T20 વર્લ્ડકપ 2024માં બ્રોડકાસ્ટરને ભારે નુકસાન, ICC પાસેથી 830 કરોડની માંગી છૂટ

• T20 વર્લ્ડકપ 2024 બ્રોડકાસ્ટર માટે બિલકુલ સારો રહ્યો ન હતો
  
• બ્રોડકાસ્ટર ચેમ્પિયનશિપ પહેલા ડિસ્કાઉન્ટની માંગ કરી રહ્યું છે
  
• લગભગ 830 કરોડ રૂપિયાથી વધુ ડિસ્કાઉન્ટની માંગ કરી રહ્યું છે
  

T20 વર્લ્ડકપ 2024 બ્રોડકાસ્ટર માટે બિલકુલ સારો રહ્યો ન હતો. ICC અને સ્ટાર સ્પોર્ટસ વચ્ચે $3 બિલિયનનો કરાર અમેરિકા અને વેસ્ટ ઈન્ડિઝમાં યોજાયેલા T20 વર્લ્ડકપ સાથે અમલમાં આવ્યો હતો. હવે એક અહેવાલમાં જણાવવામાં આવ્યું છે કે બ્રોડકાસ્ટર પણ ઘણા કારણોસર ચેમ્પિયનશિપના એકંદર મૂલ્યાંકન પર ડિસ્કાઉન્ટની માંગ કરી રહ્યું છે.

રિપોર્ટ અનુસાર, સ્ટાર સ્પોર્ટસે ICCને બે પત્ર લખ્યા હતા અને ગયા મહિને કોલંબોમાં આયોજિત વાર્ષિક કોન્ફરન્સ દરમિયાન આ મુદ્દે ચર્ચા કરવામાં આવી હતી. ICCના વર્તમાન અધ્યક્ષ ગ્રેગ બાર્કલેએ પણ આ મામલે અધિકારીઓ સાથે વાત કરી હતી. જોકે, અંતિમ નિર્ણય બોર્ડ પર નિર્ભર રહેશે.

830 કરોડનું રિફંડ માગ્યું

રિપોર્ટમાં જણાવવામાં આવ્યું છે કે વિવિધ કારણોસર સ્ટાર વર્લ્ડકપમાં 100 મિલિયન ડોલર (લગભગ 830 કરોડ રૂપિયા)થી વધુની ડિસ્કાઉન્ટની માંગ કરી રહ્યું છે. આ છૂટની માગણીનું મુખ્ય કારણ ફ્લોરિડામાં ભારત અને કેનેડા વચ્ચેની રદ થયેલી મેચ હોવાનું કહેવાય છે. ટૂર્નામેન્ટમાં ભારતની સરખામણીએ વધુ મૂલ્યવાન ઇવેન્ટ્સ હતી. ભારત-કેનેડા ઉપરાંત ઈંગ્લેન્ડ વિરુદ્ધ સ્કોટલેન્ડ, અમેરિકા વિરુદ્ધ આયર્લેન્ડ અને શ્રીલંકા વિરુદ્ધ નેપાળ જેવી કેટલીક મેચો પણ રદ કરવામાં આવી હતી.

શું બ્રોડકાસ્ટરને મળશે રિફંડ

જો કે, બ્રોડકાસ્ટ ડીલ્સમાં સામાન્ય રીતે રિફંડની કલમનો સમાવેશ થતો નથી. તો હવે એ જોવાનું રસપ્રદ રહેશે કે સ્ટાર ICCને કેટલા મનાવવામાં સફળ રહે છે. આટલું જ નહીં, સ્ટારે અફઘાનિસ્તાન અને સાઉથ આફ્રિકા વચ્ચેની લો સ્કોરિંગ સેમિફાઇનલ પર પણ ચિંતા વ્યક્ત કરી હતી, જ્યાં અફઘાનિસ્તાન 56 રનમાં ઓલઆઉટ થઈ ગયું હતું અને પછી આફ્રિકાએ માત્ર 9 ઓવરમાં લક્ષ્ય હાંસલ કરીને જીત મેળવી હતી.