યશની ફિલ્મ ‘Toxic’નું ગીત ‘તબાહી’ રિલીઝ થતા જ વિવાદ; ચાહકોમાં ઉત્સાહને બદલે નારાજગી જોવા મળી

ફિલ્મ ‘ટોક્સિક’ ની જાહેરાત થઈ ત્યારથી જ યશ અને કિયારા અડવાણીની કેમેસ્ટ્રી જોવા માટે ચાહકો આતુર હતા. ગયા મહિને જ્યારે ગીતનું પોસ્ટર રિલીઝ થયું, જેમાં યશ અને કિયારા બીચ પર એકબીજાની નજીક ઉભેલા જોવા મળ્યા હતા, ત્યારે ફેન્સને આશા હતી કે તેમને એક ભવ્ય મ્યુઝિક વીડિયો જોવા મળશે. જોકે, 2 માર્ચના રોજ નિર્માતાઓએ જ્યારે ‘તબાહી’ ગીત રિલીઝ કર્યું, ત્યારે તે માત્ર ઓડિયો ટ્રેક તરીકે જ સામે આવ્યું.

પાંચ ભાષાઓમાં ‘તબાહી’નો ગુંજારવ
ભલે વીડિયોને લઈને વિવાદ હોય, પરંતુ સંગીતની દૃષ્ટિએ મેકર્સે આ ગીતને દેશભરમાં પહોંચાડવા માટે કોઈ કસર બાકી રાખી નથી. મશહૂર સંગીતકાર વિશાલ મિશ્રા દ્વારા કમ્પોઝ કરવામાં આવેલું આ ગીત કુલ પાંચ ભાષાઓમાં રિલીઝ કરવામાં આવ્યું છે. રાજ શેખરે હિન્દી ભાષામાં આ ગીતના લિરિક્સ લખ્યા છે. જ્યારે યોગરાજ ભટ્ટે કન્નડ ભાષામાં આ ગીતના લિરિક્સ લખ્યા છે. રામજોગય્યા ​​શાસ્ત્રીએ તેલુગુ લિરિક્સ લખ્યા છે. વિગ્નેશ શિવને તમિલ લિરિક્સ લખ્યા છે અને રફીક અહેમદે મલયાલમ લિરિક્સ લખ્યા છે. દરેક ભાષાના અગ્રણી ગીતકારોને જોડીને ફિલ્મને સાચા અર્થમાં ‘પેન-ઈન્ડિયા’ ટચ આપવામાં આવ્યો છે.

“અમને એપ્રિલ ફૂલ બનાવ્યા”
વીડિયોના અભાવે નેટીઝન્સે સોશિયલ મીડિયા પર મેકર્સની આકરી ટીકા કરી છે. એક યુઝરે રોષ ઠાલવતા લખ્યું કે, “માર્ચ મહિનામાં જ અમને એપ્રિલ ફૂલ બનાવી દેવામાં આવ્યા છે.” જ્યારે અન્ય એક ચાહકે લખ્યું, “કૃપા કરીને આ ગીતનો વીડિયો રિલીઝ કરો, માત્ર ઓડિયોથી અમારું મન ભરાતું નથી.” ચાહકોની આ નારાજગી સ્પષ્ટ કરે છે કે યશના કમબેકને લઈને પ્રેક્ષકોમાં કેટલી ઉચ્ચ અપેક્ષાઓ છે.