બેંગલુરુ ટેસ્ટનો બીજો દિવસ ભારતીય ટીમ માટે ખૂબ જ શરમજનક રહ્યો. પહેલા બેટ્સમેનોએ ખેલાડીઓને હરાવવામાં કોઈ કસર છોડી ન હતી, ત્યારબાદ ટીમના બોલરો પણ સંપૂર્ણ રીતે બિનઅસરકારક દેખાતા હતા. 46 રનમાં આઉટ થયા બાદ દિવસની રમતના અંત સુધી ભારતીય ટીમ ન્યૂઝીલેન્ડના માત્ર ત્રણ બેટ્સમેનોને જ પેવેલિયન મોકલી શકી હતી. પ્રવાસી ટીમે સ્કોર બોર્ડ પર 180 રન બનાવી દીધા છે. ટીમના ખરાબ પ્રદર્શનને કારણે કેપ્ટન રોહિત શર્મા ઘણો પરેશાન દેખાઈ રહ્યો હતો. હિટમેન મેદાનની વચ્ચોવચ કોઈ વાત પર ગુસ્સે દેખાયો અને તેણે પોતાનો ગુસ્સો તેના સાથી ખેલાડી પર કાઢ્યો હતો.
કેપ્ટન રોહિતને આવ્યો ગુસ્સો
સોશિયલ મીડિયા પર એક વીડિયો ટ્રેન્ડ કરી રહ્યો છે, જેમાં કેપ્ટન રોહિત કોઈ વાત પર ગુસ્સે થતો જોવા મળી રહ્યો છે. વીડિયોમાં રોહિત એટલો ગુસ્સે દેખાઈ રહ્યો હતો કે તે પોતાના સાથી ખેલાડીને ધમકાવતો જોવા મળ્યો હતો. ભારતીય કેપ્ટનનું આ કૃત્ય કેમેરામાં કેદ થયું હતું, જેનો વીડિયો હવે વાયરલ થઈ રહ્યો છે.
વીડિયોમાં રોહિત ક્યા ખેલાડી પર ગુસ્સે હતો તે સ્પષ્ટ રીતે અનુમાન લગાવી શકાતું નથી. ટેસ્ટના બીજા દિવસે ભારતીય બોલરોનું પ્રદર્શન કંઈ ખાસ રહ્યું ન હતું. 10 ઓવર નાખવા છતાં જસપ્રીત બુમરાહે કોઈ વિકેટ લીધી ન હતી. આ સાથે જ અશ્વિન, કુલદીપ અને જાડેજાની ત્રિપુટી મળીને માત્ર 3 જ વિકેટ લઈ શકી હતી.
ટીમ ઈન્ડિયાની ઈનિંગ 46 રન પર પડી ભાંગી
બેંગલુરુ ટેસ્ટમાં ટોસ જીતીને પ્રથમ બેટિંગ કરવા આવેલી આખી ભારતીય ટીમ માત્ર 46 રન બનાવીને પડી ભાંગી હતી. ટીમના પાંચ બેટ્સમેન ખાતુ ખોલાવ્યા વગર જ પેવેલિયન પરત ફર્યા હતા. વિરાટ કોહલી, કેએલ રાહુલ, સરફરાઝ ખાન, રવિન્દ્ર જાડેજા અને આર અશ્વિન શૂન્ય પર રહ્યા. જ્યારે કેપ્ટન રોહિત શર્માએ 2 અને યશસ્વી જયસ્વાલે 13 રન બનાવ્યા હતા. ન્યૂઝીલેન્ડના ફાસ્ટ બોલર મેટ હેનરી અને વિલિયમ ઓ’રર્કની સામે ભારતીય ટીમનો બેટિંગ ઓર્ડર પત્તાની જેમ તૂટી ગયો હતો. ટીમ માટે સૌથી વધુ 20 રન રિષભ પંતના બેટમાંથી આવ્યા હતા. તેની ધરતી પર રમતી ભારતીય ટીમનો આ અત્યાર સુધીનો સૌથી ઓછો સ્કોર છે. આ સાથે જ ટીમ ઈન્ડિયા ટેસ્ટ ક્રિકેટમાં તેના ત્રીજા સૌથી ઓછા સ્કોર પર ઓલઆઉટ થઈ ગઈ હતી.
