Rule Change : 1 ઓક્ટોબરથી LPGના ભાવ બદલાશે, સાથે જ બેન્ક અને રેલવેના નિયમો પણ લાગુ થશે
1 ઓક્ટોબરથી ઘણા મહત્વપૂર્ણ નિયમોમાં ફેરફારો લાગુ થવા જઈ રહ્યા છે. આ બદલાવોની સીધી અસર ઘરેલુ બજેટ અને સામાન્ય નાગરિકોના જીવન પર પડશે. તેમાં LPG સિલિન્ડરની કિંમતો, રેલવે ટિકિટિંગ સિસ્ટમ, પેન્શનના નિયમો, UPI ટ્રાન્ઝેક્શન અને બેન્ક રજાઓ મુખ્ય છે. ચાલો જાણીએ 1 ઓક્ટોબરથી લાગુ થનારા પાંચ મોટા બદલાવો વિશે.
1. LPG સિલિન્ડરના ભાવમાં ફેરફાર
ઓઇલ માર્કેટિંગ કંપનીઓ દર મહિને સિલિન્ડરના ભાવોમાં સુધારો કરે છે. 19 કિલોગ્રામના કોમર્શિયલ સિલિન્ડરની કિંમતોમાં તાજેતરમાં ફેરફાર થયા છે, પરંતુ 14 કિલોગ્રામના ઘરેલુ સિલિન્ડરના ભાવો એપ્રિલ 2025 પછીથી યથાવત છે. આશા છે કે આ વખતે ગ્રાહકોને રાહત મળશે. સાથે જ ATF અને CNG-PNGની કિંમતો પણ બદલાઈ શકે છે.
2. રેલવે ટિકિટ બુકિંગમાં નવો નિયમ
1 ઓક્ટોબરથી ઇન્ડિયન રેલવે ઓનલાઈન ટિકિટ બુકિંગમાં મહત્વપૂર્ણ સુધારો લાવી રહ્યું છે. નવા નિયમ અનુસાર, રિઝર્વેશન ખુલ્યા પછીની પ્રથમ 15 મિનિટમાં માત્ર આધાર વેરિફિકેશન પૂર્ણ કરેલા યુઝર્સ જ IRCTC વેબસાઇટ અથવા એપ મારફતે ટિકિટ બુક કરી શકશે. કાઉન્ટર ટિકિટ માટે કોઈ બદલાવ નહીં થાય.
3. પેન્શન યોજનાઓમાં ફેરફાર
PFRDAએ 1 ઓક્ટોબરથી NPS, APY અને NPS લાઇટ સબ્સ્ક્રાઇબર્સ માટે ફીમાં સુધારા જાહેર કર્યા છે. સરકારી કર્મચારીઓ માટે નવા PRAN ખોલવા માટે ₹18 (E-PRAN) અને ₹40 (ફિઝિકલ કાર્ડ) ચાર્જ લાગશે, જ્યારે વાર્ષિક મેન્ટેનન્સ ફી ₹100 રહેશે. બીજી તરફ, APY અને NPS લાઇટ સબ્સ્ક્રાઇબર્સ માટે PRAN ખોલવા અને મેન્ટેનન્સ બંનેનો ખર્ચ માત્ર ₹15 રાખવામાં આવ્યો છે.
4. UPI ટ્રાન્ઝેક્શન પર અસર
NPCI 1 ઓક્ટોબરથી UPI યુઝર્સ માટે મોટો ફેરફાર લાવી શકે છે. રિપોર્ટ્સ મુજબ, સુરક્ષા વધારવા અને છેતરપિંડી રોકવા માટે લોકપ્રિય P2P ટ્રાન્ઝેક્શન સુવિધા બંધ કરવાની ચર્ચા છે. આ પગલાની અસર PhonePe, Google Pay અને Paytm જેવા એપ્સના લાખો યુઝર્સ પર પડશે.
5. બેન્કોમાં લાંબી રજાઓ
ઓક્ટોબરમાં મહાત્મા ગાંધી જયંતિ, દશેરા, દિવાળી, લક્ષ્મી પૂજા, ભાઈબીજ અને છઠ પૂજા સહિત કુલ 21 દિવસ બેન્કો બંધ રહેશે. સાપ્તાહિક રજાઓ એટલે કે બીજા અને ચોથા શનિવાર તેમજ રવિવાર પણ તેમાં સામેલ છે. જોકે, રાજ્યો મુજબ બેન્ક રજાઓની તારીખો અલગ હોઈ શકે છે.
