Kolkata Rape-Murder Case: ટ્રેઈની ડોક્ટર કેસમાં 20 ઓગસ્ટે સુપ્રિમ કોર્ટમાં થશે સુનાવણી

• સુપ્રિમ કોર્ટમાં ટ્રેઈની ડોક્ટર કેસની થશે સુનાવણી
  
• IMAએ સુરક્ષા માટે કેન્દ્રીય કાયદો બનાવવાની માગ કરી
  
• સુપ્રીમ કોર્ટના ત્રણ જજોની પેનલ આ કેસની સુનાવણી કરશે
  

કોલકાતાની આરજી કર મેડિકલ કોલેજ અને હોસ્પિટલમાં મહિલા ડૉક્ટર પર દુષ્કર્મ અને હત્યા કરવામાં આવી હતી. આ મામલાને લઈને દેશભરમાં ગુસ્સો છે, ત્યારે તેની તપાસ સીબીઆઈને સોંપવામાં આવી છે. હાલમાં, આ બધાની વચ્ચે, સુપ્રીમ કોર્ટે હવે આરજી કાર મેડિકલ કોલેજ અને હત્યા કેસમાં સુઓ મોટુ સંજ્ઞાન લીધું છે. તમને જણાવી દઈએ કે સુપ્રીમ કોર્ટના ત્રણ જજોની પેનલ આ કેસની સુનાવણી કરશે.

20 ઓગસ્ટે ટ્રેઈની ડોક્ટર કેસની સુનાવણી

ટ્રેઈની ડોક્ટર કેસની સુનાવણી 20 ઓગસ્ટે થશે. તમને જણાવી દઈએ કે હોસ્પિટલના ડોક્ટર પર દુષ્કર્મ અને હત્યાની ઘટના બાદ કોલકાતા સહિત દેશભરમાં દેખાવો અને હડતાળ થઈ રહી છે. IMAએ આ મામલે દેશવ્યાપી હડતાળનું પણ આહ્વાન કર્યું હતું.

PM મોદીને પત્ર લખીને હસ્તક્ષેપની માગ કરી

આ સિવાય IMAએ પણ PM મોદીને પત્ર લખીને આ મામલે હસ્તક્ષેપની માગ કરી હતી. આ સાથે IMAએ પીએમ મોદી પાસે ડોકટરોની સુરક્ષા માટે કેન્દ્રીય કાયદો બનાવવાની પણ માગ કરી હતી. હાલ સીબીઆઈ આ કેસની તપાસ કરી રહી છે. મુખ્ય શકમંદોની પણ પૂછપરછ કરવામાં આવી રહી છે.

આરજી કર મેડિકલ કોલેજ અને હોસ્પિટલ નજીક પ્રતિબંધિત આદેશ

કોલકાતા પોલીસે રવિવાર 18 ઓગસ્ટથી 24 ઓગસ્ટ સુધી આરજી કર મેડિકલ કોલેજ અને હોસ્પિટલ નજીક પ્રતિબંધિત આદેશ લાગુ કર્યો છે, જે હેઠળ 5 થી વધુ લોકોના એકઠા થવા પર પ્રતિબંધ રહેશે. મહિલા ડૉક્ટર પર દુષ્કર્મ અને હત્યાનો મામલો સામે આવ્યા બાદ આરજી કર હોસ્પિટલ વિરોધનું કેન્દ્ર બની ગઈ છે.

પ્રતિબંધિત આદેશનું ઉલ્લંઘન કરનાર વ્યક્તિ સામે કાર્યવાહી

એક આદેશમાં કહેવામાં આવ્યું છે કે કોલકાતા પોલીસે હોસ્પિટલની આસપાસ ભારતીય નાગરિક સંરક્ષણ સંહિતા (BNS) ની કલમ 163 (2) લાગુ કરી છે. એવું કહેવામાં આવ્યું છે કે હોસ્પિટલની આસપાસના વિસ્તારમાંથી શ્યામબજાર પાંચ પોઇન્ટ ક્રોસિંગ સુધી પ્રતિબંધિત આદેશો લાદવામાં આવ્યા છે. આદેશ અનુસાર, ભારતીય ન્યાય સંહિતા (BNS), 2023ની કલમ 223 હેઠળ પ્રતિબંધિત આદેશનું ઉલ્લંઘન કરનાર વ્યક્તિ સામે કાર્યવાહી કરી શકાય છે.