Tiktok News: ‘ભારતમાં TikTok પર પ્રતિબંધ યથાવત’, સરકારે કહ્યું- આવો કોઈ આદેશ જારી કરવામાં આવ્યો નથી
Tiktok Download : ભારત સરકારે એવા અહેવાલોને નકારી કાઢ્યા છે કે ચાઇનીઝ વીડિયો એગ્રીગેટર પ્લેટફોર્મ ટિકટોક પરનો પ્રતિબંધ હટાવવામાં આવ્યો છે. ઇલેક્ટ્રોનિક્સ અને માહિતી ટેકનોલોજી મંત્રાલયના સૂત્રોએ સ્પષ્ટતા કરી છે કે ભારતમાં ટિકટોક માટે કોઈ અનબ્લોકિંગ ઓર્ડર જારી કરવામાં આવ્યો નથી.
આવા કોઈપણ નિવેદન અથવા સમાચાર ખોટા અને ભ્રામક છે. જોકે, ઈ-કોમર્સ વેબસાઇટ Aliexpress અને ઓનલાઇન કપડાં વેચતી વેબસાઇટ SHEIN અંગે સરકાર તરફથી હજુ સુધી કોઈ સ્પષ્ટતા આવી નથી.
એપ સ્ટોર પર ઉપલબ્ધ નથી
જોકે કેટલાક યુઝર્સ TikTokની વેબસાઇટ એક્સેસ કરી શક્યા હતા, પરંતુ તેઓ લોગ ઇન કરી શક્યા ન હતા, અપલોડ કરી શક્યા ન હતા કે વીડિયોઝ જોઈ શક્યા ન હતા. આ ચાઇનીઝ વીડિયો પ્લેટફોર્મની એપ્લિકેશન ભારતમાં એપ સ્ટોર પર પણ ઉપલબ્ધ નથી.
ટેલિકોમ્યુનિકેશન વિભાગના સૂત્રોએ જણાવ્યું હતું કે ઇન્ટરનેટ સેવા પ્રદાતાઓ આ વેબસાઇટને સતત બ્લોક કરી રહ્યા છે. જોકે, કેટલાક ઇન્ટરનેટ યુઝર્સ તેને કેવી રીતે એક્સેસ કરી શકે છે તે સ્પષ્ટ નથી.
સરકારે 59 મોબાઇલ એપ્લિકેશનો પર પ્રતિબંધની જાહેરાત કરી હતી
જૂન 2020માં, ભારત સરકારે 59 મોબાઇલ એપ્લિકેશનો પર પ્રતિબંધની જાહેરાત કરી હતી, જેમાં મોટાભાગે ચાઇનીઝ એપ્લિકેશનો હતી. આમાં TikTok, UC બ્રાઉઝર અને WeChat જેવી લોકપ્રિય એપ્લિકેશનો સામેલ હતી.
સરકારે આ ચાઇનીઝ એપ્લિકેશનોને ભારતની સાર્વભૌમત્વ અને અખંડિતતા, સુરક્ષા અને જાહેર વ્યવસ્થા માટે ખતરો ગણાવ્યો હતો. ચીન સાથે ભારતના વધતા સરહદી તણાવની પૃષ્ઠભૂમિ સામે આ પગલું લેવામાં આવ્યું હતું.
ભારતીય નાગરિકોનો ડેટા લીક કરી રહી હતી આ એપ્સ
15-16 જૂન 2020ની રાત્રે, પૂર્વી લદ્દાખની ગલવાન ખીણમાં ભારતીય સેનાના સૈનિકોની ચીની સૈનિકો સાથે હિંસક અથડામણ થઈ હતી. આ ઘટના પછી, ચીન અને ભારત વચ્ચેના સંબંધોમાં ખટાશ આવી ગઈ.
આ પછી, કેન્દ્રીય ગૃહ મંત્રાલયે 59 મોબાઇલ એપ્સ પર પ્રતિબંધની જાહેરાત કરી. આ બધી એપ્સ ભારતીય નાગરિકોનો ડેટા લીક કરી રહી હતી. ટેક નિષ્ણાતોએ કહ્યું હતું કે આ એપ્સ ભારતીયોના લોકેશન ડેટા લે છે અને ફાઇલોને ચીનમાં સ્થિત સર્વર પર ટ્રાન્સફર કરે છે.
