Reliance Google Partnership : જિઓ યુઝર્સને મળશે જેમિની 2.5 પ્રો મોડલ 18 મહિના સુધી મફત

રિલાયન્સ ઇન્ડસ્ટ્રીઝ લિમિટેડ (RIL), તેની કંપની રિલાયન્સ ઇન્ટેલિજન્સ લિમિટેડ દ્વારા, ભારતમાં AI અપનાવવાની પ્રક્રિયાને વેગ આપવા માટે Google સાથે વ્યૂહાત્મક ભાગીદારી કરી છે. આ ભાગીદારી રિલાયન્સના “AI for All” વિઝનને આગળ વધારવા અને દેશમાં ડિજિટલ અને AI ઇકોસિસ્ટમને મજબૂત બનાવવા તરફ એક મોટું પગલું છે.

• ગૂગલ એઆઈ પ્રોની મફત ઍક્સેસ

ભાગીદારીના ભાગ રૂપે, ગૂગલ અને રિલાયન્સ ઇન્ટેલિજન્સ જિયો યુઝર્સને ગૂગલ એઆઈ પ્રોની મફત ઍક્સેસ પ્રદાન કરશે. આ ઓફર 18 મહિના માટે મફત રહેશે અને તેની કિંમત પ્રતિ યુઝર આશરે ₹35,100 છે. યુઝર્સને જેમિની 2.5 પ્રો મોડેલ, નેનો બનાના અને વીઓ 3.1 જેવા અદ્યતન છબી અને વિડિઓ જનરેશન ટૂલ્સની ઍક્સેસ પણ મળશે.

• વિદ્યાર્થીઓ માટે ખાસ

આ યોજનામાં Notebook LMની વિસ્તૃત ઍક્સેસનો સમાવેશ થાય છે, જે ખાસ કરીને વિદ્યાર્થીઓ અને સંશોધકો માટે ઉપયોગી થશે. દરેક યુઝર્સને 2TB Google ક્લાઉડ સ્ટોરેજ મળશે. આ ઓફર MyJio એપ દ્વારા સક્રિય કરી શકાય છે. શરૂઆતમાં આ સુવિધા 18 થી 25 વર્ષની વયના લોકો માટે ઉપલબ્ધ હશે જેઓ અમર્યાદિત 5G પ્લાન પર છે, ત્યારબાદ તે દેશભરના તમામ Jio ગ્રાહકો માટે ઉપલબ્ધ થશે.

• માતૃભાષામાં AI સાધનોની ઍક્સેસ

આ ભાગીદારી દ્વારા, રિલાયન્સ અને ગુગલ ભારતની સાંસ્કૃતિક અને ભાષાકીય વિવિધતાને અનુરૂપ સ્થાનિક AI અનુભવો બનાવવા માટે કામ કરશે. ધ્યેય ભારતના યુવાનોને તેમની માતૃભાષામાં AI સાધનોની ઍક્સેસ આપવાનો છે, જેથી તેઓ અભ્યાસ, કાર્ય અને ક્રિએટિવ પ્રોજેક્ટ્સ માટે તેનો ઉપયોગ કરી શકે.

• AI ઈન્ફ્રાસ્ટ્રક્ચરને પ્રોત્સાહન મળશે

ગ્રાહકોના ફાયદાઓ ઉપરાંત રિલાયન્સ ઇન્ટેલિજન્સ હવે ગૂગલ ક્લાઉડનું વ્યૂહાત્મક ભાગીદાર બની ગયું છે, જે ભારતમાં ટેન્સર પ્રોસેસિંગ યુનિટ્સ (TPUs) જેવા અદ્યતન AI હાર્ડવેર એક્સિલરેટર્સની ઍક્સેસ પ્રદાન કરવાની યોજના ધરાવે છે.

આનાથી ભારતીય કંપનીઓને મોટા AI મોડેલોને તાલીમ આપવામાં અને હાઇ-સ્પીડ ડેટા પ્રોસેસિંગ કરવામાં મદદ મળશે. રિલાયન્સનું આ પગલું ભારતમાં મલ્ટી-ગીગાવોટ, સ્વચ્છ ઉર્જા-સંચાલિત કમ્પ્યુટ ઈન્ફ્રાસ્ટ્રક્ચર બનાવવાના તેના વિઝન સાથે સુસંગત છે.

આ ભાગીદારી દેશની AI કરોડરજ્જુને મજબૂત બનાવશે અને ભારતને વૈશ્વિક AI હબ તરીકે સ્થાપિત કરવાના સરકારના ધ્યેયને મજબૂત બનાવશે.