બેંગલુરુના એમ ચિન્નાસ્વામી સ્ટેડિયમમાં રમાયેલી પ્રથમ ટેસ્ટમાં ભારતનો આઠ વિકેટે પરાજય થયો હતો. આ હારને કારણે ટીમને વર્લ્ડ ટેસ્ટ ચેમ્પિયનશિપના પોઈન્ટ ટેબલમાં પણ નુકસાન થયું છે. આ મેચ પહેલા ટીમ 74.24ની જીતની ટકાવારી સાથે ટોચ પર હતી, પરંતુ હવે ટીમની જીતની ટકાવારી ઘટીને 68.06 થઈ ગઈ છે. જો કે આ પછી પણ તે પોઈન્ટ ટેબલમાં ટોપ પર છે. ઓસ્ટ્રેલિયા આ યાદીમાં 62.50 જીતની ટકાવારી સાથે બીજા સ્થાને છે.
ન્યુઝીલેન્ડને થયો મોટો ફાયદો
ન્યુઝીલેન્ડને બેંગલુરુમાં ભારતને હરાવીને મોટો ફાયદો થયો છે અને તે સીધું ચોથા સ્થાને પહોંચી ગયું છે. બીજી તરફ ઈંગ્લેન્ડની ટીમ હવે પાંચમા સ્થાને સરકી ગઈ છે જે પહેલા ચોથા સ્થાને હતી. ભારત અને ઓસ્ટ્રેલિયા બાદ શ્રીલંકાની ટીમ આ યાદીમાં ત્રીજા સ્થાને છે, જેની જીતની ટકાવારી 55.56 છે.
પોઈન્ટ ટેબલમાં પાકિસ્તાનનું શું છે સ્થાન?
ભારતનો પાડોશી દેશ પાકિસ્તાન વર્લ્ડ ટેસ્ટ ચેમ્પિયનશિપના પોઈન્ટ ટેબલમાં આઠમા સ્થાને છે. અહીં ટીમ માત્ર વેસ્ટ ઈન્ડિઝથી આગળ છે, જેની જીતની ટકાવારી 18.52 છે. પાકિસ્તાનથી ઉપર બાંગ્લાદેશ અને દક્ષિણ આફ્રિકાની ટીમો છે, જેની જીતની ટકાવારી અનુક્રમે 34.38 અને 38.89 છે.
ફાઇનલિસ્ટ ટીમો હજુ નક્કી નથી
જો જોવામાં આવે તો ભારત અને ઓસ્ટ્રેલિયાને ટોચની બે ટીમોમાં સામેલ કર્યા બાદ પણ બે ફાઇનલિસ્ટ ટીમો હજુ નક્કી થઇ નથી. જેમ જેમ ટીમો વચ્ચેની મેચો વધી રહી છે તેમ તેમ ફાઈનલની રેસ વધુ રોમાંચક બની રહી છે. ભારત અને ઓસ્ટ્રેલિયા ઉપરાંત શ્રીલંકા, ન્યુઝીલેન્ડ અને ઈંગ્લેન્ડની ટીમો પણ ફાઈનલ મેચમાં સ્થાન મેળવવાની દાવેદાર છે.
