ઇરાન-ઇઝરાયલ સંઘર્ષ વચ્ચે Air India એ લીધો મોટો નિર્ણય : તમામ ફ્લાઇટ્સ રદ કરી, દુબઈ-દોહાના મુસાફરો અટવાયા!

મિડલ ઈસ્ટ યુદ્ધ જેવી પરિસ્થિતિનો સામનો કરી રહ્યું છે. ઇઝરાયેલે ઈરાન વિરુદ્ધ ઓપરેશન રોરિંગ લાયન શરૂ કર્યું છે અને યુનાઇટેડ સ્ટેટ્સ સાથે મળીને હુમલાઓ કરી રહ્યું છે. ઈરાન પણ બદલો લઈ રહ્યું છે. આ વચ્ચે, ઘણા દેશોએ તેમના એયર સ્પેસ બંધ કરી દીધા છે અને ફ્લાઇટ્સ રદ કરી દીધી છે. પરિસ્થિતિને ધ્યાનમાં રાખીને, એર ઇન્ડિયા (Air India)એ તાત્કાલિક અસરથી મિડલ ઈસ્ટ માટે તમામ હવાઈ સેવાઓ સ્થગિત કરી દીધી છે.

એર ઇન્ડિયાએ જારી કરી એડવાઈજરી
એર ઇન્ડિયાએ એક એડવાઈજરી જારી કરીને જણાવ્યું હતું કે, મિડલ ઈસ્ટના ભાગોમાં બદલાતી પરિસ્થિતિને ધ્યાનમાં રાખીને, મિડલ ઈસ્ટ તરફ જતી અને ત્યાંથી આવતી બધી એર ઇન્ડિયા ફ્લાઇટ્સ સ્થગિત કરવામાં આવી છે. અમે અમારા મુસાફરો અને ક્રૂ માટે ઉચ્ચતમ સલામતી ધોરણો જાળવવા માટે પ્રતિબદ્ધ છીએ. અમે અમારા ફ્લાઇટ ઓપરેશન્સ માટે સેફ્ટી અને સિક્યુરિટીનું મૂલ્યાંકન કરવાનું ચાલુ રાખીશું અને જરૂર મુજબ ઓપરેશન્સમાં ફેરફાર કરીશું. અમારી ટીમો મુસાફરોને તમામ જરૂરી સહાય પૂરી પાડશે.’

આ શહેરોની ફ્લાઇટ્સ પ્રભાવિત થઈ:
એર ઇન્ડિયાએ જે મુખ્ય શહેરો માટે તેની સેવાઓ રદ કરી છે તેમાં શામેલ છે:

• યુએઈ: દુબઈ અને અબુ ધાબી
• સાઉદી અરેબિયા: રિયાધ, જેદ્દાહ અને દમ્મામ
• કતર: દોહા
• ઓમાન: મસ્કત
• ઇઝરાયેલ: તેલ અવીવ

તેલ અવીવ જતી એર ઇન્ડિયાની ફ્લાઇટ પાછી વળી ગઈ
ઇઝરાયેલી એયર સ્પેસ બંધ થવાને કારણે એર ઇન્ડિયાની ફ્લાઇટ AI139 અધવચ્ચે જ ભારત પરત ફરી રહી છે. ફ્લાઇટ 28 ફેબ્રુઆરીએ દિલ્હીથી તેલ અવીવ જવા રવાના થઈ હતી પરંતુ પરિસ્થિતિને કારણે તેને ડાયવર્ટ કરવામાં આવી હતી.

IndiGoએ પણ જારી કરી એડવાઈજરી
ટ્રાવેલ એડવાઇઝરીમાં ઇન્ડિગોએ જણાવ્યું હતું કે, ‘અમે ઇરાન અને તેના એયર સ્પેસ સંબંધિત પ્રાદેશિક અપડેટ્સ પર નજીકથી નજર રાખી રહ્યા છીએ. અમારા ગ્રાહકો અને ક્રૂની સલામતી અમારી ટોચની પ્રાથમિકતા છે. પરિસ્થિતિ બદલાય તેમ અમારી ટીમો કોઈપણ જરૂરી ફેરફારો કરવા માટે તૈયાર છે. મુસાફરોને સલાહ આપવામાં આવે છે કે તેઓ પ્રસ્થાન પહેલાં તેમની ફ્લાઇટની સ્થિતિ તપાસે. કોઈપણ અસરની સ્થિતિમાં, રજિસ્ટર્ડ સંપર્ક વિગતો દ્વારા અપડેટ્સ તાત્કાલિક જણાવવામાં આવશે. અમે તમને જાણ કરતા રહીશું અને આ સમય દરમિયાન અમારો ટેકો પૂરો પાડવા માટે સંપૂર્ણપણે પ્રતિબદ્ધ રહીશું.’

યુરોપિયન દેશોએ અમેરિકા-ઈરાન તણાવ અંગે ચેતવણી જારી
કેટલાક યુરોપિયન દેશોએ તેમના નાગરિકોને ઈરાન અને મિડલ ઈસ્ટના અન્ય કેટલાક વિસ્તારોમાં વધતા તણાવને કારણે ત્યાંથી જવા અથવા મુસાફરી ટાળવા વિનંતી કરી છે. બ્રિટિશ સરકારે શુક્રવારે કહ્યું હતું કે તેણે ઈરાનમાંથી તેના સ્ટાફને અસ્થાયી રૂપે પાછા ખેંચી લીધા છે, તેનું દૂતાવાસ દૂરસ્થ રીતે કાર્યરત રહેશે, અને દેશમાં કોઈપણ મુસાફરી સામે સલાહ આપી છે. ફ્રેન્ચ વિદેશ મંત્રાલયે ફ્રેન્ચ નાગરિકો માટે ઇઝરાયલ, જેરુસલેમ અને પશ્ચિમ કાંઠાની મુસાફરી સામે સુરક્ષા સલાહ જારી કરી હતી. ઇટાલીએ પણ તેના નાગરિકોને ઈરાન છોડવા વિનંતી કરી હતી અને સમગ્ર મિડલ ઈસ્ટમાં ભારે સાવધાની રાખવાની સલાહ આપી હતી. જર્મનીએ ઇઝરાયેલની મુસાફરી અટકાવવા માટે તેની ટ્રાવેલ ગાઈડેન્સ અપડેટ કરી છે.