અદાણી અને અંબાણીને લઇને બ્લૂમબર્ગની રિપોર્ટમાં મોટો ખુલાસો

ભારતના સૌથી અમીર વ્યક્તિ સાથે જોડાયેલા એક ચોંકાવનારા સમાચાર સામે આવ્યા છે. એશિયાના સૌથી ધનિક વ્યક્તિ મુકેશ અંબાણીનું નામ 100 અબજ ડોલર એટલે કે 8 લાખ 49 હજાર કરોડ રૂપિયાની ક્લબમાંથી બહાર થઈ ગયું છે. બ્લૂમબર્ગના રિપોર્ટ અનુસાર, રિલાયન્સ ઈન્ડસ્ટ્રીઝના ચેરમેન મુકેશ અંબાણી અને અદાણી ગ્રુપના ચેરમેન ગૌતમ અદાણી આ વર્ષ માટે બ્લૂમબર્ગના $100 બિલિયન ક્લબમાંથી બહાર થઈ ગયા છે. તાજેતરના સમયમાં ઉભી થયેલી ધંધાકીય સમસ્યાઓના કારણે આ બંને ઉદ્યોગપતિઓની સંપત્તિમાં ઘટાડો થયો છે.

આટલો મોટો ઘટાડો શા માટે થયો?

ભારતના ટોચના 20 અબજોપતિઓએ 2024ની શરૂઆતથી અત્યાર સુધીમાં $67.3 બિલિયનનો વધારો હાંસલ કર્યો છે. જેમાં આઈટી ટાયકૂન શિવ નાદરને સૌથી વધુ 10.8 બિલિયન ડોલર અને સાવિત્રી જિંદાલને સૌથી વધુ 10.1 બિલિયન ડોલરનો નફો જોવા મળ્યો છે.

મુકેશ અંબાણીની અંગત સંપત્તિમાં ઘટાડાનું કારણ તેમની કંપનીના રિટેલ અને એનર્જી વિભાગનું નબળું પ્રદર્શન છે. જુલાઈ 2024માં જ્યારે તેમના પુત્ર અનંતના લગ્ન થયા ત્યારે તેમની સંપત્તિ 120.8 બિલિયન ડૉલર એટલે કે 10 લાખ કરોડ રૂપિયાથી વધુ હતી, જે હવે ઘટીને 13 ડિસેમ્બર 2024 સુધીમાં $96.7 બિલિયન એટલે કે 8 લાખ 21 હજાર કરોડ થઈ ગઈ છે.

આ ઘટાડો કંપનીનું વધતું દેવું અને વ્યવસાયિક મુશ્કેલીઓને લઈને રોકાણકારોમાં ચિંતાનું કારણ બની ગયો છે.

ગૌતમ અદાણી માટે આ સમાચાર મુસીબત બની ગયા

ગૌતમ અદાણી માટે સ્થિતિ વધુ ગંભીર છે. યુએસ ડિપાર્ટમેન્ટ ઓફ જસ્ટિસ (ડીઓજે) દ્વારા તપાસ તેમના જૂથ માટે એક મોટો પડકાર બની ગઈ છે, જે તેમના વ્યવસાય સામ્રાજ્યની પ્રગતિને અટકાવી શકે છે. હિન્ડેનબર્ગ રિસર્ચ રિપોર્ટ અને છેતરપિંડીના આરોપોએ અદાણીને મુશ્કેલીમાં મૂક્યા છે, જેના કારણે તેમની સંપત્તિ જૂન 2024માં $122.3 બિલિયનથી ઘટીને નવેમ્બરમાં $82.1 બિલિયન થઈ ગઈ છે, એટલે કે લગભગ 7 લાખ કરોડ રૂપિયા થઇ ગઇ છે. આ કારણે અદાણી હવે બ્લૂમબર્ગની “સેન્ટીબિલિયોનેર ક્લબ”માં નથી, જે વ્યક્તિઓ આ ક્લબમાં છે તેમની નેટવર્થ $100 બિલિયનથી વધુ છે.

શું કહે છે આ રિપોર્ટ?

બ્લૂમબર્ગના રિપોર્ટ અનુસાર ભારતની મોટી ટેલિકોમ કંપનીઓ માટે પણ સંભવિત ખતરો ઉભો થઈ શકે છે. અમેરિકાના ચૂંટાયેલા રાષ્ટ્રપતિ ડોનાલ્ડ ટ્રમ્પના વહીવટીતંત્ર અને એલોન મસ્કની કંપની સ્ટારલિંકનો ભારતમાં સેટેલાઇટ બ્રોડબેન્ડ સેવામાં પ્રવેશ ભારતીય ટેલિકોમ કંપનીઓને પડકાર આપી શકે છે. આ ઉપરાંત વિશ્વના સૌથી ધનિક પરિવારોની યાદીમાં, વોલમાર્ટનો વોલ્ટન પરિવાર 2024માં $432.4 બિલિયનની સંપત્તિ સાથે ટોચ પર છે. તેણે મધ્ય-પૂર્વના શાહી પરિવારો અને વિશ્વના સૌથી ધનિક વ્યક્તિ એલોન મસ્કને પણ પાછળ છોડી દીધા છે.

મુકેશ અંબાણી અને મિસ્ત્રી પરિવારો, જેઓ શાપૂરજી પલોનજી જૂથના છે, તેઓ આ યાદીમાં અનુક્રમે આઠમા અને 23મા ક્રમે છે. જ્યારે અદાણીને આ સૂચિમાંથી બહાર રાખવામાં આવ્યા છે, કારણ કે આ સૂચિમાં ફક્ત પ્રથમ પેઢીની સંપત્તિ અને સિંગલ વારસનો સમાવેશ થાય છે. આમ, અંબાણી અને અદાણીની સંપત્તિમાં થયેલા ઘટાડાએ તેમની નાણાકીય સ્થિતિને ફરીથી વ્યાખ્યાયિત કરી છે, અને આ બંને ભારતીય ઉદ્યોગપતિઓને આગામી સમયમાં નવા પડકારોનો સામનો કરવો પડી શકે છે.