ગોલકીપર વિક્રમજિત સિંહના શાનદાર પ્રદર્શનની મદદથી ભારતે પેનલ્ટી શૂટઆઉટમાં ન્યૂઝીલેન્ડને 3-2થી હરાવીને સુલ્તાન જોહોર કપ જૂનિયર મેન્સ હોકી ટૂર્નામેન્ટમાં બ્રોન્ઝ મેડલ હાંસલ કર્યો હતો. નિર્ધારિત સમય 2-2થી સરભર રહ્યો હતો અને વિજેતા ટીમ જાહેર કરવા માટે શૂટઆઉટનો સહારો લેવાયો હતો.
શૂટઆઉટમાં ભારત માટે સ્ટ્રાઇકર ગુરજોતસિંહ, મનમીતસિંહ અને સૌરભ કુશવાહે ગોલ કર્યા હતા. ગોલકીપર વિક્રમજિતે કિવિ ટીમના ત્રણ સ્ટ્રોકને ખાળીને ભારતને વિજય અપાવવામાં મહત્ત્વની ભૂમિકા અદા કરી હતી. ચાર ક્વાર્ટરના નિર્ધારિત સમયમાં દિલરાજસિંહે 11મી તથા મનમીતસિંહે 20મી મિનિટે ગોલ કરીને ભારતને શાનદાર શરૂઆત કરી આપી હતી. ન્યૂઝીલેન્ડ માટે અંતિમ ક્વાર્ટરમાં ઓવેન બ્રાઉને 51મી તથા જોન્ટી એલ્મ્સે 57મી મિનિટે ગોલ કરીને સ્કોર 2-2થી સરભર કર્યો હતો. જોન્ટીએ છેલ્લી મેચમાં ગોલની હેટ્રિક નોંધાવી હતી. ભારતે અંતિમ ક્વાર્ટરમાં વિજયી ગોલ નોંધાવવાના નિષ્ફળ પ્રયાસ કર્યા હતા.
Source link
