Mohammed Shami : ‘શું કોઈને મારાથી કોઈ વાંધો છે…’, મોહમ્મદ શમીએ નિવૃત્તિના મુદ્દા પર આપ્યું મોટું નિવેદન
ભૂતપૂર્વ ભારતીય ક્રિકેટરો રવિચંદ્રન અશ્વિન અને ચેતેશ્વર પૂજારાએ ક્રિકેટમાંથી નિવૃત્તિ લીધા પછી, ટીમ ઈન્ડિયાના ફાસ્ટ બોલર મોહમ્મદ શમીના ભવિષ્ય અંગે પ્રશ્નો ઉભા થઈ રહ્યા હતા,
પરંતુ આ બોલરે આ અફવાઓને ફગાવી દીધી હતી. તેણે કહ્યું હતું કે તેનો હાલમાં નિવૃત્તિ લેવાનો કોઈ ઇરાદો નથી. આ દરમિયાન શમીએ એવા લોકો પર નિશાન સાધ્યું જેઓ તેની નિવૃત્તિમાં વધુ રસ દાખવી રહ્યા છે. તેણે પોતાની નિવૃત્તિ અંગે મોટું નિવેદન આપ્યું.
મોહમ્મદ શમીએ શું કહ્યું?
ઇંગ્લેન્ડ સામેની ટેસ્ટ શ્રેણી પછી એશિયા કપ માટે ટીમ ઇન્ડિયામાંથી બહાર કરાયેલા મોહમ્મદ શમીએ કહ્યું કે જ્યાં સુધી તેમનું મનોબળ ન ઘટે ત્યાં સુધી તે રમવાનું ચાલુ રાખશે. એક ઇન્ટરવ્યુ દરમિયાન, તેણે કહ્યું, “જો કોઈને કોઈ સમસ્યા હોય, તો મને કહો, શું હું નિવૃત્તિ લઈ લઉં તો તેમનું જીવન સારું થઈ જશે?
મને કહો, હું કોના જીવનમાં પથ્થર બની ગયો છું કે તમે મને નિવૃત્તિ લેવા કહો છો? જે દિવસે હું કંટાળી જઈશ, હું મારી જાતે જ છોડી દઈશ.”
‘નિવૃત્તિ લેવાનો યોગ્ય સમય હજુ આવ્યો નથી’
ટીમ ઈન્ડિયાના આ ફાસ્ટ બોલરે આગળ કહ્યું, “તમે મને પસંદ ન કરો, પણ હું સખત મહેનત કરતો રહીશ. જો તમે મને આંતરરાષ્ટ્રીય ક્રિકેટ માટે પસંદ નહીં કરો, તો હું ઘરેલુ ક્રિકેટ રમીશ. હું ક્યાંક ને ક્યાંક રમતો રહીશ”. આ 34 વર્ષીય ખેલાડીએ કહ્યું કે નિવૃત્તિ લેવાનો યોગ્ય સમય હજુ આવ્યો નથી.
