Back Pain Home Remedies: કમરના દુખાવાથી પરેશાન છો? આ સરળ દેશી ઉપાયથી મેળવો રાહત

આજની ભાગદોડભરી અને બેઠાડુ જીવનશૈલીમાં કમરનો દુખાવો (Back Pain) એક સામાન્ય પરંતુ ગંભીર સમસ્યા બની ગયો છે. લાંબા સમય સુધી એક જ સ્થિતિમાં બેસીને કામ કરવું, શારીરિક પ્રવૃત્તિની અછત, ખોટી બેસવાની પોઝિશન અને વિટામિન D જેવી પોષક તત્વોની કમી કમરના દુખાવાના મુખ્ય કારણો છે. ઘણી વખત આ દુખાવો એટલો વધી જાય છે કે રોજિંદા કામ કરવું પણ મુશ્કેલ બની જાય છે.

દુખાવાથી રાહત મેળવવા માટે મોટાભાગના લોકો પેઇન કિલર દવાઓનો સહારો લે છે, પરંતુ લાંબા સમય સુધી દવાઓ લેવી શરીર માટે નુકસાનકારક સાબિત થઈ શકે છે. આવા સમયે આયુર્વેદમાં જણાવેલા સરળ દેશી ઉપાયો વધુ સલામત અને અસરકારક સાબિત થાય છે.

કમરના દુખાવામાં રાહત મેળવવા માટે એક સરળ ઉપાય છે ગરમ પાણી અને મીઠાનો શેક. એક વાસણમાં પાણી ગરમ કરો અને તેમાં થોડું મીઠું ઉમેરો. પાણી એટલું ગરમ હોવું જોઈએ કે તેમાં ટુવાલ ડુબાડી સહેલાઈથી નિચોવી શકાય અને ત્વચાને બળતરા ન થાય. હવે પેટના બળે અથવા ઊંધા સુઈને દુખાવાવાળી જગ્યાએ આ ટુવાલથી શેક કરો.

ગરમ પાણી અને મીઠાથી કરાયેલો શેક માંસપેશીઓને આરામ આપે છે, ખેંચાણ ઘટાડે છે અને રક્તપ્રવાહ સુધારે છે. આથી જકડણ ઓછી થાય છે અને દુખાવામાં નોંધપાત્ર રાહત મળે છે. ખાસ કરીને લાંબા સમય સુધી બેસીને કામ કરનારાઓ માટે આ ઉપાય ખૂબ લાભદાયક છે.

આ સાથે સાથે હંમેશા સાચી પોઝિશનમાં બેસવું, નિયમિત હળવી કસરત કરવી, ઓફિસની ખુરશી અને ડેસ્ક યોગ્ય ઊંચાઈ પર રાખવી અને સંતુલિત આહાર લેવો જરૂરી છે. જો ડોક્ટર સલાહ આપે તો વિટામિન Dનું સપ્લિમેન્ટ પણ લઈ શકાય. છતાં જો સતત કમરનો દુખાવો રહેતો હોય, તો વિલંબ કર્યા વગર તરત તબીબી સલાહ લેવી જરૂરી છે.