દેશની સૌથી મોટી સરકારી બેન્ક, સ્ટેટ બેન્ક ઓફ ઈન્ડિયાએ સાબિત કરી દીધું છે કે તેને દેશની સૌથી મોટી બેન્ક કેમ કહેવામાં આવે છે. પછી ભલે તે સેવા હોય કે ગામડાઓમાં નેટવર્ક. આ બેન્કે દરેક જગ્યાએ જીત મેળવી છે. SBIએ 3 મહિનામાં તગડો નફો કર્યો છે. દેશની સૌથી મોટી સરકારી બેન્કે નફાના તમામ રેકોર્ડ તોડી નાખ્યા છે. સ્ટેટ બેન્ક ઓફ ઈન્ડિયાએ ત્રીજા ક્વાર્ટરમાં 84 ટકાનો મજબૂત નફો કર્યો છે.
નફામાં થયો રેકોર્ડ બ્રેક વધારો
દેશની સૌથી મોટી બેન્ક SBIનો સ્ટેન્ડઅલોન ધોરણે ચોખ્ખો નફો ચાલુ નાણાકીય વર્ષ 2024-25ના ત્રીજા ક્વાર્ટરમાં 84 ટકા વધીને રૂપિયા 16,891 કરોડ થયો છે. ગયા નાણાકીય વર્ષ 2023-24ના ત્રીજા ક્વાર્ટર (ઓક્ટોબર-ડિસેમ્બર)માં સ્ટેન્ડઅલોન ધોરણે સ્ટેટ બેન્ક ઓફ ઈન્ડિયા (SBI)નો ચોખ્ખો નફો 9,164 કરોડ રૂપિયા હતો. SBIએ સ્ટોક એક્સચેન્જને માહિતી આપી હતી કે ચાલુ નાણાકીય વર્ષના ત્રીજા ક્વાર્ટરમાં બેન્કની કુલ આવક વધીને રૂપિયા 1,28,467 કરોડ થઈ છે જે ગયા નાણાકીય વર્ષના સમાન સમયગાળામાં રૂપિયા 1,18,193 કરોડ હતી. સમીક્ષા હેઠળના ક્વાર્ટરમાં બેન્કની વ્યાજ આવક વાર્ષિક ધોરણે રૂપિયા 1,06,734 કરોડથી વધીને રૂપિયા 1,17,427 કરોડ થઈ છે.
NPAમાં થયો ઘટાડો
સંપત્તિ ગુણવત્તાના મોરચે, બેન્કમાં સુધારો જોવા મળ્યો અને કુલ નોન-પર્ફોર્મિંગ એસેટ્સ (NPA) ડિસેમ્બર 2024ના અંતે 2.07 ટકા રહી જે ડિસેમ્બર 2023ના અંતે 2.42 ટકા હતી. તેવી જ રીતે ચોખ્ખી નોન-પર્ફોર્મિંગ એસેટ્સ (NPA) પણ વાર્ષિક ધોરણે 0.64 ટકાથી ઘટીને 0.53 ટકા થઈ ગઈ. તે જ સમયે, વાર્ષિક ધોરણે આ સમયગાળા દરમિયાન SBI ગ્રુપનો એકીકૃત ચોખ્ખો નફો 11,064 કરોડ રૂપિયાથી 70 ટકા વધીને 18,853 કરોડ રૂપિયા થયો છે. ત્રીજા ક્વાર્ટરમાં કુલ એકીકૃત આવક વાર્ષિક ધોરણે રૂપિયા 1,53,072 કરોડથી વધીને રૂપિયા 1,67,854 કરોડ થઈ છે.
શેરના ભાવમાં થયો ઘટાડો
બીજી તરફ દેશની સૌથી મોટી બેન્ક SBIના શેરમાં ઘટાડો જોવા મળી રહ્યો છે. તે BSE પર દોઢ ટકાના ઘટાડા સાથે રૂપિયા 754.54 પર ટ્રેડ થઈ રહ્યો છે. જ્યારે ટ્રેડિંગ સત્ર દરમિયાન, બેન્કના શેર દિવસના સૌથી નીચા ભાવ રૂપિયા 751.25 પર પહોંચી ગયા હતા. એક દિવસ પહેલા, બેન્કનો શેર રૂપિયા 766.10 પર બંધ થયો હતો, જ્યારે આજે સવારે બેન્કનો શેર રૂપિયા 769.65 પર ખુલ્યો હતો.
Source link
