બીજી ટેસ્ટ પાકિસ્તાન અને ઈંગ્લેન્ડ વચ્ચે મુલતાનમાં રમાઈ રહી છે. પાકિસ્તાનને પ્રથમ ટેસ્ટમાં શરમજનક હારનો સામનો કરવો પડ્યો હતો. આ પછી બીજી ટેસ્ટ પહેલા પાકિસ્તાની ટીમમાં મોટા ફેરફાર કરવામાં આવ્યા છે. બાબર આઝમ, શાહીન આફ્રિદી અને નસીમ શાહ જેવા ખેલાડીઓને પડતા મૂકવામાં આવ્યા હતા. હવે બીજી ટેસ્ટ પર પાકિસ્તાને પકડ બનાવી છે. ત્રીજા દિવસની રમતના અંતે ઈંગ્લેન્ડનો સ્કોર 2 વિકેટે 36 રન છે. ઈંગ્લેન્ડને 297 રનનો લક્ષ્યાંક મળ્યો છે. આ રીતે બ્રિટિશ ટીમને જીતવા માટે 261 રનની જરૂર છે.
સાજિદ ખાને 24 વર્ષનો દુષ્કાળ ખતમ કર્યો…!
આ પહેલા ઈંગ્લેન્ડનો પ્રથમ દાવ 291 રન પર સમેટાઈ ગયો હતો. પાકિસ્તાન તરફથી સાજિદ ખાને 111 રનમાં 7 વિકેટ લીધી હતી. છેલ્લા 24 વર્ષમાં આ પ્રથમવાર છે જ્યારે કોઈ પાકિસ્તાની ઓફ સ્પિનરે ઘરની ધરતી પર ટેસ્ટ મેચોમાં 5 વિકેટ ઝડપી છે. પાકિસ્તાન તરફથી લગભગ 24 વર્ષથી કોઈ પણ ઓફ સ્પિનરે ઘરની ધરતી પર ટેસ્ટ મેચમાં 5 વિકેટ લેવાની સિદ્ધિ હાંસલ કરી ન હતી, પરંતુ હવે સાજિદ ખાને લાંબા દુષ્કાળનો અંત લાવી દીધો છે. સાજિદ ખાનની જબરદસ્ત બોલિંગના કારણે, પાકિસ્તાને બીજી ટેસ્ટમાં ઇંગ્લેન્ડ પર સકંજો કસ્યો છે.
મુલ્તાન ટેસ્ટમાં અત્યાર સુધી શું થયું?
પાકિસ્તાને પ્રથમ દાવમાં 366 રન બનાવ્યા હતા. જેના જવાબમાં ઈંગ્લેન્ડે પ્રથમ દાવમાં 291 રન બનાવ્યા હતા. આ રીતે પ્રથમ દાવના આધારે પાકિસ્તાનને 75 રનની મહત્વની લીડ મળી હતી. આ સાથે જ પાકિસ્તાનનો બીજો દાવ 221 રન પર સમેટાઈ ગયો હતો. હવે ઇંગ્લેન્ડને ટેસ્ટ જીતવા માટે બીજા દાવમાં 297 રન બનાવવા પડશે. ત્રીજા દિવસની રમતના અંતે ઈંગ્લેન્ડનો સ્કોર 2 વિકેટે 36 રન છે. ઈંગ્લેન્ડને 297 રનનો લક્ષ્યાંક મળ્યો છે. આ રીતે, બ્રિટિશ ટીમને શ્રેણીમાં 2-0ની સરસાઈ મેળવવા માટે 261 રનની જરૂર છે. આ સાથે જ પાકિસ્તાનને સિરીઝ બરાબર કરવા માટે 8 વિકેટની જરૂર છે.
