હાલમાં ઇસ્કોન ચર્ચામાં છે. કારણ કે પાડોશી દેશ બાંગ્લાદેશમાં સૌથી મોટો ચહેરો ગણાતા ચિન્મય કૃષ્ણ દાસ બ્રહ્નચારીની ધરપકડ થઇ છે. 25 નવેમ્બરે તેઓ ઢાકાથી ચટગામ જઇ રહ્યા હતા તે દરમિયાન ધરપકડ કરવામાં આવી. બાંગ્લાદેશી પોલીસની આ કામગીરી બાદ હિંદુઓમાં રોષ ચરમસીમાએ પહોંચ્યો છે. રોડ રસ્તા પર ઉતરીને વિરોધ પ્રદર્શન કરી રહ્યા છે.
ભારતે વ્યક્ત કરી ચિંતા
ભારતે ચિન્મય દાસની ધરપકડ પર ચિંતા વ્યક્ત કરી છે. વિદેશ મંત્રાલયે કહ્યું છે કે અમે ચિન્મય કૃષ્ણ દાસની ધરપકડથી ચિંતિત છીએ. બાંગ્લાદેશમાં હિંદુઓ અને અન્ય લઘુમતીઓ પર થયેલા અનેક હુમલાઓ બાદ આ ઘટના બની છે. વિદેશ મંત્રાલયે પણ દાસની ધરપકડ સામે શાંતિપૂર્વક વિરોધ કરી રહેલા લઘુમતીઓ પરના હુમલા અંગે ચિંતા વ્યક્ત કરી હતી.
ચિન્મય દાસ પર શું છે આરોપ?
ચિન્મય કૃષ્ણ દાસ બાંગ્લાદેશમાં હિંદુઓના અધિકારોની રક્ષા માટે અવાજ ઉઠાવી રહ્યા છે. તેમના પર સરકાર વિરુદ્ધ બોલવાનો અને લઘુમતી અધિકારોની હિમાયત કરવાનો આરોપ છે. ચિત્તગોંગના કોતવાલી પોલીસ સ્ટેશનમાં 30 ઓક્ટોબરે ચિન્મય દાસ સહિત 19 લોકો વિરુદ્ધ કેસ નોંધવામાં આવ્યો હતો. તેમની પર હિંદુ સમુદાયની એક રેલી દરમિયાન ચિટગોંગના ન્યૂ માર્કેટ વિસ્તારમાં બાંગ્લાદેશના રાષ્ટ્રધ્વજનું અપમાન કરવાનો આરોપ હતો.
ચિન્મય દાસ બાંગ્લાદેશમાં ઈસ્કોન સાથે હિન્દુઓનો સૌથી મોટો ચહેરો છે. તેમણે ત્યાં ઈસ્કોનનો ઘણો પ્રચાર અને પ્રસાર કર્યો. આ બધું ત્યારે થઈ રહ્યું છે જ્યારે બાંગ્લાદેશમાં હિન્દુઓની વસ્તી ઘટી રહી છે. આવા સમયે મોહમ્મદ યુનુસને બાંગ્લાદેશી હિંદુઓમાં જાગૃતિ લાવવાના ઇસ્કોનના પ્રયાસો પસંદ નથી. તેઓ સત્તામાં આવ્યા બાદ હિંદુઓ પર હુમલા વધી રહ્યા છે. . ખાસ
કરીને ઇસ્કોન તેમના નિશાને છે જેની પર પ્રતિબંધ મૂકવાની પણ માગ ઉઠી છે.
બાંગ્લાદેશમાં શા માટે ઇસ્કોન ટાર્ગેટ પર કેમ ?
- ઈસ્કોન મંદિરો માત્ર બાંગ્લાદેશમાં જ નહીં પરંતુ પાકિસ્તાનમાં પણ છે. પરંતુ પાકિસ્તાનમાં એટલુ ટાર્ગેટ કરવામાં નથી આવતુ જેટલુ બાંગ્લાદેશમાં કરવામાં આવે છે. એક સમયે બાંગ્લાદેશની વસ્તીમાં લગભગ 20% હિંદુઓ હતા, પરંતુ હવે તેમની સંખ્યા ઘટીને 9% થી પણ ઓછી થઈ ગઈ છે. દાયકાઓ સુધી તેમને શેખ હસીનાની અવામી લીગ પાર્ટીનું સમર્થન મળતું રહ્યું, પરંતુ સત્તા પરિવર્તનની સાથે જ હિંદુઓ માટે પણ ખરાબ દિવસો શરૂ થયા.
- સમુદાયના નેતાઓ દાવો કરે છે કે બાંગ્લાદેશમાં લઘુમતીઓ હંમેશા ઉપદ્વવીઓ અને તોફાનીઓનો સોફ્ટ ટાર્ગેટ હોય છે. બીબીસીના અહેવાલ મુજબ જાન્યુઆરી 2013 થી સપ્ટેમ્બર 2021 વચ્ચે હિન્દુ સમુદાય પર ઓછામાં ઓછા 3,679 હુમલા થયા છે.
- જ્યારથી શેખ હસીના સત્તામાંથી બહાર થયા છે તે પછીથી હિન્દુઓ ગંભીર પરિસ્થિતિનો સામનો કરી રહ્યા છે. યુનુસની આગેવાની હેઠળની વચગાળાની સરકાર લઘુમતીઓ તેમજ હસીનાની પાર્ટીના કાર્યકરો પર હુમલા રોકવામાં નિષ્ફળ રહી છે. તાજેતરમાં બાંગ્લાદેશને ઇસ્લામિક રાજ્ય જાહેર કરવાની માંગ પણ ઉઠી હતી. દેશના એટર્ની જનરલ એમડી અસદુઝમાને કોર્ટમાં કહ્યું હતું કે સમાજવાદ અને ધર્મનિરપેક્ષતા એવા દેશની વાસ્તવિકતાઓને પ્રતિબિંબિત કરતા નથી જ્યાં 90% વસ્તી મુસ્લિમ છે.
- ઇસ્કોન અને ચિન્મય દાસ બાંગ્લાદેશમાં હિન્દુઓ વિરુદ્ધ કાર્યવાહી કરી રહ્યા છે. ઇસ્કોન પર બાંગ્લાદેશની રાજનીતિમાં હસ્તક્ષેપ કરવાનો આરોપ છે. આ ઉપરાંત એવું પણ કહેવામાં આવ્યું હતું કે ઇસ્કોન બાંગ્લાદેશમાં હિંદુઓ અસુરક્ષિત હોવાનું નરેટીવ બનાવી રહ્યા છે.
- બાંગ્લાદેશમાં ઇસ્કોનની લોકપ્રિયતા સતત વધી રહી છે. અહીં તેના ફોલોઅર્સ વધી રહ્યા છે. ઇસ્કોન ઘણા હિંદુ તહેવારોમાં સક્રિયપણે ભાગ લે છે. ખાસ કરીને જન્માષ્ટમીમાં. તે જરૂરિયાતમંદોને રાશન પણ આપે છે. યુનુસ સરકારને ઈસ્કોનનો આ પ્રચાર અને વિસ્તરણ પસંદ નથી અને ગુસ્સામાં આવીને તેઓ ઇસ્કોન વિરુદ્ધ પગલા ભરી રહ્યા છે.
ઇસ્કોન શું છે ?
ઇસ્કોન એક એવી સંસ્થા છે જે લોકોને ભગવાન કૃષ્ણ વિશે જાગૃત કરે છે. તેઓ ભગવત ગીતાનો સંદેશ દરેક ઘર સુધી પહોંચાડવાનું કામ કરે છે. સ્વામી શ્રી પ્રભુપાદે 11 જુલાઈ, 1966ના રોજ તેની સ્થાપના કરી હતી. વિશ્વભરમાં તેના 10 લાખથી વધુ ફોલોઅર્સ છે. સામાન્ય લોકોમાં તેને હરે કૃષ્ણ હરે રામ મંદિર તરીકે ઓળખવામાં આવે છે.
માત્ર ભારતમાં જ નહીં પરંતુ અમેરિકા, રશિયા, બ્રિટન, પાકિસ્તાન જેવા દેશોમાં પણ તેના મંદિરો છે. સમગ્ર વિશ્વમાં ઇસ્કોનના 108 મંદિરો છે. તેના ઘણા કેન્દ્રો પણ છે. એકલા બાંગ્લાદેશની વાત કરીએ તો ઢાકા, રાજશાહી, ચિત્તાગોંગ, સિલ્હેટ, રંગપુર, ખુલના, બરીશાલ, મૈમનસિંહમાં ઇસ્કોન ટેમ્પલ આવેલા છે.
Source link
