Vadodaraમાં શાળાઓ બાદ જિલ્લા કોર્ટને મળી ધમકી ; ધમકીભર્યા ઈમેલ મળવાની ઘટનાઓ યથાવત

Vadodara શહેર છેલ્લા બે દિવસથી બોમ્બ ધમકીઓના ઈમેલને લઈને ચિંતિત બન્યું છે. અજાણ્યા તત્વો દ્વારા શહેરની જાહેર સંસ્થાઓને નિશાન બનાવી ધમકીભર્યા સંદેશાઓ મોકલવામાં આવી રહ્યા છે.

શાળાઓને ઈમેલ મળ્યાના બીજા જ દિવસે મંગળવારે સવારે દિવાળીપુરા વિસ્તારમાં આવેલી જિલ્લા અદાલતને પણ બોમ્બથી ઉડાવી દેવાની ચેતવણી મળતા સુરક્ષા એજન્સીઓ તરત જ સક્રિય થઈ ગઈ હતી.

કોર્ટના મુખ્ય પ્રવેશદ્વારને સમયસર બંધ કરી દેવાયો

ધમકી મળ્યાની માહિતી પોલીસ સુધી પહોંચતા જ તાત્કાલિક કાર્યવાહી હાથ ધરવામાં આવી. પોલીસ, બોમ્બ ડિસ્પોઝલ સ્ક્વોડ અને ડોગ સ્ક્વોડ સાથે કોર્ટ પરિસરમાં પહોંચી હતી.

સુરક્ષાને ધ્યાનમાં રાખીને કોર્ટના મુખ્ય પ્રવેશદ્વારને સમયસર બંધ કરી દેવાયો હતો અને પરિસરમાં આવનજાવન પર નિયંત્રણ મૂકાયું હતું. વકીલો, અરજદારો અને સ્ટાફને સાવચેતીપૂર્વક બહાર કાઢવામાં આવ્યા હતા.

સમગ્ર કોર્ટ બિલ્ડિંગ અને આસપાસના વિસ્તારનું સઘન સર્ચ ઓપરેશન હાથ ધરાયું હતું. અધિકારીઓના જણાવ્યા મુજબ, કોઈ પણ પ્રકારની શંકાસ્પદ વસ્તુ મળે તો તાત્કાલિક કાર્યવાહી થાય તે માટે તમામ તૈયારીઓ રાખવામાં આવી હતી.

તપાસમાં કોઈ વિસ્ફોટક સામગ્રી મળી આવી નથી

પોલીસ સૂત્રોએ જણાવ્યું હતું કે, ધમકી ઈમેલ મારફતે મળી છે અને તેની સત્યતા અંગે તપાસ ચાલુ છે. અત્યાર સુધી પ્રાથમિક તપાસમાં કોઈ વિસ્ફોટક સામગ્રી મળી આવી નથી, પરંતુ સંપૂર્ણ ખાતરી થયા વગર કોઈ પણ પ્રકારની ઢીલ આપવામાં આવી રહી નથી.

સાયબર ક્રાઈમ વિભાગ પણ ઈમેલના સ્ત્રોત સુધી પહોંચવા માટે ટેકનિકલ વિશ્લેષણ કરી રહ્યો છે. ઈમેલ કયા સર્વર પરથી મોકલાયો, તેમાં કોઈ નકલી આઈડીનો ઉપયોગ થયો છે કે કેમ અને તેમાં કોઈ સંગઠિત ગતિવિધિનો અંશ છે કે નહીં તે મુદ્દાઓ પર ખાસ ધ્યાન અપાઈ રહ્યું છે.