સૈયદ મુશ્તાક અલી ટૂર્નામેન્ટમાં અજિંક્ય રહાણેનું બેટ શાનદાર પ્રદર્શન કરી રહ્યું છે. રહાણેએ આંધ્રપ્રદેશ સામે રમાયેલી મેચમાં બેટથી ધૂમ મચાવી છે. રહાણે તેની સદી ચૂકી ગયો હતો, પરંતુ તેની જોરદાર ઈનિંગ્સના કારણે મુંબઈએ 230 રનના લક્ષ્યનો પીછો કર્યો હતો. પોતાની વિસ્ફોટક ઈનિંગ દરમિયાન ટીમ ઈન્ડિયાના બેટ્સમેને 9 ચોગ્ગા અને 4 ગગનચુંબી છગ્ગા ફટકાર્યા હતા. IPL 2025ની તાજેતરમાં યોજાયેલા મેગા ઓક્શનમાં કોલકાતા નાઈટ રાઈડર્સ દ્વારા રહાણેને તેમની ટીમમાં સામેલ કરવામાં આવ્યો છે.
અજિંક્ય રહાણેએ મચાવી ધૂમ
230 રનના લક્ષ્યનો પીછો કરવા ઉતરેલી મુંબઈની ટીમને અજિંક્ય રહાણે અને પૃથ્વી શોએ શાનદાર શરૂઆત અપાવી હતી. બંનેએ સાથે મળીને પ્રથમ વિકેટ માટે 51 રન જોડ્યા હતા. શોએ માત્ર 15 બોલમાં 34 રનની ઝડપી ઈનિંગ રમી હતી. શો પેવેલિયન પરત ફર્યા બાદ રહાણેને કેપ્ટન શ્રેયસ અય્યરનો સાથ મળ્યો હતો. અય્યરે આઉટ થતા પહેલા 11 બોલમાં 25 રન બનાવ્યા હતા.
સૂર્યકુમાર યાદવ ફ્લોપ થયો હતો અને માત્ર ચાર રન બનાવીને આઉટ થયો હતો. પરંતુ રહાણે એક છેડે ઊભો રહ્યો. રહાણેએ 23 બોલમાં પોતાની અડધી સદી પૂરી કરી હતી. પચાસ ફટકાર્યા બાદ રહાણેએ જોરદાર ઈનિંગ રમી. 175ના સ્ટ્રાઈક રેટથી રમતા રહાણેએ 54 બોલમાં 95 રનની શાનદાર ઈનિંગ રમી હતી. આ ઈનિંગ દરમિયાન તેને 9 ફોર અને 4 સિક્સર ફટકારી હતી.
મુંબઈને મળી ક્વાર્ટર ફાઈનલની ટિકિટ
પ્રથમ બેટિંગ કરતા આંધ્રપ્રદેશે 20 ઓવરમાં 4 વિકેટ ગુમાવીને 229 રન બનાવ્યા હતા. ટીમ વતી શ્રીકર ભરતે શાનદાર બેટિંગ કરી હતી અને 53 બોલમાં 93 રનની શાનદાર ઇનિંગ રમી હતી. આ સાથે જ કેપ્ટન રિકી ભુઈએ 219ના સ્ટ્રાઈક રેટથી રમતા 31 બોલમાં 68 રન બનાવ્યા હતા. રહાણે સિવાય શિવમ દુબેએ વિસ્ફોટક બેટિંગ કરતા 18 બોલમાં 34 રનની વિસ્ફોટક ઇનિંગ રમી હતી. તે જ સમયે, છેલ્લી ઓવરોમાં સૂર્યાંશ શેડગેએ માત્ર 8 બોલમાં અણનમ 30 રન ફટકારીને મુંબઈને 4 વિકેટે વિજય અપાવ્યો હતો. આ જીત સાથે મુંબઈએ ક્વાર્ટર ફાઈનલની ટિકિટ બુક કરી લીધી છે.
