક ટ્રેક પર લોખંડનો પાઇપ તો ક્યારેક પથ્થર, ક્યારેક એન્જિન જ છુટુ પડી જાય છે. યુપી, ગુજરાત, પશ્ચિમ બંગાળમાં છેલ્લા ઘણા સમયથી ટ્રેન પાટા પરથી ઉતરી જવાના કિસ્સા સામે આવી રહ્યા છે. ત્યારે આજે પણ યુપીના કાનપુરમાં ટ્રેન ઉથલાવાનો પ્રયાસ થયો હોવાનું સામે આવ્યું છે. આ એક જ મહિનામાં છઠ્ઠી ઘટના છે.
22 સપ્ટેમ્બર
22 સપ્ટેમ્બરે કાનપુરના પ્રેમપુર સ્ટેશન નજીક લૂપ લાઇન પર જેટીટીએન ગુડ્સ ટ્રેન ઊભી રહી હતી ત્યારે લોકો પાઇલટ દેવેન્દ્ર ગુપ્તાએ ટ્રેક પર સિલિન્ડર રાખેલો જોયો હતો. પાટા પર રાખેલા સિલિન્ડરને જોઈને લોકો પાયલોટે ટ્રેનની સ્પીડને કાબૂમાં લીધી અને તરત જ ટ્રેનને રોકી દીધી. ગુડ્ઝ ટ્રેન ચલાવતા લોકો પાયલોટની સમજદારીને કારણે મોટી દુર્ઘટના ટળી હતી.
21 સપ્ટેમ્બર
સુરતના કીમ રેલવે સ્ટેશન પાસે ટ્રેન ઉથલાવવાનું કાવતરૂ નિષ્ફળ ગયું હતું.અજાણ્યા શખ્સો દ્રારા આ કાવતરૂ કર્યું હોય તેવી માહિતી હાલ સામે આવી હતી. ફીશ પ્લેટ ખોલી નાખીને ટ્રેક પર મૂકી દેવામાં આવી હતી. .ત્યારે રેલવે સુપ્રિટેન્ડેન્ટ દ્રારા હાલ ટ્રેન વ્યવહાર રોકવામાં આવ્યો હતો અને થોડાક કલાકોમાં તેને ફરીથી પૂર્વવત કરવામાં આવ્યો હતો. સુરતના કીમ રેલવે સ્ટેશન પાસે ટ્રેન ઉથલાવવાનો પ્રયાસ અજાણ્યા શખ્સો દ્રારા કરવામાં આવ્યો હતો.ત્યારે યુપી લાઈન ટ્રેકની ફિશ પ્લેટ અને કડીઓ કાઢી નાખવામાં આવી હતી.પરંતુ રેલવે ટ્રેકના કર્મચારીને આ બાબતની જાણ થતા તેમણે તરત જ ઘટના સ્થળે જઈને રેલવેના ઉચ્ચ અધિકારીઓને જાણ કરી હતી.મહત્વનું એ છે કે,એ સમયે કોઈ ટ્રેન આવતી કે જતી ન હોવાથી મોટી જાનહાની ટળી હતી.બીજી તરફ રેલવે પોલીસે સમગ્ર ઘટનાને લઈ તપાસ હાથધરી હતી.
20 સપ્ટેમ્બર
મથુરા નજીક માલગાડીના 25 વેગન પાટા પરથી ઉતરી ગયા હતા અને અનેક વેગન એકબીજા સાથે અથડાઈ અને નુકસાન થયું હતું. રાત્રે થયેલા આ દુર્ઘટનાને કારણે મથુરા પલવલ રેલ્વે માર્ગ સંપૂર્ણપણે ખોરવાઈ ગયો હતો. હવે રેલવે સૂત્રોએ આ ઘટના વિશે મોટી માહિતી શેર કરી છે. મથુરા ટ્રેન દુર્ઘટના પાછળ આતંકવાદી ષડયંત્ર હોવાની આશંકા વ્યક્ત કરી હતી. મથુરાના વૃંદાવન રોડ સ્ટેશન અને અજાઈ વચ્ચે માલગાડીના 26 ડબ્બા પાટા પરથી ઉતરી ગયા હતા. આ પછી દિલ્હી-મુંબઈ રેલ્વે રૂટ ખરાબ રીતે પ્રભાવિત થયો હતો. હવે રેલવે સૂત્રોએ કહ્યું છે કે મથુરામાં જે રીતે માલગાડી પાટા પરથી ઉતરી ગઈ હતી તેની પાછળ કોઈ ષડયંત્ર હોઈ શકે છે.
19 સપ્ટેમ્બર
કાનપુર, ગાઝીપુર, દેવરિયા બાદ હવે રામપુર જિલ્લામાં ટ્રેન ઉથલાવવાનું ષડયંત્ર રચવામાં આવ્યું હતું. ઉત્તરાખંડ સરહદને અડીને આવેલી વસાહતની પાછળથી પસાર થતી રેલવે લાઇન પર એક જૂનો 7 મીટર ઊંચો ટેલિકોમ થાંભલો મૂકેલો જોવા મળ્યો હતો. તે દરમિયાન ત્યાંથી દેહરાદૂન (દૂન) એક્સપ્રેસ પસાર થઈ રહી હતી. રેલવે ટ્રેક પર પોલ જોઈને ટ્રેનના લોકો પાયલટે ઈમરજન્સી બ્રેક લગાવીને મોટી દુર્ઘટના ટળી હતી. રેલવે ટ્રેક પર થાંભલો મુકાયો હોવાની માહિતી મળતાં જ જીઆરપી અને પોલીસ પ્રશાસનના અધિકારીઓ ઘટનાસ્થળે પહોંચી ગયા હતા. અધિકારીઓએ પાટા પરથી થાંભલો હટાવ્યો હતો ત્યારબાદ ટ્રેન આગળ વધી હતી.
10 સપ્ટેમ્બર
10 સપ્ટેમ્બરના રોજ રાજસ્થાનના અજમેરમાં માલસામાન ટ્રેનને ઉથલાવી દેવાનું ષડયંત્ર પ્રકાશમાં આવ્યું હતું. અજમેરના સરથાણામાં રેલવે ટ્રેક પર આશરે 70 કિલો વજનના સિમેન્ટના બે બ્લોક મૂકીને માલગાડીને પાટા પરથી ઉતારવાનો પ્રયાસ કરવામાં આવ્યો હતો. . સદનસીબે ટ્રેન સિમેન્ટના બ્લોક તોડીને આગળ પસાર થઈ હતી અને કોઈ મોટી દુર્ઘટના થઈ ન હતી. આ અંગે પોલીસ સ્ટેશનમાં FIR દાખલ કરવામાં આવી છે.
8 સપ્ટેમ્બર
ગત 8 સપ્ટેમ્બરે રાત્રે લગભગ 8.30 વાગ્યે કાનપુરમાં કાલિંદી એક્સપ્રેસ ટ્રેનમાં બ્લાસ્ટ કરવાના ષડયંત્રનો ખુલાસો થયો હતો. પ્રયાગરાજથી ભિવાની જઈ રહેલી કાલિંદી એક્સપ્રેસ રેલવે ટ્રેક પર રાખવામાં આવેલા એલપીજી ગેસથી ભરેલા સિલિન્ડર સાથે અથડાઈ હતી. જે બાદ જોરદાર અવાજ પણ થયો હતો. એટલું જ નહીં, સ્થળ પરથી પેટ્રોલ ભરેલી બોટલ અને ગનપાઉડર સાથે માચીસની લાકડીઓ પણ મળી આવી હતી. જે બાદ આ ઘટનાની આતંકવાદી ષડયંત્રના એંગલથી તપાસ કરવામાં આવી રહી છે.
17 ઑગષ્ટ
17મી ઓગસ્ટની રાત્રે કાનપુર-ઝાંસી રૂટની સાબરમતી એક્સપ્રેસ (19168)ના 22 ડબ્બા એન્જિન સહિત પાટા પરથી ઉતરી ગયા હતા. આ ટ્રેન વારાણસીથી અમદાવાદ જઈ રહી હતી. અકસ્માતનો ભોગ બનેલી ટ્રેનના ડ્રાઈવરે જણાવ્યું હતું કે એન્જિન સાથે બોલ્ડર અથડાવાને કારણે આ અકસ્માત થયો હતો કારણ કે એન્જિન સાથે બોલ્ડર અથડાતાં જ એન્જિનનો ગૌરક્ષક ખરાબ રીતે વાંકી ગયો હતો. આ અકસ્માતની તપાસ કરવામાં આવી રહી છે.
મહત્વનું છે કે વિવિધ ટ્રેન દુર્ઘટના મામલે આતંકી ષડયંત્ર હોવાની આશંકા સેવવામાં આવી રહી છે. આ મામલે તપાસ પણ તેજ કરવામાં આવી રહી છે. મળતી માહિતી મુજબ NIA પર તપાસમાં જોડાઇ છે. પરંતુ ટ્રેનને પાટા પરથી ઉતારવા માટેનું ષડયંત્ર યથાવત જ જોવા મળી રહ્યુ છે. એક બાદ એક ઘટનાઓ સામે આવી રહી છે ત્યારે આ મામલે કડક તપાસ થાય અને આમ કરનારા અસામાજિત તત્વો ઝડપાઇ જાય અને તેમણે બરાબરનું પાઠ ભણાવવામાં આવે તે અનિવાર્ય થઇ પડે છે.
