હવે વિદેશની યુનિવર્સિટી ભારતમાં કેમ્પસ ખોલશે, UGCએ આપી મંજૂરી!

• સાઉધમ્પ્ટન યુનિવર્સિટી હવે ભારતમાં કેમ્પસ ખોલશે
  
• કેમ્પસને હરિયાણાના ગુરુગ્રામમાં ખોલવાની મંજૂરી મળી
  
• આ કેમ્પસ જુલાઈ 2025 સુધી શરૂ થઈ શકે
  

સાઉધમ્પ્ટન યુનિવર્સિટી હવે ભારતમાં તેનું નવું કેમ્પસ ખોલવાની તૈયારી કરી રહી છે. આ નવા કેમ્પસને હરિયાણાના ગુરુગ્રામમાં ખોલવાની દરખાસ્ત કરવામાં આવી છે. જેને મંજૂરી પણ મળી ગઈ છે. આ અંગે ભારત અને વિદેશના શિક્ષણવિદો અને સ્થાયી સમિતિ દ્વારા નિયમાનુસાર સંમતિ આપવામાં આવી છે.

FHEI કેમ્પસની સ્થાપના અને સંચાલન માટે સૂચના જારી

UGCના અધ્યક્ષે ભારતમાં FHEI (વિદેશી ઉચ્ચ શિક્ષણ સંસ્થા) કેમ્પસની સ્થાપના અને સંચાલનને લગતી બાબતોની દેખરેખ રાખવા માટે એક સ્થાયી સમિતિની રચના કરી છે. FHEI કેમ્પસની સ્થાપના અને સંચાલન માટે ઓનલાઈન સૂચના પણ જારી કરવામાં આવી છે.

શિક્ષણની ગુણવત્તા યુનિવર્સિટી ઓફ સાઉધમ્પ્ટન જેવી હશે

આ બ્રિટિશ યુનિવર્સિટીના ભારતીય કેમ્પસ દ્વારા આપવામાં આવતી ડિગ્રીઓ સાઉધમ્પ્ટન યુનિવર્સિટીની સમકક્ષ હશે. ભારતીય કેમ્પસમાં એવી જ સુવિધાઓ આપવામાં આવશે જે યુનિવર્સિટી ઓફ સાઉધમ્પ્ટનમાં પૂરી પાડવામાં આવે છે. શિક્ષણની ગુણવત્તા પણ સંપૂર્ણપણે યુનિવર્સિટી ઓફ સાઉધમ્પ્ટન જેવી જ હશે.

આ કેમ્પસ જુલાઈ 2025 માં શરૂ થવાની સંભાવના

યુનિવર્સિટી ગ્રાન્ટ્સ કમિશન (યુજીસી)ના અધ્યક્ષ પ્રો. એમ. જગદીશ કુમારે જણાવ્યું હતું કે યુનિવર્સીટી ઓફ સાઉધમ્પ્ટનનું ભારતીય કેમ્પસ જુલાઈ 2025 માં શરૂ થવાની અપેક્ષા છે. યુનિવર્સિટી ઓફ સાઉધમ્પ્ટનનું ભારતીય કેમ્પસ શરૂ થવાથી વિદ્યાર્થીઓને ભારતમાં તેમના અભ્યાસક્રમ અને અભ્યાસની તકોનો વિસ્તાર કરીને ફાયદો થશે. આ ઉપરાંત, તે સંશોધન, જ્ઞાન, વિજ્ઞાન અને વ્યવસાયના ક્ષેત્રોમાં પણ ફાયદાકારક સાબિત થશે.

યુનિવર્સિટીમાં આ વિષયોનો અભ્યાસ કરવામાં આવશે

પ્રો. જગદીશ કુમારના જણાવ્યા અનુસાર, આ બ્રિટિશ યુનિવર્સિટીના ભારતીય કેમ્પસમાં બિઝનેસ અને મેનેજમેન્ટ, કમ્પ્યુટિંગ, લો, એન્જિનિયરિંગ, આર્ટ એન્ડ ડિઝાઇન, બાયોલોજી અને લાઇફ સાયન્સ સહિત અન્ય ઘણા વિષયોમાં ડિગ્રી આપવામાં આવશે.