સુરત શહેરમાં વધુ એક વખત હત્યાની ઘટના સામે આવી છે. પતિ-પત્ની અને ‘વો’ના ચક્કરમાં હત્યાનો બનાવ બન્યો છે. શહેરની લસકાણા ક્રિષ્નાનગર ઈન્ડસ્ટ્રીઝમાં આ હત્યાનો બનાવ બન્યો છે. જો કે હાલમાં પોલીસ દ્વારા પત્નીના પ્રેમીની હત્યા કરનારા પતિની ધરપકડ કરી લેવામાં આવી છે.
આડાસંબંધની શંકાએ પતિએ પ્રેમીની કરી હત્યા
પોલીસે આરોપી અર્જુન ઉર્ફે છોટુ રામકિશન કેવટની ધરપકડ કરી લીધી છે, આ આરોપીએ પત્નીના પ્રેમી જયશંકર દેસરાજ નામના યુવકની હત્યા કરી છે. આરોપીની પત્ની સાથે મૃતક યુવક જયશંકર દેસરાજના પ્રેમ સંબંધ હોવાની શંકાના કારણે પતિએ હત્યા કરી છે. આરોપી અર્જુન ઉર્ફે છોટુની પત્ની મૃતક જયશંકર દેસરાજ સાથે મોબાઈલ ફોન પર વાતો કરતી હતી અને આડાસંબંધની શંકાના કારણે પ્રેમીની હત્યા કરી દીધી હતી. ત્યારે આ સમગ્ર મામલે સરથાણા પોલીસે આરોપીની ધરપકડ કરીને વધુ તપાસ હાથ ધરી છે.
ઉલ્લેખનીય છે કે છેલ્લા કેટલાક દિવસથી ડાયમંડ નગરી સુરતમાં હત્યા સહિત ચોરી અને લુંટફાટની ઘટનાઓમાં સતત વધારો જોવા મળી રહ્યો છે, ત્યારે શહેરમાં પોલીસની કામગીરીને લઈને પણ અનેક સવાલો ઉઠી રહ્યા છે. શહેરમાં સતત વધી રહેલી હત્યાની ઘટનાઓને લઈને શહેરીજનોમાં પણ ભયનો માહોલ જોવા મળી રહ્યો છે.
સુરતના મદણીયાવાળમાં પાર્કિંગ મુદ્દે બબાલ
બીજી તરફ સુરતના મદણીયાવાળ વિસ્તારમાં પાર્કિંગ મુદ્દે મોટી બબાલ થઈ છે. પાર્કિંગ મુદ્દે સામસામે રહેતા બે પરિવાર વચ્ચે મોટી બબાલ થઈ હતી અને પ્રતિક રાણા, કિશોર રાણાની દાદાગીરીનો આરોપ લગાવવામાં આવી રહ્યો છે. હસમુખ રાણા, એના પુત્ર અને પુત્રવધુ પર હુમલો કરવામાં આવ્યો હતો. અઠવાલાઈન્સ પોલીસની હદમાં આ બનાવ બન્યો હતો. આ સમગ્ર ઘટનાના CCTV પણ સામે આવ્યા છે.
ભરૂચના જંબુસરના કાવીમાં યુવાન પર ચપ્પુથી કર્યો હુમલો
ભરૂચના જંબુસરના કાવીમાં યુવાન પર ચપ્પુથી હુમલો કરવામાં આવ્યો છે. કાકીના ઘરે આવવાની ના પાડતા હુમલો કર્યો છે. હુમલામાં સેહબાઝ સઈદ નામના યુવાનને માથા તેમજ પગના ભાગે ઈજાઓ પહોંચી હતી અને હુમલામાં યુવાનને 14 જેટલા પગમાં ટાંકા પણ આવ્યા છે. આરોપી ઈરફાન નૂરભા પઠાણ નામના યુવાને હુમલો કર્યો હતો. જેને લઈને કાવી પોલીસે ગુનો દાખલ કરીને આગળની વધુ તપાસ હાથ ધરી છે.
Source link
