હેરી પોટર અભિનેત્રીનું નિધન, બે વાર જીત્યો ઓસ્કાર એવોર્ડ

‘હેરી પોટર’ અને ‘ડાઉનટન એબી’ ફિલ્મોમાં પોતાના અભિનયથી લાખો ચાહકોના દિલ જીતનારી અભિનેત્રી ડેમ મેગી સ્મિથનું નિધન થયું છે. અભિનેત્રીએ 89 વર્ષની વયે દુનિયાને અલવિદા કહી દીધું હતું. તેમના પરિવારે ચાહકોને આ દુઃખદ સમાચાર આપતા શોક વ્યક્ત કર્યો છે.

બ્રિટિશ સ્ટેજ અને સિનેમાની મહાન વ્યક્તિત્વ ધરાવતી આ અભિનેત્રીએ તેની કારકિર્દીમાં 2 ઓસ્કાર એવોર્ડ જીત્યા હતા એક 1970માં ‘ધ પ્રાઇમ ઓફ મિસ જીન બ્રોડી’ માટે અને બીજો 1979માં ‘કેલિફોર્નિયા સ્યુટ’ માટે.

અભિનેત્રીના પુત્રએ માહિતી આપી

તેના પુત્રો ટોબી સ્ટીફન્સ અને ક્રિસ લાર્કિને સોશિયલ મીડિયા પર લખ્યું હતું કે, ‘ડેમ મેગી સ્મિથનું અવસાન થયું હોવાની જાહેરાત કરતા અમને ખૂબ જ દુઃખ થાય છે. આજે 27 સપ્ટેમ્બરે સવારે તેમણે હોસ્પિટલમાં અંતિમ શ્વાસ લીધા હતા. તેણી ખૂબ જ ખાનગી વ્યક્તિ હતી અને તેણીની અંતિમ ક્ષણોમાં તેના મિત્રો અને પરિવાર હાજર હતા. મેગી સ્મિથ 2 પુત્રો અને 5 પ્રેમાળ પૌત્રો છોડીને દુનિયાને અલવિદા કહી ગયા છે. જેઓ તેમની માતા અને દાદીના અવસાનથી ખૂબ જ દુઃખી છે.

પરિવારે ગોપનીયતાની માંગ કરી

પરિવાર વતી આગળ લખતા એવું કહેવામાં આવ્યું છે કે ‘અમે ચેલ્સિયા અને વેસ્ટમિન્સ્ટર હોસ્પિટલના અદ્ભુત સ્ટાફનો આભાર માનવાની આ તક લેવા માંગીએ છીએ જેમણે તેમના અંતિમ દિવસોમાં તેમની સંભાળ લીધી. અમે તેમના સમર્થન અને શુભેચ્છાઓ માટે દરેકનો આભાર માનીએ છીએ.  અમે તમને વિનંતી કરીએ છીએ કે આ સમયે અમારી ગોપનીયતાનો આદર કરો.

કારકિર્દીમાં ઉતાર-ચઢાવ આવ્યો

બ્રિટિશ સિનેમા અને થિયેટરની મહાન વ્યક્તિત્વ ડેમ મેગી સ્મિથે પોતાની અદભૂત અભિનય કૌશલ્યથી પ્રેક્ષકોના હૃદયમાં વિશેષ સ્થાન બનાવ્યું હતું. તેની કોમેડી માટે પણ તેને ઘણો પસંદ કરવામાં આવ્યો હતો. સ્મિથે એકવાર કહ્યું હતું કે ‘મારી કારકિર્દીમાં ઉતાર-ચઢાવ આવે છે. મને લાગે છે કે હું કોમેડી પૂરતી જ સીમિત રહી ગઈ છું. જો કે, સ્મિથે માત્ર કોમેડી જ નહીં પરંતુ ગંભીર ભૂમિકાઓમાં પણ શાનદાર પ્રદર્શન કર્યું હતું.

સ્મિથે ફિલ્મ ઈન્ડસ્ટ્રીમાં પણ એન્ટ્રી કરી હતી

1934માં ઓક્સફોર્ડમાં જન્મેલા સ્મિથે પ્લેહાઉસ થિયેટરમાં તેની કારકિર્દીની શરૂઆત કરી હતી. તેમણે બેમ્બર ગેસ્કોઇગ્નેના મ્યુઝિકલ ‘શેર માય લેટીસ’ સહિત અનેક મોટા સ્ટેજ પ્રોડક્શન્સમાં ભાગ લીધો હતો. આ સાથે સ્મિથે ફિલ્મ ઈન્ડસ્ટ્રીમાં પણ એન્ટ્રી કરી હતી જ્યાં વર્ષ 1958માં તેને સેથ હોલ્ટની થ્રિલર ફિલ્મ ‘નોવ્હેર ટુ ગો’માં પહેલી તક મળી હતી. તેમનું નિધન માત્ર તેમના પરિવાર માટે જ નહીં પરંતુ તેમના ચાહકો માટે પણ મોટી ખોટ છે.