BCCIનો ઐતિહાસિક નિર્ણય: હવે મહિલા ક્રિકેટરોને ઘરેલું મેચમાં પુરુષો જેટલી જ ફી, જાણો સંપૂર્ણ વિગતો

ભારતીય ક્રિકેટ કંટ્રોલ બોર્ડ (BCCI) એ મહિલા ક્રિકેટના ઇતિહાસમાં એક ક્રાંતિકારી નિર્ણય લીધો છે. 22 ડિસેમ્બરે યોજાયેલી ઓનલાઈન બેઠક દરમિયાન બોર્ડે ઘરેલું મહિલા ક્રિકેટરોને પુરુષ ક્રિકેટરો જેટલી જ મેચ ફી આપવાનો નિર્ણય કર્યો છે. આ સાથે જ BCCI વિશ્વભરમાં રમતગમતમાં લિંગ સમાનતાનું શ્રેષ્ઠ ઉદાહરણ બન્યું છે.

• હવે ફર્સ્ટ ક્લાસ અને વનડે મેચ માટે ₹50,000

નવા નિયમો અનુસાર, સિનિયર મહિલા ક્રિકેટરોને ફર્સ્ટ ક્લાસ (ડે મેચ) અને વનડે મેચ માટે હવે ₹50,000 મેચ ફી મળશે. અગાઉ આ રકમ ₹20,000 હતી, એટલે કે ફીમાં સીધો 150% વધારો થયો છે. પ્લેઇંગ-11માં સામેલ ખેલાડીઓને પૂરી ફી મળશે, જ્યારે રિઝર્વ ખેલાડીઓને ₹25,000 આપવામાં આવશે.

• T20 ફોર્મેટમાં ફી થઈ ડબલ

T20 મેચોમાં પણ BCCIએ નોંધપાત્ર વધારો કર્યો છે. હવે પ્લેઇંગ-11માં સામેલ મહિલા ખેલાડીઓને ₹25,000 મળશે, જે અગાઉ ₹10,000 હતી. મેચ ન રમનાર એક્સ્ટ્રા ખેલાડીઓને ₹12,500 ચૂકવવામાં આવશે.

• જુનિયર મહિલા ક્રિકેટરોને પણ મોટો લાભ

સ્ટેટ અને ઝોનલ સ્તરે રમતી જુનિયર મહિલા ખેલાડીઓની ફીમાં પણ વધારો થયો છે. વનડે અને ફર્સ્ટ ક્લાસ મેચ માટે પ્લેઇંગ-11ને ₹25,000 અને બેન્ચ ખેલાડીઓને ₹12,500 મળશે. T20 માટે અનુક્રમે ₹12,500 અને ₹6,250 ફી નક્કી કરવામાં આવી છે.

• હવે સિઝનમાં 7 લાખ સુધીની કમાણી શક્ય

BCCIના આંકડા મુજબ, અગાઉ સિનિયર મહિલા ખેલાડીઓ એક ઘરેલું સિઝનમાં માત્ર ₹2 લાખ કમાતી હતી. હવે માત્ર ચાર વનડે મેચ રમવાથી જ ₹2 લાખ મળશે. એક સિઝનમાં કુલ આવક ₹5થી ₹7 લાખ સુધી પહોંચી શકે છે.

• મહિલા ક્રિકેટ માટે ઉજ્જવળ ભવિષ્ય

આંતરરાષ્ટ્રીય સ્તરે પહેલાથી જ પે-પેરિટી લાગુ કર્યા બાદ હવે ઘરેલું ક્રિકેટમાં પણ સમાન વેતન નીતિ લાગુ કરીને BCCIએ સ્પષ્ટ સંદેશ આપ્યો છે કે પ્રતિભાને લિંગથી નહીં, પ્રદર્શનથી આંકવામાં આવે છે. આ નિર્ણયથી દેશના અંતરિયાળ વિસ્તારોની યુવતીઓ માટે ક્રિકેટ હવે એક મજબૂત કારકિર્દી વિકલ્પ બનશે અને મહિલા પ્રીમિયર લીગ (WPL) માટે વધુ ટેલેન્ટ તૈયાર થશે.