Asia cup sri lanka : શ્રીલંકન ક્રિકેટર વેલાલેજ પર તૂટ્યો દુઃખનો પહાડ: હ્રદયરોગના હુમલાથી પિતાનું અવસાન

સોશિયલ મીડિયા પર વાયરલ થયેલા એક વીડિયોમાં, શ્રીલંકાના કોચ અને ભૂતપૂર્વ ક્રિકેટ દિગ્ગજ સનથ જયસૂર્યા વેલ્લાલેજ પાસે જઈ રહ્યા છે, તેમના ખભા પર હળવેથી હાથ મૂકીને, તેમને સાંત્વના આપી રહ્યા છે અને તેમના પિતાના અવસાનની જાણ કરી રહ્યા છે.

વીડિયો દરમિયાન, દુનિથ ભાવુક દેખાયા હતા. તેમના પિતા, સુરંગા વેલ્લાલેજ પણ એક ક્રિકેટર હતા. તેમણે પ્રિન્સ ઓફ વેલ્સ કોલેજનું નેતૃત્વ કર્યું હતું. જોકે, તેમને ક્યારેય શ્રીલંકાની રાષ્ટ્રીય ટીમનું પ્રતિનિધિત્વ કરવાની તક મળી નથી.

રસેલ આર્નોલ્ડનું નિવેદન

મેચ દરમિયાન કોમેન્ટ્રી કરી રહેલા ભૂતપૂર્વ શ્રીલંકન ક્રિકેટર રસેલ આર્નોલ્ડે લાઈવ કહ્યું, “ડુનિથ વેલાલેજના પિતા સુરંગાનું હમણાં જ અવસાન થયું છે. તેઓ પોતે એક ક્રિકેટર હતા અને પ્રિન્સ ઓફ વેલ્સ કોલેજ ટીમના કેપ્ટન હતા. જ્યારે હું સેન્ટ પીટર્સ કોલેજ માટે રમતો હતો ત્યારે તેઓ કેપ્ટન હતા. આ અત્યંત દુઃખદ છે.

આ સમાચાર હમણાં જ ડુનિથ સાથે શેર કરવામાં આવ્યા છે. અમારી સંવેદના તેમના પરિવાર સાથે છે. ટીમનો ડ્રેસિંગ રૂમ એક પરિવાર જેવો છે. આશા છે કે, આ ઘટના ટીમને મજબૂત બનાવશે અને અમે સુપર 4 માં સારું પ્રદર્શન કરીશું.”

મેચમાં વેલાલેજનો દેખાવ

અફઘાનિસ્તાન સામેની આ મેચમાં ડ્યુનિથનું પ્રદર્શન અપેક્ષા મુજબ નહોતું. તેણે ચાર ઓવરમાં 49 રન આપ્યા અને માત્ર એક જ વિકેટ લઈ શક્યો. મોહમ્મદ નબીએ એક ઓવરમાં પાંચ છગ્ગા ફટકાર્યા. નબીએ 22 બોલમાં 60 રનની જ્વલંત ઇનિંગ રમી. જોકે, અફઘાનિસ્તાનના જોરદાર પ્રયાસો છતાં, ટીમ મેચ બચાવી શકી નહીં.

શ્રીલંકાએ મેચ જીતી લીધી અને સુપર-4માં સ્થાન મેળવ્યું. અફઘાનિસ્તાને 20 ઓવરમાં આઠ વિકેટ ગુમાવીને 169 રન બનાવ્યા. જવાબમાં શ્રીલંકાએ 18.4 ઓવરમાં ચાર વિકેટ ગુમાવીને લક્ષ્ય હાંસલ કર્યું. કુસલ મેન્ડિસે 52 બોલમાં 74 રનની અણનમ ઇનિંગ રમી.