Accident : વડોદરામાં બે લક્ઝરી બસ વચ્ચે ભીષણ અકસ્માત, 2ના મોત અને 10થી વધુ ઘાયલ
વડોદરા જિલ્લાના કરજણ નજીક આવેલા લાકોદરા ગામ પાસે નેશનલ હાઇવે નંબર 8 પર આજે સવારે ગંભીર માર્ગ અકસ્માત સર્જાયો હતો. જેમાં બે ખાનગી લક્ઝરી બસ વચ્ચે ભારે ટક્કર થઈ હતી, જેના કારણે ઘટના સ્થળે જ બે મુસાફરોનું મૃત્યુ નીપજ્યું છે, તેમજ અંદાજે 10 જેટલા લોકો ઇજાગ્રસ્ત થયા છે.
શું ઘટના બની હતી?
માહિતી અનુસાર, લાકોદરા નજીક એક ખાનગી લક્ઝરી બસ હાઇવેની બાજુમાં પાર્ક કરવામાં આવી હતી. એ દરમિયાન પાછળથી પૂરઝડપે આવતી બીજી ખાનગી બસે આગળ પાર્ક કરેલી બસને ટક્કર મારતાં અકસ્માત સર્જાયો હતો. અથડામણ એટલી ગંભીર હતી કે બંને વાહનોના આગળના ભાગને ભારે નુકસાન પહોંચ્યું હતું.
ઘાયલ લોકોને સારવાર માટે ખસેડાયા
દુર્ઘટનાની જાણ થતા જ નજીકથી પસાર થતા વાહનચાલકો અને સ્થાનિક રહેવાસીઓ તાત્કાલિક મદદ માટે દોડી આવ્યા હતા. લોકોને બહાર કાઢવાની કામગીરી શરૂ કરવામાં આવી હતી. પોલીસ અને એમ્બ્યુલન્સ ટીમ સ્થળ પર પહોંચી ગઈ હતી અને ઘાયલ લોકોને સારવાર માટે નજીકની હોસ્પિટલમાં ખસેડવામાં આવ્યા છે.
હાઇવે પર થયો ટ્રાફિક જામ
સૂત્રોના જણાવ્યા મુજબ, મૃતદેહોને પોસ્ટમોર્ટમ માટે મોકલવામાં આવ્યા છે અને પોલીસ દ્વારા ઘટના અંગે વધુ તપાસ શરૂ કરવામાં આવી છે. આ દુર્ઘટનાને પગલે હાઇવે પર ટ્રાફિક જામની સ્થિતિ પણ સર્જાઈ હતી.
