નેશનલ કોન્ફરન્સના ઉપાધ્યક્ષ ઓમર અબ્દુલ્લા 16 ઓક્ટોબરે સવારે 11:30 વાગ્યે જમ્મુ-કાશ્મીરના મુખ્યમંત્રી તરીકે શપથ લેશે. એલજી મનોજ સિંહાએ શપથ ગ્રહણ સમારોહ માટે ઓમર અબ્દુલ્લા અને તેમના મંત્રી પરિષદમાં સામેલ ધારાસભ્યોને આમંત્રણ આપ્યું છે. એલજી દ્વારા જાહેર કરાયેલા પત્રમાં કહેવામાં આવ્યું છે કે, જમ્મુ અને કાશ્મીરમાં સરકાર બનાવવા અને તેનું નેતૃત્વ કરવા માટે તમને આમંત્રણ આપતા મને આનંદ થાય છે. નક્કી કર્યા મુજબ હું તમને અને તમારા મંત્રીઓને 16મી ઓક્ટોબરના રોજ સવારે 11:30 વાગ્યે SKICC શ્રીનગર ખાતે હોદ્દા અને ગોપનીયતાના શપથ લેવડાવીશ.
ઓમર અબ્દુલ્લા બનશે જમ્મુ કાશ્મીરના મુખ્યમંત્રી
એલજી મનોજ સિન્હા વતી આ જ પત્રમાં આગળ કહેવામાં આવ્યું છે કે, હું તમને તમારા પ્રયત્નોમાં સફળતા અને જમ્મુ-કાશ્મીરના લોકોના હિતમાં સફળતાની કામના કરું છું. મને 11 ઓક્ટોબરે જમ્મુ-કાશ્મીર નેશનલ કોન્ફરન્સના પ્રમુખ ફારૂક અબ્દુલ્લાનો પત્ર મળ્યો છે. જેમાં કહેવામાં આવ્યું છે કે, તમને વિધાયક દળના નેતા તરીકે સર્વાનુમતે ચૂંટવામાં આવ્યા છે.
એલજી દ્વારા જાહેર કરવામાં આવ્યો પત્ર
એલજી વતી એવું કહેવામાં આવ્યું છે કે, હું જમ્મુ અને કાશ્મીર કોંગ્રેસ સમિતિના પ્રમુખ તારિક હમીદ કારા, સીપીઆઈ (એમ) સેક્રેટરી જી.એન. મલિક, આમ આદમી પાર્ટીના રાષ્ટ્રીય સચિવ પંકજ કુમાર ગુપ્તા અને અપક્ષ ધારાસભ્યો (પ્યારે લાલ શર્મા, સતીશ શર્મા, મોહમ્મદ અકરમ, રામેશ્વર સિંહ અને મુઝફ્ફર ઈકબાલ ખાન) તરફથી પણ એક પત્ર મળ્યો છે. જેમાં આપના નેતૃત્વમાં સરકારની રચનામાં સમર્થનની ઓફર કરવામાં આવી છે.
ઓમર અબ્દુલ્લાએ શનિવારે એલજી મનોજ સિન્હા સાથે કરી હતી મુલાકાત
એલજીના આ પત્ર પહેલા ઓમર અબ્દુલ્લાએ શનિવારે એલજી મનોજ સિન્હા સાથે મુલાકાત કરી હતી. તેમણે સમર્થનનો પત્ર રજૂ કર્યો હતો અને જમ્મુ-કાશ્મીરમાં સરકાર બનાવવાનો દાવો કર્યો હતો. આ પહેલા રવિવારે જમ્મુ-કાશ્મીરમાંથી રાષ્ટ્રપતિ શાસન હટાવી દેવામાં આવ્યું હતું. કેન્દ્રીય ગૃહ મંત્રાલયે આ અંગે એક નોટિફિકેશન બહાર પાડ્યું હતું. તાજેતરમાં યોજાયેલી વિધાનસભા ચૂંટણીમાં નેશનલ કોન્ફરન્સ-કોંગ્રેસ ગઠબંધન જીત્યું છે. ઓમર અબ્દુલ્લા ગઠબંધનના નેતા તરીકે ચૂંટાયા છે. તેઓ જમ્મુ-કાશ્મીરના આગામી મુખ્યમંત્રી હશે.
6 વર્ષથી બાદ રાષ્ટ્રપતિ શાસદ હટાવાયું
જમ્મુ-કાશ્મીરમાં વિધાનસભાની ચૂંટણી પૂર્ણ થયા બાદ હવે ઓમર અબ્દુલ્લા 16 ઓક્ટોબરે સવારે 11:30 વાગ્યે જમ્મુ-કાશ્મીરના મુખ્યમંત્રી તરીકે શપથ લેશે. નોંધનીય છે કે, ગતરોજ જમ્મુ કાશ્મીરમાં 6 વર્ષથી લાદવામાં આવેલ રાષ્ટ્રપતિ શાસન હવે હટાવી લેવામાં આવ્યું છે. જમ્મુ-કાશ્મીર વિધાનસભા ચૂંટણીમાં નેશનલ કોન્ફરન્સના ગઠબંધનનો વિજય થયો છે. તેણે 49 બેઠકો જીતી છે જ્યારે ભાજપને 29 બેઠકો મળી છે.
