T20 વર્લ્ડકપ જીતવા છતાં રોહિત શર્માને નહીં મળે કેપ્ટન્સી, જાણો કેમ

• IPL 2025 પહેલા રોહિત શર્મા મુંબઈ ઈન્ડિયન્સ છોડી શકે છે
  
• મુંબઈ ઈન્ડિયન્સે રોહિતને કેપ્ટન નહીં બનાવવાનો નિર્ણય લીધો છે
  
• આગામી સિઝનમાં પણ કેપ્ટનશીપ હાર્દિક પંડ્યાના હાથમાં રહેશે
  

હાલમાં જ રોહિત શર્માની કેપ્ટન્સીમાં ટીમ ઈન્ડિયાએ T20 વર્લ્ડકપ 2024 જીત્યો હતો. આ મોટી સિદ્ધિ હોવા છતાં રોહિત શર્માના ફેન્સને એક એવા સમાચાર મળ્યા છે જે કદાચ તેમના માટે આંચકાથી ઓછા નહીં હોય. એક રિપોર્ટમાં એવો દાવો કરવામાં આવી રહ્યો છે કે મુંબઈ ઈન્ડિયન્સે આગામી સિઝનમાં પણ રોહિત શર્માને કેપ્ટન નહીં બનાવવાનો નિર્ણય લીધો છે. આગામી સિઝનમાં પણ કેપ્ટનશીપ હાર્દિક પંડ્યાના હાથમાં રહેશે.

હાર્દિક પંડ્યાને ગત સિઝનમાં મુંબઈ ઈન્ડિયન્સની કપ્તાની સોંપવામાં આવી હતી અને ટીમ પ્લેઓફમાં પહોંચવામાં નિષ્ફળ રહી હતી. રોહિતને સુકાની પદ પરથી હટાવ્યા બાદ હાર્દિક પંડ્યાને દેશના દરેક સ્ટેડિયમમાં બૂનો સામનો કરવો પડ્યો હતો.

શું રોહિત બીજી કોઈ ટીમમાં જશે?

હવે એવા સમાચાર આવી રહ્યા છે કે હાર્દિક પંડ્યા મુંબઈ ઈન્ડિયન્સનો કેપ્ટન રહેશે, તો સવાલ એ પણ થઈ રહ્યો છે કે શું રોહિત શર્મા મુંબઈ ઈન્ડિયન્સમાં રહેશે? અથવા રોહિત શર્મા અન્ય ટીમમાં જશે. એક અહેવાલમાં દાવો કરવામાં આવી રહ્યો હતો કે જો રોહિત શર્મા હરાજીમાં આવે છે તો લખનૌ સુપરજાયન્ટ્સ અને દિલ્હી કેપિટલ્સ તેના પર 50 કરોડ રૂપિયા સુધીનો ખર્ચ કરી શકે છે. પરંતુ લખનૌના માલિક સંજીવ ગોએન્કાએ આ સમાચારને સંપૂર્ણપણે ખોટા ગણાવ્યા હતા.

કઈ ટીમોને કેપ્ટનની જરૂર છે?

IPLમાં ઘણી એવી ટીમો છે જેને કેપ્ટનની જરૂર છે. એવું કહેવામાં આવી રહ્યું છે કે દિલ્હી કેપિટલ્સ પણ પોતાનો કેપ્ટન બદલી શકે છે. પંજાબ કિંગ્સ પણ નવા કેપ્ટનની શોધમાં છે. લખનૌ પણ કેએલ રાહુલને કેપ્ટન બનાવવા અંગે સ્પષ્ટપણે કહ્યું નથી, તેથી શક્ય છે કે લખનૌ પણ નવા કેપ્ટનની શોધમાં હોય. RCB આગામી સિઝનમાં ફાફ ડુ પ્લેસિસને કેપ્ટનશિપ આપશે કે કેમ તે અંગે હજુ સ્પષ્ટ નથી.