Union Budget 2025: 1 ફેબ્રુઆરીથી બદલાઇ જશે આ વસ્તુઓ,ખીસ્સા પર પડશે અસર

દેશનું સામાન્ય બજેટ 1 ફેબ્રુઆરીએ રજૂ થવા જઈ રહ્યું છે. નાણામંત્રી નિર્મલા સીતારમણ તેને રજૂ કરશે. બજેટ સાથે ઘણા મહત્વપૂર્ણ ફેરફારો થવાના છે. જેની સીધી અસર તમારા ખિસ્સા પર પડી શકે છે. ખાસ કરીને નાણાકીય બાબતો સાથે જોડાયેલા આ ફેરફારો સામાન્ય માણસના ખર્ચમાં પરિવર્તન લાવશે. ચાલો જાણીએ 1 ફેબ્રુઆરીથી અમલમાં આવતા ફેરફારો વિશે.

LPG સિલિન્ડરના ભાવમાં ફેરફાર

LPG સિલિન્ડરની કિંમતો દર મહિનાની 1લી તારીખે અપડેટ કરવામાં આવે છે. ઓઇલ માર્કેટિંગ કંપનીઓ સુધારેલા ભાવ જાહેર કરે છે. જેની અસર સામાન્ય જનતાને થાય છે. હવે જોવાનું એ રહેશે કે 1લી ફેબ્રુઆરીએ બજેટના દિવસે LPG ગેસના ભાવ વધે છે કે ઘટે છે. જાન્યુઆરીમાં કેટલાક ફેરફારો બાદ 19 કિલોના કોમર્શિયલ સિલિન્ડરની કિંમતમાં ઘટાડો કરવામાં આવ્યો હતો.

UPI વ્યવહારો સંબંધિત નવા નિયમો

નેશનલ પેમેન્ટ્સ કોર્પોરેશન ઓફ ઈન્ડિયા (NPCI) એ UPI હેઠળ કેટલાક વ્યવહારોમાં ફેરફાર કરવાનો નિર્ણય લીધો છે. આ નવા નિયમો હેઠળ, જે 1 ફેબ્રુઆરી, 2025 થી અમલમાં આવશે, ખાસ પ્રકારના અક્ષરો ધરાવતા UPI ટ્રાન્ઝેક્શન ID સ્વીકારવામાં આવશે નહીં. હવે માત્ર આલ્ફા-ન્યુમેરિક (અક્ષરો અને સંખ્યાઓ) ટ્રાન્ઝેક્શન ID માન્ય રહેશે. જો કોઈપણ વ્યવહારમાં અન્ય કોઈપણ પ્રકારનું ID હોય તો તે નિષ્ફળ જશે.

મારુતિ સુઝુકીની કારના ભાવમાં વધારો

વધતી કિંમતોને ધ્યાનમાં રાખીને, દેશની અગ્રણી કાર નિર્માતા કંપની મારુતિ સુઝુકીએ 1 ફેબ્રુઆરીથી તેના વિવિધ મોડલની કિંમતોમાં 32,500 રૂપિયા સુધીનો વધારો કરવાની જાહેરાત કરી છે. જે મોડલ્સની કિંમતો બદલાશે. તેમાં Alto K10, S-Presso, Celerio, Wagon R, Swift, DZire, Brezza, Ertiga, Ignis, Baleno, Ciaz, XL6, FrontX, Invicto, Jimny અને Grand Vitaraનો સમાવેશ થાય છે.

બેંકિંગ નિયમોમાં ફેરફાર

કોટક મહિન્દ્રા બેંકે તેની કેટલીક સેવાઓ અને શુલ્કમાં ફેરફારની જાહેરાત કરી છે. આ 1 ફેબ્રુઆરી 2025 થી અમલમાં આવશે. આમાં મુખ્ય ફેરફારો એટીએમ વ્યવહારોની મફત મર્યાદામાં ઘટાડો અને અન્ય બેંકિંગ સેવાઓના શુલ્કમાં વધારો થઈ શકે છે. આ ફેરફારો બેંકના ગ્રાહકોને અસર કરશે અને તેઓએ આ નવા ફી માળખા સાથે તેમની બેંકિંગ સેવાઓનો ઉપયોગ કરવો પડશે.

ATFના ભાવમાં ફેરફાર

1 ફેબ્રુઆરીથી એર ટર્બાઇન ફ્યુઅલ (ATF)ની કિંમતમાં ફેરફાર થઈ શકે છે. ઓઇલ માર્કેટિંગ કંપનીઓ દર મહિનાની પહેલી તારીખે એટીએફના ભાવમાં સુધારો કરે છે. જો આ વખતે ભાવ વધશે તો તેની સીધી અસર હવાઈ પ્રવાસીઓના ખિસ્સા પર પડશે.