વિદેશ મંત્રાલયે કેનેડાના નાયબ વિદેશ પ્રધાન ડેવિડ મોરિસન દ્વારા ભારતના કેન્દ્રીય ગૃહ પ્રધાન અમિત શાહ વિશે કરેલી ટિપ્પણીને લઈને મોટો વાંધો વ્યક્ત કર્યો છે. શનિવારે વિદેશ મંત્રાલયના પ્રવક્તા રણધીર જયસ્વાલે કહ્યું કે કેનેડિયન હાઈ કમિશનના પ્રતિનિધિને આ મામલે ચર્ચા કરવા માટે બોલાવવામાં આવ્યા છે.
કેનેડાની રાષ્ટ્રીય સુરક્ષા અને ગુપ્તચર સલાહકાર નથાલી ડ્રોઈન અને કેનેડાની સંસદની રાષ્ટ્રીય સુરક્ષા સમિતિના સભ્ય ડેવિડ મોરિસને લીક થયેલા એક અહેવાલની પુષ્ટિ કરી હતી કે કેનેડામાં ખાલિસ્તાની અલગતાવાદીઓને નિશાન બનાવવાની ઝુંબેશ પાછળ અમિત શાહનો હાથ હતો.
ભારતને બદનામ કરવાનું ષડયંત્ર
એક નિવેદનમાં જયસ્વાલે ભારપૂર્વક જણાવ્યું હતું કે ભારત સરકાર મોરિસન દ્વારા કરવામાં આવેલા ‘વાહિયાત અને પાયાવિહોણા સંદર્ભો’નો ‘સખત શબ્દોમાં’ વિરોધ કરે છે. તેમણે કહ્યું કે કેનેડાના મોટા અધિકારીઓ દ્વારા આંતરરાષ્ટ્રીય મીડિયામાં પાયાવિહોણી માહિતી લીક કરવાના કથિત ઘટસ્ફોટ ભારતને બદનામ કરવા અને અન્ય દેશોને પ્રભાવિત કરવાની ઈરાદાપૂર્વકની વ્યૂહરચના બતાવે છે. આવી બેજવાબદારીભરી કાર્યવાહીના દ્વિપક્ષીય સંબંધો પર ગંભીર પરિણામો આવશે.
કેનેડા દ્વારા ભારતીય અધિકારીઓ પર કરવામાં આવતી દેખરેખ અંગેના પ્રશ્નના જવાબમાં વિદેશ મંત્રાલયના પ્રવક્તાએ જણાવ્યું કે, અમારા કેટલાક કોન્સ્યુલર અધિકારીઓને તાજેતરમાં કેનેડા સરકાર દ્વારા જાણ કરવામાં આવી હતી કે તેઓ ઓડિયો અને વીડિયો દેખરેખ હેઠળ છે અને ચાલુ રહેશે.
ભારતે કેનેડા સરકારનો ઔપચારિક રીતે વિરોધ કર્યો
અમે કેનેડા સરકારનો ઔપચારિક રીતે વિરોધ કર્યો છે કારણ કે અમે આ ઘટનાઓ સંબંધિત રાજદ્વારી અને કોન્સ્યુલર સંમેલનોનું ઘોર ઉલ્લંઘન માનીએ છીએ. તેમણે કહ્યું કે ટેકનિકલ વાતોનો હવાલો આપીને કેનેડાની સરકાર આ તથ્યને સત્ય ઠેરવી શકતી નથી કે તે ઉત્પીડન અને ધાકધમકીમાં વ્યસ્ત છે. અમારા રાજદ્વારી અને કોન્સ્યુલર કર્મચારીઓ પહેલેથી જ ઉગ્રવાદ અને હિંસાના વાતાવરણમાં કામ કરી રહ્યા છે. કેનેડા સરકારની આ કાર્યવાહી પરિસ્થિતિને વધારે ખરાબ કરી શકે છે.
