બોર્ડર ગાવસ્કર ટ્રોફીમાં હાલમાં ભારત અને ઓસ્ટ્રેલિયા બંને 1-1 થી બરાબરી પર છે. પ્રથમ મેચ ટીમ ઈન્ડિયા અને બીજી મેચ ઓસ્ટ્રેલિયાએ જીતી હતી. બીજી ટેસ્ટ પિંક બોલથી રમાઈ હતી, જેમાં ઓસ્ટ્રેલિયાએ 10 વિકેટે જીત મેળવી હતી.
ત્રીજી ટેસ્ટ મેચમાં ઓસ્ટ્રેલિયાની પ્લેઈંગ ઈલેવનમાં ફેરફાર જોવા મળી શકે છે. વાસ્તવમાં ઓસ્ટ્રેલિયાના મહાન બેટ્સમેન સ્ટીવ સ્મિથ હાલમાં ખરાબ ફોર્મ સામે ઝઝૂમી રહ્યા છે, સ્મિથના ખરાબ ફોર્મે ઓસ્ટ્રેલિયાની ટીમનું ટેન્શન વધારી દીધું છે. જેના કારણે સ્મિથનું કાર્ડ ગાબા ટેસ્ટમાંથી દૂર થઈ શકે છે.
ખરાબ ફોર્મ સાથે સંઘર્ષ કરી રહ્યો છે સ્ટીવ સ્મિથ
વર્ષ 2024 સ્ટીવ સ્મિથ માટે અત્યાર સુધી ખૂબ જ ખરાબ રહ્યું છે. આ વર્ષે ટેસ્ટ ક્રિકેટમાં તેના બેટમાંથી કોઈપણ પ્રકારની એક પણ ઈનિંગ્સ જોવા મળી નથી. આ વર્ષે સ્મિથે 13 ઈનિંગ્સમાં 23.20 રનની એવરેજથી માત્ર 232 રન બનાવ્યા હતા. જેમાં માત્ર એક અડધી સદી સામેલ છે જ્યારે સ્મિથે આ વર્ષે એકપણ સદી ફટકારી નથી.
પર્થ ટેસ્ટની પ્રથમ ઈનિંગમાં સ્મિથ ખાતું ખોલાવ્યા વિના આઉટ થયો હતો, જ્યારે બીજી ઈનિંગમાં તેના બેટથી માત્ર 17 રન જ બન્યા હતા. આ સિવાય સ્મિથે એડિલેડ ટેસ્ટની પ્રથમ ઈનિંગમાં માત્ર 2 રન બનાવ્યા હતા, જ્યારે બીજી ઇનિંગમાં તેને બેટિંગ કરવાની તક મળી ન હતી. આ સિરીઝમાં અત્યાર સુધી સ્મિથે માત્ર 19 રન બનાવ્યા છે. જે બાદ હવે આ ખેલાડી પર ગાબા ટેસ્ટમાંથી બહાર થવાનો ખતરો છે.
ICC રેન્કિંગમાં પણ મોટું નુકસાન
તાજેતરમાં ICCએ ટેસ્ટ બેટ્સમેનોની તાજેતરની રેન્કિંગ જાહેર કરી હતી. જેમાં સ્મિથને ખરાબ ફોર્મના કારણે ભારે નુકસાન થયું છે. સ્ટીવ સ્મિથ હવે ટોપ-10 બેટ્સમેનોની લિસ્ટમાંથી બહાર થઈ ગયો છે, જે આ ખેલાડી અને ઓસ્ટ્રેલિયા માટે પણ ચિંતાનો વિષય છે. હવે સ્મિથ ICC ટેસ્ટ બેટ્સમેન રેન્કિંગમાં 11મા સ્થાને પહોંચી ગયો છે.
