હિન્દુ યુવકની હત્યા બાદ બાંગ્લાદેશની હિંમત, ભારતના હાઈ કમિશનરને સમન્સ પાઠવ્યા

બાંગ્લાદેશમાં હાલની સ્થિતિ ફરી એકવાર ગંભીર બનતી નજરે પડી રહી છે. દેશમાં રાજકીય અસ્થિરતા, ધાર્મિક અસહિષ્ણુતા અને ભારત વિરોધી ભાવનાઓના કારણે પરિસ્થિતિ વધુ સંવેદનશીલ બની છે. ખાસ કરીને હિન્દુ લઘુમતી સમુદાય સામે થતી હિંસા અને ત્યારબાદ ભારતના હાઈ કમિશનરને સમન્સ પાઠવવાની ઘટનાએ બંને દેશોના સંબંધોમાં તણાવ વધાર્યો છે.

તાજેતરમાં બાંગ્લાદેશના વિદેશ મંત્રાલયે ભારતના હાઈ કમિશનર પ્રણય વર્માને સમન્સ પાઠવ્યા હતા. આ પગલું નવી દિલ્હીમાં બાંગ્લાદેશ હાઈ કમિશન અને નિવાસસ્થાનની બહાર થયેલા વિરોધ પ્રદર્શનો તથા સિલિગુડી સ્થિત બાંગ્લાદેશ વિઝા સેન્ટરમાં થયેલી તોડફોડ બાદ લેવામાં આવ્યું છે. ઢાકાએ ભારત સરકાર સમક્ષ રાજદ્વારી મિશનોની સુરક્ષા અંગે ગંભીર ચિંતા વ્યક્ત કરી છે.

બાંગ્લાદેશનું કહેવું છે કે રાજદ્વારી સંસ્થાઓ સામે હિંસા કે ધાકધમકી જેવી ઘટનાઓ આંતરરાષ્ટ્રીય નિયમોનો ભંગ કરે છે. વિદેશ મંત્રાલયે ભારતને આ ઘટનાઓની સંપૂર્ણ તપાસ કરીને ભવિષ્યમાં આવા બનાવો ન બને તે માટે કડક સુરક્ષા પગલાં લેવા અપીલ કરી છે.

બીજી તરફ, બાંગ્લાદેશની અંદરની સ્થિતિ પણ ચિંતાજનક બની છે. ડિસેમ્બર 2025માં મૈમનસિંહ જિલ્લાના ભાલુકામાં દીપુ ચંદ્ર દાસ નામના હિન્દુ યુવકની ટોળા દ્વારા કરાયેલી હત્યાએ ભારે આક્રોશ ફેલાવ્યો હતો. ધાર્મિક લાગણીઓને ઠેસ પહોંચાડવાના આરોપો બાદમાં ખોટા સાબિત થયા હતા, પરંતુ તેના છતાં હિંસક ટોળાએ તેને માર માર્યો હોવાના આરોપો છે.

આ ઉપરાંત, ચટ્ટોગ્રામમાં ભારતીય સહાયક હાઈ કમિશન પર થયેલા હુમલાએ સ્થિતિને વધુ ઉગ્ર બનાવી. ભારત વિરોધી પ્રદર્શનો દરમિયાન થયેલી તોડફોડ બાદ ભારતે સુરક્ષા કારણોસર ત્યાંનું વિઝા અરજી કેન્દ્ર અસ્થાયી રીતે બંધ કરી દીધું છે.

શેખ હસીનાની સરકાર પડ્યા બાદ ઓગસ્ટ 2024થી મોહમ્મદ યુનુસના નેતૃત્વ હેઠળ ચાલી રહેલી વચગાળાની સરકાર દરમિયાન રાજકીય ઉથલપાથલ યથાવત છે. આ સમયગાળા દરમિયાન લઘુમતીઓ પર હુમલાઓ અને કટ્ટરપંથી જૂથોની સક્રિયતા વધી હોવાના આરોપો સામે આવ્યા છે. ભારતે અનેક વખત બાંગ્લાદેશમાં હિન્દુ સમુદાયની સુરક્ષા અંગે ચિંતા વ્યક્ત કરી છે.

આ તમામ ઘટનાઓએ ભારત-બાંગ્લાદેશના સંબંધોને સંવેદનશીલ તબક્કે પહોંચાડી દીધા છે, જ્યાં રાજદ્વારી સંયમ, પરસ્પર આદર અને જવાબદારી અત્યંત જરૂરી બની ગઈ છે.